ଭୁବନେଶ୍ୱର, ୨୬ା୧୨(ବ୍ୟୁରୋ): ବ୍ରିଟେନ୍ରୁ ଓଡ଼ିଶା ଫେରିଥିବା ଜଣେ ୪ବର୍ଷର ଶିଶୁକନ୍ୟା କୋଭିଡ୍ ପଜିଟିଭ ଚିହ୍ନଟ ହୋଇଛନ୍ତି। ଏ ସମ୍ପର୍କରେ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ଶୁକ୍ରବାର ସୂଚନା ଦିଆଯିବା ପରେ ସହରରେ ଆତଙ୍କ ଖେଳିଯାଇଛି। ତେବେ ଆକ୍ରାନ୍ତ ଶିଶୁଙ୍କୁ ଚିକିତ୍ସା ପାଇଁ ଭୁବନେଶ୍ୱରସ୍ଥିତ ସରକାରୀ କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କଠାରେ କୋଭିଡ୍ ଭୂତାଣୁର ନୂଆ ଷ୍ଟ୍ରେନ୍ ଅଛି କି ନାହିଁ ତାହା ଜାଣିବାକୁ ସ୍ବାବ୍ ପରୀକ୍ଷା ପାଇଁ ପୁଣେସ୍ଥିତ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିକୁ ପଠାଯାଇଛି। ଗତ ୨୦ ତାରିଖରେ ଆକ୍ରାନ୍ତ ଶିଶୁ ପରିବାର ସହ ଓଡ଼ିଶାରେ ପହଞ୍ଚତ୍ଥିଲେ। ବର୍ତ୍ତମାନ ତାଙ୍କ ପରିବାର ଭୁବନେଶ୍ୱରର ଦକ୍ଷିଣ-ପୂର୍ବ ଜୋନ୍ରେ ରହୁଥିବାବେଳେ ମା’ ଓ ବାପାଙ୍କ ସ୍ବାବ୍ ନମୁନା ନେଗେଟିଭ ଆସିଛି। ଏହା ପୂର୍ବରୁ ଅର୍ଥାତ୍ ବୁଧବାର ଭୁବନେଶ୍ୱରର ୩୪ ବର୍ଷୀୟ ବ୍ରିଟେନ୍ ଫେରନ୍ତା ପଜିଟିଭ ଚିହ୍ନଟ ହେବା ପରେ ତାଙ୍କୁ କୋଭିଡ୍ ହସ୍ପିଟାଲରେ ରଖାଯାଇ ଚିକିତ୍ସା କରାଯାଉଛି। ୧୪ ଦିନ ଭିତରେ ଆସିଥିବା ବ୍ରିଟେନ୍ ଫେରନ୍ତାଙ୍କ ମଧ୍ୟରେ ସେ ପ୍ରଥମ ଆକ୍ରାନ୍ତ ଥିଲେ। ଅନ୍ୟମାନଙ୍କୁ ଚିହ୍ନଟ ପାଇଁ କଣ୍ଟାକ୍ଟ ଟ୍ରେସିଙ୍ଗ୍ ଜାରି ରହିଥିବାବେଳେ ସଂସ୍ପର୍ଶରେ ଆସିଥିବା ସମସ୍ତ ଲୋକଙ୍କ ସ୍ବାବ୍ ସଂଗ୍ରହ କରାଯାଉଥିବା ବିଏମ୍ସି ପକ୍ଷରୁ ସୂଚନା ଦିଆଯାଇଛି।
ବ୍ରିଟେନ୍ରେ ଏବେ କରୋନା ଭୂତାଣୁର ନୂଆ ଷ୍ଟ୍ରେନ୍ ଭୟଙ୍କର ରୂପ ନେଉଥିବାରୁ କେନ୍ଦ୍ର ସରକାରଙ୍କ ସତର୍କତା ପରେ ରାଜ୍ୟ ସରକାର ଏହାକୁ ଗୁରୁତ୍ୱର ସହ ଗ୍ରହଣ କରି ତ୍ୱରିତ ପଦକ୍ଷେପ ଆରମ୍ଭ କରିଛନ୍ତି। ଗତ ୧୪ ଦିନରେ ବ୍ରିଟେନ୍ରୁ ଓଡ଼ିଶା ଫେରିଥିବା ୪୩ ଜଣଙ୍କ ବିବରଣୀ ରାଜ୍ୟ ସ୍ବାସ୍ଥ୍ୟ ବିଭାଗ ଦେଇଛନ୍ତି। ଏମାନଙ୍କ ମଧ୍ୟରୁ ୩୫ ପୁରୁଷ ଓ ୮ଜଣ ମହିଳା ରହିଛନ୍ତି। ଭୁବନେଶ୍ୱରରୁ ସର୍ବାଧିକ ୨୧ଜଣ ବ୍ରିଟେନ୍ ଫେରନ୍ତା ରହିଥିବାବେଳେ କଟକରୁ ୫, କୋରାପୁଟ ୩, ବ୍ରହ୍ମପୁର ୩, ନୟାଗଡ଼ ଓ ନବରଙ୍ଗପୁରରୁ ୨ଜଣ ଲେଖାଏ ରହିଛନ୍ତି। ସେହିପରି କେନ୍ଦ୍ରାପଡ଼ା, ଜଗତ୍ସିଂହପୁର, ସମ୍ବଲପୁର, ଖୋର୍ଦ୍ଧା, ପୁରୀ, ଯାଜପୁର ଓ ବଲାଙ୍ଗୀରରୁ ଜଣେ ଲେଖାଏ ବ୍ରିଟେନ୍ ଫେରନ୍ତା ଥିବା ସୂଚନା ଦିଆଯାଇଛି। ତେବେ ଭୁବନେଶ୍ୱରରେ ସବୁଠାରୁ ଅଧିକ ବ୍ରିଟେନ୍ ଫେରନ୍ତା ଥିବାରୁ ଜାରି ନୂଆ ଗାଇଡ୍ଲାଇନ୍ ଅନୁସାରେ ବିଏମ୍ସି ପକ୍ଷରୁ ଆର୍ଟି-ପିସିଆର୍ ଟେଷ୍ଟ ସହ କଣ୍ଟାକ୍ଟ ଟ୍ରେସିଂ ଓ ଆବଶ୍ୟକ ପଦକ୍ଷେପ ଗ୍ରହଣ କରାଯାଉଛି। ସେହିଭଳି ବିମାନ ବନ୍ଦରରେ ଯାଞ୍ଚକୁ କଡ଼ାକଡ଼ି କରାଯାଇଛି। ସ୍କ୍ରିନିଂ ସହ ଆବଶ୍ୟକ ହେଲେ ଆର୍ଟି-ପିସିଆର୍ ଟେଷ୍ଟ ମଧ୍ୟ କରାଯାଉଥିବା ଜଣାପଡିଛି।