ସୋସିଆଲ ମିଡିଆରେ ଏକ ଭିଡିଓ ତୀବ୍ର ବେଗରେ ଭାଇରାଲ ହେବାରେ ଲାଗିଛି। ଯାହାକୁ ଦେଖିଲେ ଚକିତ ହୋଇଯିବେ। ଏହି ଘଟଣା ପୂର୍ବ ଚାଇନାର ଜିଆଙ୍ଗସୁ ଜିଲାରେ ଘଟିଛି। ଏଠାକାର ହୁଇଆନ ସହରର ଜୁୟି କାଉଣ୍ଟିସ୍ଥିତ ୫ ମହଲା ବିଶିଷ୍ଟ କୋଠାରୁ ଏକ ଶିଶୁ ତଳକୁ ଖସି ପଡୁଥିବା ବେଳେ ଜଣେ ପଡ଼ୋଶୀ ହିରୋ ପରି କ୍ୟାଚ୍ କରି ନେଇ ତା’ର ଜୀବନ ବଞ୍ଚାଇଛନ୍ତି।
ଏକ ରିପୋର୍ଟ ଅନୁଯାୟୀ, ୯ ଜୁଲାଇରେ ଜଣେ ଦୁଇବର୍ଷର ଶିଶୁ ବେଡ୍ରୁମରେ ନିଜକୁ ଲକ୍ କରିଦେଇଥିଲା। ଏହା ପରେ ଶିଶୁଟି ଏକ ଷ୍ଟୁଲ୍ ପକାଇ ବେଡ୍ରୁମ୍ ବାହାର ଝରକା ପର୍ଯ୍ୟନ୍ତ ଆସିଥିଲା। ବାହାରିବା ସମୟରେ ଏସି ୟୁନିଟ୍ ନିକଟରେ ଝୁଲି ପଡ଼ିଥିଲା। ଏହା ଦେଖି ପଡ଼ୋଶୀ ଲି ଦିହାଇ ଶିଶୁଟିକୁ ବଞ୍ଚାଇବାକୁ ପ୍ରାଣପଣେ ଚେଷ୍ଟା କରିଥିଲେ। ଆଉ ୩ ଜଣ ଲୋକଙ୍କୁ ଡାକିଥିଲେ। ସେ ଭାବିଥିଲେ ଯଦି ପିଲାଟି ପଡ଼ିଯାଏ, ତେବେ ଖଣ୍ଡିଆଖାବରା ହେବ। ତେଣୁ ସେ ଏକ କମ୍ବଳ ଆଣିଥିଲେ। ପିଲାଟି ଗଳିପଡ଼ିବା ସମୟରେ ସେଥିରେ ତାକୁ କ୍ୟାଚ୍ କରିନେଇଥିଲେ।
ଲି ପିଲାଟିକୁ ଧରିବା ସମୟରେ ଆହତ ହୋଇଛନ୍ତି। ତାଙ୍କର ଏହି ସାହସିକତା ପାଇଁ ସ୍ଥାନୀୟ ଅଧିକାରୀମାନେ ପ୍ରଶଂସା କରିବା ସହ ସମ୍ମାନିତ ମଧ୍ୟ କରିଛନ୍ତି।