କଳିଙ୍ଗନଗର ୧୯ା୭ (ଡି.ଏନ୍.ଏ.):ବର୍ଷା ଭିଜା ରାତିରେ ଆଶ୍ରୟ ଦେବାକୁ ଡାକି ନେଇ ଜଣେ ଆଦିବାସୀ ନାବାଳିକା(୧୫)ଙ୍କୁ ବଳାତ୍କାର କରାଯାଇଛି। ତେବେ ଗଣବଳାତ୍କାରରୁ ବର୍ତ୍ତିବା ପାଇଁ ନାବାଳିକା ଜଣକ ଛାତରୁ ଡେଇଁ ଗୁରୁତର ଆହତ ହୋଇଛନ୍ତି। ଅନ୍ୟପକ୍ଷରେ ବଳାତ୍କାର କରିବା ପୂର୍ବରୁ ପୀଡ଼ିତାଙ୍କ ବଡ଼ଭାଇ(୧୭)ଙ୍କୁ ଅଭିଯୁକ୍ତମାନେ ନିସ୍ତୁକ ମାଡ଼ ମାରି ତଡ଼ି ଦେଇଥିଲେ। ଯାଜପୁର ଜିଲା କଳିଙ୍ଗନଗର ଶିଳ୍ପାଞ୍ଚଳରେ ରବିବାର ରାତିରେ ଘଟିଛି ଏହି ଘଟଣା।
ସୂଚନା ମୁତାବକ କେନ୍ଦୁଝର ଜିଲା ଆନନ୍ଦପୁର ଥାନା ତିଲଝରି ଅଞ୍ଚଳର ଅନାଥ ନାବାଳିକା ଏବଂ ତାଙ୍କ ବଡ଼ ଭାଇ ଟାଟା ଖଣି ଅଞ୍ଚଳରେ ବିବାହ କରିଥିବା ବଡ଼ ଭଉଣୀ ଘରକୁ ଯିବା ପାଇଁ ରବିବାର ସାରେ ଡୁବୁରି ଛକରେ ଗାଡ଼ିକୁ ଅପେକ୍ଷା କରିଥିଲେ। ତୁହାକୁତୁହା ପ୍ରବଳ ବର୍ଷା ହେଉଥିବାରୁ ଖଣି ଅଞ୍ଚଳକୁ ସେମାନେ ଗାଡ଼ି ପାଇ ନ ଥିଲେ। ଶେଷରେ ଚାଲି ଚାଲି ଯିବାକୁ ବାହାରିଥିବାବେଳେ ପଛରୁ ଅନୁସରଣ କରୁଥିବା କେତେଜଣ ଅସାମାଜିକ ଯୁବକ ସେମାନଙ୍କୁ ବାଟରେ ଅଟକାଇ ବିସ୍କୁଟ ଖାଇବାକୁ ଦେଇଥିଲେ। ଅସହାୟ ବୋଲି ଜାଣିବା ପରେ ସେମାନଙ୍କୁ ବାଟରେ ଥିବା ତିଳେଶ୍ୱର ଶିବମନ୍ଦିର ନିକଟରେ ଆଶ୍ରୟ
ନେବାକୁ ପ୍ରବର୍ତ୍ତାଇଥିଲେ। ଭାଇଭଉଣୀ ସେହି ଯୁବକମାନଙ୍କ କଥାମାନି ଶିବମନ୍ଦିର ନିକଟରେ ରହି ଯାଇଥିଲେ। ପରେ ରାତି ପ୍ରାୟ ୧୦ଟା ବେଳେ ଉକ୍ତ ଯୁବକମାନେ ପହଞ୍ଚି ପାଖରେ ଥିବା ଝୁମ୍ପାଣ ପ୍ରକଳ୍ପ ପ୍ରାଥମିକ ବିଦ୍ୟାଳୟକୁ ଚାଲ, ଆରାମରେ ରହିବ କହି ସେମାନଙ୍କୁ ଡାକି ନେଇଥିଲେ। ଭାଇଭଉଣୀ ସେମାନଙ୍କୁ ଭରସା କରି ସ୍କୁଲରେ ପହଞ୍ଚିବା ପରେ ଯୁବକମାନେ ନାବାଳିକାଙ୍କ ଭାଇଙ୍କୁ ନିସ୍ତୁକ ମାଡ଼ ମାରି ତଡ଼ି ଦେଇଥିଲେ। ପରେ ନାବାଳିକାକୁ ଛାତ ଉପରକୁ ଟେକି ନେଇ ଗଣବଳାତ୍କାର ଉଦ୍ୟମ କରିଥିଲେ। ନାବାଳିକା ଜଣକ ପ୍ରଥମ ବଳାତ୍କାରର ଶିକାର ହେବା ପରେ କୌଶଳ କ୍ରମେ ଖସିଯାଇ ଛାତରୁ ଡେଇଁ ପଡ଼ିଥିଲେ। ଅନ୍ୟପକ୍ଷରେ ତାଙ୍କ ଭାଇ ନିକଟସ୍ଥ ଗ୍ରାମ ଝୁମ୍ପାଣରେ ଖବର ଦେବାପରେ ଗ୍ରାମବାସୀ କଳିଙ୍ଗନଗର ପୋଲିସକୁ ଜଣାଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚତ୍ ଅନେକ ଖୋଜାଖୋଜି କରି ନାବାଳିକାଙ୍କୁ ଚେତାଶୂନ୍ୟ ଅବସ୍ଥାରେ ଏକ ଝାଟି ଜଙ୍ଗଲ ମଧ୍ୟରୁ ଉଦ୍ଧାର କରିଥିଲା। ଚିକିତ୍ସା ପାଇଁ ତାଙ୍କୁ ଟାଟା ମେଡିକା ହସ୍ପିଟାଲରେ ଭର୍ତ୍ତି କରାଯାଇଛି। ହେଲେ ନାବାଳିକା ଜଣକ ଛାତରୁ ଡେଇଁବା ପରେ ଗଣବଳାତ୍କାରର ଶିକାର ହୋଇଛନ୍ତି କି ନାହିଁ ସେନେଇ ପୋଲିସ ତଦନ୍ତ କରୁଛି। ଏହାସହ ରାତାରାତି ୫ ଅଭିଯୁକ୍ତଙ୍କୁ ଧରିଛି। ଏସ୍ପି ରାହୁଲ ପି.ଆର୍. ଘଟଣାସ୍ଥଳ ପରିଦର୍ଶନ କରିବା ସହ ପୀଡ଼ିତାଙ୍କଠାରୁ ତଥ୍ୟ ସଂଗ୍ରହ କରିଛନ୍ତି। ଡିଏସ୍ପି ପ୍ରମୋଦ ମଲିକ ଘଟଣାର ତଦନ୍ତ କରୁଛନ୍ତି।
ନାବାଳିକା ଅନାଥ ହୋଇଥିବାରୁ ଜିଲା ଶିଶୁ ମଙ୍ଗଳ କମିଟି ପକ୍ଷରୁ ସୋମବାର ରାତିରେ ଏତଲା ଦିଆଯାଇଛି। ରିପୋର୍ଟ ପ୍ରସ୍ତୁତି ସୁଦ୍ଧା ଥାନାରେ ମାମଲା ରୁଜୁ ହୋଇ ନ ଥିଲା। ପୋଲିସ ଧରିଥିବା ୫ ଜଣ ମଧ୍ୟରୁ ଜଣେ ନାବାଳକ ବୋଲି ଜଣାପଡ଼ିଛି। ନାବାଳକଙ୍କୁ ଛାଡ଼ି ଅନ୍ୟ ୪ ଅଭିଯୁକ୍ତମାନେ ହେଲେ ଝୁମ୍ପାଣ ଗ୍ରାମର ରଣଜିତ ମହାନ୍ତ, ବୁତୁରୁ ମହାନ୍ତ, ଦିନୁ ମହାନ୍ତଙ୍କ ସମେତ ଖରାଖାଇ ଗ୍ରାମର ରବି ବେହେରା। ସେମାନଙ୍କୁ ପୋଲିସ ପଚରାଉଚରା ଚଳାଇଛି।