ନୂଆଦିଲ୍ଲୀ,୪।୧: ପ୍ରତିରକ୍ଷା କ୍ଷେତ୍ରରେ ରାଷ୍ଟ୍ରାୟତ୍ତ କମ୍ପାନୀ ଭାରତ ଆର୍ଥ ମୁଭର୍ସ ଲିମିଟେଡ(ବିଇଏମ୍ଏଲ୍)ରୁ ୨୬% ଅଂଶଧନ ବିକ୍ରି ହେବ। ସେହିଭଳି ସରକାର ଏହି କମ୍ପାନୀର ପରିଚାଳନା ଏବଂ ନିୟନ୍ତ୍ରଣକୁ ମଧ୍ୟ ହସ୍ତାନ୍ତର କରିବେ। ଏଥିପାଇଁ ରବିବାର ପ୍ରାଥମିକ ବିଡ୍ ସମ୍ପର୍କରେ ଘୋଷଣା କରାଯାଇଛି। ନିଲାମ ପ୍ରକ୍ରିୟା ୨ଟି ପର୍ଯ୍ୟାୟରେ ସମ୍ପାଦିତ ହେବ ବୋଲି ନିବେଶ ଏବଂ ରାଷ୍ଟ୍ରାୟତ୍ତ ସମ୍ପତ୍ତି ପରିଚାଳନା ବିଭାଗ(ଦୀପମ) ସଚିବ ତୁହିନକାନ୍ତ ପାଣ୍ଡେ ଏହା କହିଛନ୍ତି। ବିଇଏମ୍ଏଲ୍ରୁ ଅଂଶଧନ କ୍ରୟ ଲାଗି ବିଡର ମାର୍ଚ୍ଚ ୨ ସୁଦ୍ଧା ଏକ୍ସପ୍ରେଶନ ଅଫ୍ ଇଣ୍ଟରେଷ୍ଟ(ଇଓଆଇ) ଦାଖଲ କରିପାରିବେ। ଏଥି ଲାଗି ଦୀପମ ପକ୍ଷରୁ ପ୍ରାଥମିକ ସୂଚନା ମେମୋରାଣ୍ଡମ ଜାରି କରାଯାଇଛି।
ବର୍ତ୍ତମାନର ବଜାର ଦର ଅନୁସାରେ ୨୬% ଅଂଶଧନ ବିକ୍ରିରୁ ସରକାରଙ୍କୁ ୧ ହଜାର କୋଟି ଟଙ୍କାର ରାଜସ୍ବ ମିଳିବ। ଶୁକ୍ରବାର ବିଇଏମ୍ଏଲ୍ର ପ୍ରତି ଶେୟାର ମୂଲ୍ୟ ପ୍ରାୟ ୯୭୪ ଟଙ୍କା ରହିଥିଲା। ବିଇଏମ୍ଏଲ୍ ପ୍ରତିରକ୍ଷା, ରେଳ, ଶକ୍ତି, ଖଣି ଏବଂ ଭିତ୍ତିଭୂମି ଭଳି କ୍ଷେତ୍ରରେ କାର୍ଯ୍ୟ କରୁଛି। ୨୦୧୯-୨୦ରେ ଏହି କମ୍ପାନୀର ମୋଟ ରାଜସ୍ବ ୩୦୨୮ କୋଟି ଟଙ୍କା ରହିଥିଲା। ଏହି ନିଲାମ ପ୍ରକ୍ରିୟା ସମ୍ପାଦନ କରିବା ଲାଗି ସରକାରଙ୍କ ପକ୍ଷରୁ ଏସ୍ବିଆଇ କ୍ୟାପିଟାଲ ମାର୍କେଟ ପକ୍ଷରୁ ପରାମର୍ଶଦାତା ଭାବେ ନିଯୁକ୍ତ କରାଯାଇଛି। ପ୍ରସ୍ତାବିତ ବିନିବେଶ ପ୍ରକ୍ରିୟାକୁ ଏହା ପରିଚାଳନା କରିବ। ବିଇଏମ୍ଏଲ୍ ନିକଟରେ ୯୭୭୫ କୋଟି ଟଙ୍କାର ଅର୍ଡର ରହିଛି। ଏହି କମ୍ପାନୀରେ ସରକାରଙ୍କ ଅଂଶଧନ ୫୪% ରହିଛି। ଏଥିରୁ ୨୬% ହ୍ରାସ କରିବାକୁ ସରକାର ଯୋଜନା ରଖିଛନ୍ତି।