ସୋନପୁର, ୨୯ା୭(ମୃତ୍ୟୁଞ୍ଜୟ ଶତପଥୀ): ଓଡ଼ିଶା ଭୂ-ସଂସ୍କାର ଆଇନରେ ମକଦ୍ଦମା ଫଇସଲା କରିବାରେ କର୍ତ୍ତବ୍ୟରେ ଅବହେଳା କାରଣରୁ ରାଜ୍ୟ ସରକାର ସହିଥିଲେ ୨ କୋଟି ୪୨ ଲକ୍ଷ ୬୬ ହଜାର ୧୧୭ ଟଙ୍କାର ରାଜସ୍ବ କ୍ଷତି। ୨୦୦୪ରେ ହୋଇଥିବା ଏହି ଆର୍ଥିକ ଅନିୟମିତା ୨୦୦୯-୧୦ ଆର୍ଥିକ ବର୍ଷରେ ହୋଇଥିବା ଅଡିଟ୍ରୁ ଧରାପଡ଼ିଥିଲା। ତେବେ ୧୪ ବର୍ଷ ତଳର ଉକ୍ତ ଅଡିଟ୍ ରିପୋର୍ଟକୁ କାଇଦା କରି ଚାପି ଦିଆଯାଇଥିଲା। ହେଲେ ୧୯ ବର୍ଷ ତଳର ଏହି ଘଟଣାରେ ରାଜ୍ୟ ସରକାର ବିଭାଗୀୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ପ୍ରକ୍ରିୟା ଆରମ୍ଭ କରିବା ପରେ ତତ୍କାଳୀନ ବଲାଙ୍ଗୀର ତହସିଲଦାର ତଥା ଏବେକାର ସୁବର୍ଣ୍ଣପୁର ଅତିରିକ୍ତ ଜିଲାପାଳ (ଏଡିଏମ୍) ସୂର୍ଯ୍ୟନାରାୟଣ ଦାଶଙ୍କ ଅଡୁଆ ବଢ଼ିଛି। ମୁଖ୍ୟମନ୍ତ୍ରୀଙ୍କ ଅନୁମୋଦନକ୍ରମେ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ସୁରେନ୍ଦ୍ର କୁମାର ଏ ନେଇ ସୁବର୍ଣ୍ଣପୁର ଜିଲାପାଳଙ୍କୁ ଗତ ଜୁଲାଇ ୧୭ରେ ଚିଠି ନଂ. ୨୦୭୨୩ ଅନୁଯାୟୀ ଏଡିଏମ୍ ଦାଶଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି। ଏହାର ନକଲ ବଲାଙ୍ଗୀର ଜିଲାପାଳ, ସମ୍ବଲପୁର ଉତ୍ତରାଞ୍ଚଳ ରାଜସ୍ବ ଆୟୁକ୍ତ, କଟକ ରାଜସ୍ବ ପର୍ଷଦ ସଚିବଙ୍କୁ ପଠାଯାଇଛି। ୧୯୬୨ ଓଡ଼ିଶା ସିଭିଲ ସର୍ଭିସ୍ (ସିସିଏ) ରୁଲସ୍ ୧୫ ଅନୁଯାୟୀ ସରକାରଙ୍କ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ଏହି ପଦକ୍ଷେପ ନେଇଛି।
ଅତିରିକ୍ତ ଜିଲାପାଳ ଦାଶଙ୍କ ବିରୋଧରେ ଡ୍ରାଫ୍ଟ ଚାର୍ଜ କରି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିମନ୍ତେ ବଲାଙ୍ଗୀର ଜିଲାପାଳ ଚଞ୍ଚଳ ରାଣା ପତ୍ର ସଂଖ୍ୟା ୧୫୯୧/୨୩।୫।