ଆନନ୍ଦପୁର,୮ା୭(ସନ୍ତୋଷ ରାଉତ): ନିଜର ୩ ବର୍ଷର ଝିଅକୁ ଭରା ନଦୀ ଗର୍ଭକୁ ଫିଙ୍ଗି ହତ୍ୟାକରିବା ଘଟଣାର ଦୀର୍ଘ ୧୦ ବର୍ଷ ପରେ ହତ୍ୟାକାରୀ ଅଭିଯୁକ୍ତ ବାପା କ୍ରାଇମ୍ବ୍ରାଞ୍ଚ ହାତରେ ଗିରଫ ହୋଇଥିଲେ। ଶନିବାର ଅଭିଯୁକ୍ତ ବାପାଙ୍କୁ ରିମାଣ୍ଡରେ ଆଣି କ୍ରାଇମ ବ୍ରାଞ୍ଚ ପକ୍ଷରୁ କ୍ରାଇମ୍ ସିନ୍ ରିକ୍ରିଏସନ୍ କରାଯାଇଛି। ଅଭିଯୁକ୍ତ ବାପା ଘଟାଇଥିବା ହତ୍ୟାକାଣ୍ଡର ସମସ୍ତ ବିବରଣୀ କ୍ରାଇମ ବ୍ରାଞ୍ଚ ନିକଟରେ ଓଗାଳିଛନ୍ତି।
ଆନନ୍ଦପୁର ଥାନା ଫକୀରପୁର ଗ୍ରାମର ପ୍ରଶାନ୍ତ ସାହାଣୀଙ୍କୁ ନିଜ ୩ବର୍ଷର ଝିଅକୁ ହତ୍ୟା କରିବାର ୧୦ ବର୍ଷ ପରେ କ୍ରାଇମ ବ୍ରାଞ୍ଚ ମହାରାଷ୍ଟ୍ରର ମୁରଦାବାଦ ଅଞ୍ଚଳରୁ ଗିରଫ କରିବା ପରେ ଚଳିତ ମାସ ୨ ତାରିଖ ଆନନ୍ଦପୁର ଏସ୍ଡିଜେଏମଙ୍କ କୋର୍ଟରେ ହାଜର କରାଇଥିଲା। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଆନନ୍ଦପୁର ବିଚାର ବିଭାଗୀୟ ହାଜତକୁ ପଠାଯାଇଥିଲା। ଶନିବାର କ୍ରାଇମ୍ ବ୍ରାଞ୍ଚ ଅଭିଯୁକ୍ତଙ୍କୁ ରିମାଣ୍ଡରେ ଆଣି ନିଜ ଗ୍ରାମ ଫକୀରପୁରକୁ ନେଇଥିଲା। ସେଠାରେ ଅଭିଯୁକ୍ତ ବାପା ହତ୍ୟାକାଣ୍ଡ ଘଟଣାର ଡେମୋ ଦେଖାଇଥିଲେ।
ଅଭିଯୁକ୍ତ ବାପା ପ୍ରଶାନ୍ତ ୨୦୧୩ ଅଗଷ୍ଟ ମାସ ୧୮ରେ ପାରିବାରିକ କଳହକୁ କେନ୍ଦ୍ର କରି ନିଜର ୩ ବର୍ଷର ଝିଅକୁ ଉଛୁଳା ବୈତରଣୀ ନଦୀରେ କାଠ ଭେଳା ଦେଖାଇଥିଲେ। ଝିଅ କାହିଁ କହିବାରୁ ତାକୁ ଉଛୁଳା ପାଣିରେ ଛାଡ଼ି ଦେଇଥିଲେ। ପରେ ୫୩ନଂ ରାଜ୍ୟ ରାଜପଥର ତରତରା ଛକରୁ ଭଦ୍ରକ ଓ ସେଠାରୁ ଫେରାର ହୋଇଯାଇଥିଲେ। ଘଟଣାକୁ ନେଇ ପ୍ରଶାନ୍ତଙ୍କ ସ୍ତ୍ରୀ ପୂଜା ଆନନ୍ଦପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୁକ୍ତଙ୍କ ସ୍ତ୍ରୀ ପୂଜାଙ୍କ ଅଭିଯୋଗ କ୍ରମେ ୧୨୫/୧୩ରେ ଆନନ୍ଦପୁର ଥାନାରେ ମାମଲା ରୁଜୁ ହୋଇଥିଲେ ବି ଆନନ୍ଦପୁର ପୋଲିସର କାର୍ଯ୍ୟଧାରାରେ ଅସନ୍ତୋଷ ବ୍ୟକ୍ତ କରି ପୂଜା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପରେ ମାମଲା କ୍ରାଇମବ୍ରାଞ୍ଚ ହାତକୁ ଆସିଥିଲା। ଦୀର୍ଘ ୧୦ ବର୍ଷ ପରେ କ୍ରାଇମବ୍ରାଞ୍ଚ ପକ୍ଷରୁ ଅଭିଯୁକ୍ତ ବାପା ପ୍ରଶାନ୍ତଙ୍କୁ ମହାରାଷ୍ଟ୍ରର ମୁରଦାବାଦରୁ ଗିରଫ କରିବାରେ ସଫଳ ହୋଇଛି। ଅଭିଯୁକ୍ତର ପାନ୍ ନଂ ଓ ଆଧାର ନଂ ଏବଂ ଆକାଉଣ୍ଟକୁ ଆଧାର କରି ଅଭିଯୁକ୍ତଙ୍କୁ ଗିରଫ କରାଯାଇଥିବା କ୍ରାଇମ ବ୍ରାଞ୍ଚ ଇନ୍ସପେକ୍ଟର ଦେବୀପ୍ରସାଦ ଦାସ ସୂଚନା ଦେଇଛନ୍ତି।