ନୂଆଦିଲ୍ଲୀ,୨୬-୮: କେନ୍ଦ୍ର ସରକାର ଖୁବଶୀଘ୍ର ହାଇଜିନ ଉତ୍ପାଦ ସାନିଟାରୀ ନ୍ୟାପକିନ୍, ହ୍ୟାଣ୍ଡ ଓ୍ବାଶ୍, ସମସ୍ତ ପ୍ରକାର କୀଟାଣୁନାଶକ ଉତ୍ପାଦ ଏବଂ ବୟସ୍କଙ୍କ ଲାଗି ଉଦ୍ଦିଷ୍ଟ ଡାୟପର୍ସ ମୂଲ୍ୟକୁ ନିୟନ୍ତ୍ରଣ କରିବାକୁ ଯାଉଛନ୍ତି। ଏଥିଲାଗି ମେଡିକାଲ ଉପକରଣ, ଡିସ୍ପୋଜେବଲ ଏବଂ ହାଇଜିନ୍ ଉତ୍ପାଦର ସ୍ବତନ୍ତ୍ର ତାଲିକା ପ୍ରସ୍ତୁତ କରାଯାଉଛି। ସୂଚନାଯୋଗ୍ୟ ଯେ, ନିକଟରେ ସରକାର କେତେକ ଜରୁରୀ ଔଷଧର ଦାମକୁ ନିୟନ୍ତ୍ରିଣ ତାଲିକାଭୁକ୍ତ କରି ମୂଲ୍ୟ ହ୍ରାସ ଘୋଷଣା କରିଥିଲେ। ପ୍ରାୟ ୩୮୪ ଅତ୍ୟାବଶ୍ୟକ ଔଷଧ ଦରକୁ ସର୍ବାଧିକ ରିଟେଲ ମୂଲ୍ୟ(ଏମ୍ଆର୍ପି)ରେ ସୀମିତ ରଖାଯାଇଛି। ଏଥିସହିତ କ୍ୟାନସର ଚିକିତ୍ସାରେ ବ୍ୟବହୃତ ୪୨ ପ୍ରକାର ଔଷଧର ଲାଭକୁ ସର୍ବାଧିକ ୩୦ ପ୍ରତିଶତରେ ସୀମିତ ରଖାଯାଇଛି। ଏହି ତାଲିକା ବାଦ୍ ଅନ୍ୟ ଔଷଧଗୁଡ଼ିକ ଉପରେ କମ୍ପାନୀଗୁଡ଼ିକ ପକ୍ଷରୁ ସର୍ବାଧିକ ୧୦ ପ୍ରତିଶତ ମୂଲ୍ୟ ବଢ଼ାଇବାକୁ ଅନୁମତି ଦିଆଯାଇଛି। ମିଡିଆରେ ପ୍ରକାଶିତ ରିପୋର୍ଟ ଅନୁଯାୟୀ, ହାଇଜିନ ଉତ୍ପାଦଗୁଡ଼ିକର ତାଲିକା ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି ଏବଂ ଆସନ୍ତା ୨ ମାସ ମଧ୍ୟରେ ଏହାକୁ ଜାରି କରାଯିବ। ଏହି ତାଲିକାକୁ ୨ ଭାଗରେ ବିଭକ୍ତ କରାଯିବ। ପ୍ରଥମ ଭାଗରେ ଅର୍ଥାତ ପ୍ରାଇମେରୀ ଶ୍ରେଣୀରେ ରଖାଯାଇଥିବା ଉତ୍ପାଦଗୁଡ଼ିକର ମୂଲ୍ୟକୁ ନିୟନ୍ତ୍ରିତ କରାଯିବ। ସେହିପରି ସେକେଣ୍ଡାରୀ ଶ୍ରେଣୀରେ ଥିବା ଉତ୍ପାଦଗୁଡ଼ିକ ଯେପରି ଉଚିତ୍ ଦାମରେ ଗ୍ରାହକ କିଣିପାରିବେ ତାହା ସରକାର ସୁନିଶ୍ଚିତ କରିବେ। ତାଲିକା ଜାରି ହେବା ପରେ ଲାଭକୁ ସୀମାବଦ୍ଧ କରାଯିବା ନେଇ ନିଷ୍ପତ୍ତି ନିଆଯିବ। ନୀତି ଆୟୋଗ କମିଟି ଏ ସଂକ୍ରାନ୍ତରେ ନିଷ୍ପତ୍ତି ନେବେ।