୨୦୨୩ରେ ରାଜ୍ୟ ସରକାରଙ୍କୁ ସୁପାରିସ କରିଥିଲେ। ଏହାକୁ ସରକାର ଗ୍ରହଣ କରିବା ସହ ଏ ଦିଗରେ ଆବଶ୍ୟକ ପଦକ୍ଷେପ ନେବା ପାଇଁ ପ୍ରକ୍ରିୟା ଆରମ୍ଭ କରିଛନ୍ତି। ନିର୍ଦ୍ଦେଶ ଅନୁଯାୟୀ ସୁବର୍ଣ୍ଣପୁର ଜିଲାପାଳଙ୍କ ନିକଟରୁ ନୋଟିସପ୍ରାପ୍ତି ସ୍ବୀକାର କରିବାର ୧ ମାସ ମଧ୍ୟରେ ଏଡିଏମ୍ ଦାଶ ଲିଖିତ ଭାବେ ନିଜର ପକ୍ଷ ରଖିପାରିବେ। ନିଜର ପକ୍ଷ ରଖିବା ପାଇଁ ସେ ବଲାଙ୍ଗୀର ତହସିଲଦାରଙ୍କ କାର୍ଯ୍ୟାଳୟକୁ ଯାଇ ଆବଶ୍ୟକ ରେକର୍ଡ ଦେଖିପାରିବେ। ବଲାଙ୍ଗୀର ଜିଲାପାଳଙ୍କ ଅନୁମତିକ୍ରମେ ରେକର୍ଡ କପି ଆଣିପାରିବେ ବୋଲି ଚିଠିରେ ଉଲ୍ଲେଖ ରହିଛି।
ସୂଚନାଯୋଗ୍ୟ, ସୂର୍ଯ୍ୟନାରାୟଣ ଦାଶ ବଲାଙ୍ଗୀରରେ ୨୦୦୪ରୁ ୨୦୦୯ ପର୍ଯ୍ୟନ୍ତ ତହସିଲଦାର ଭାବେ କାର୍ଯ୍ୟରତ ଥିଲେ। ୨୦୦୪ରେ ଓଡ଼ିଶା ଭୂ ସଂସ୍କାର ଆଇନର ଧାରା ୮(କ) ଅନୁସାରେ ମକଦ୍ଦମା ଫଇସଲା କରିବାରେ ତାଙ୍କର ଢିଲା ପଣ ଓ କର୍ତ୍ତବ୍ୟରେ ଅବହେଳା କାରଣରୁ ସେତେବେଳେ ରାଜ୍ୟ ସରକାରଙ୍କ ୨ କୋଟି ୪୨ ଲକ୍ଷ ୬୬ ହଜାର ୧୧୭ ଟଙ୍କାର ରାଜସ୍ବ କ୍ଷତି ହୋଇଥିଲା। ୨୦୦୯-୧୦ ଅଡିଟ୍ ରିପୋର୍ଟରୁ ଏହି ଅନିୟମିତତା ଜଣାପଡ଼ିଥିଲା। ତେବେ ୧୪ ବର୍ଷ ତଳର ଉକ୍ତ ଅଡିଟ୍ ରିପୋର୍ଟକୁ ଚାପି ଦିଆଯାଇଥିଲା। ରାଜସ୍ବ ବିଭାଗର ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶ ପରେ ଜିଲାପାଳ ରାଣା ତତ୍କାଳୀନ ବଲାଙ୍ଗୀର ତହସିଲଦାର ସୂର୍ଯ୍ୟନାରାୟଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସୁପାରିସ କରିଥିଲେ। ଅନ୍ୟପଟେ ତହସିଲଦାର ପଦବୀରୁ ପଦୋନ୍ନତି ପାଇ ସୂର୍ଯ୍ୟନାରାୟଣ ଏବେ ଜଣେ ଏଡିଏମ୍। ଜଣେ ଅତିରିକ୍ତ ସଚିବ ପାହ୍ୟାର ଅଧିକାରୀଙ୍କ ପାଇଁ ୧୯ ବର୍ଷ ତଳର ଆର୍ଥତ୍କ ଅନିୟମିତତା ଅଡୁଆ ସୃଷ୍ଟି କରିଛି। କାରଣ ଦର୍ଶାଅ ନୋଟିସ ଜାରି ହୋଇଥିବାରୁ ଜୁଲାଇ ୧୭ ପରଠାରୁ ତଦନ୍ତ ନ ସରିବା ପର୍ଯ୍ୟନ୍ତ ତାଙ୍କୁ ବିଭାଗୀୟ ପଦୋନ୍ନତି ମିଳିବ ନାହିଁ। ସେହିପରି ଓଡ଼ିଶା ସିଭିଲ ସର୍ଭିସ (ସିସିଏ) ରୁଲସ୍ ୧୫ ଅନୁଯାୟୀ ସେ ଦୋଷୀ ସାବ୍ୟସ୍ତ ହେଲେ ସରକାର ତାଙ୍କଠାରୁ ରାଜସ୍ବ କ୍ଷତିର ମୂଳଧନ ସହିତ ବାର୍ଷିକ ୧୨% ସରଳ ସୁଧ ହାରରେ ପ୍ରାୟ ୭ କୋଟି ଅର୍ଥ ଆଦାୟ କରିପାରନ୍ତି। ସେହିପରି ପଦର ଅବନତି, ଇନ୍କ୍ରିମେଣ୍ଟ ବନ୍ଦ ସହ ନିୟମ ଅନୁଯାୟୀ ସରକାର ଅନ୍ୟାନ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ।