ନୂଆଦିଲ୍ଲୀ,୨୭ା୧୦: ନୂଆ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ବୁଧବାର ଦାୟିତ୍ୱ ନେବା ପରେ ଏକ ୪୭ ଜଣିଆ ଷ୍ଟିୟରିଂ କମିଟି ଗଠନ କରିଛନ୍ତି। ଏଥିରେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ସମେତ ଦୁଇ ପୂର୍ବତନ ଅଧ୍ୟକ୍ଷ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କୁ ରଖାଯାଇଛି। ଓଡ଼ିଶାର ଭକ୍ତଚରଣ ଦାସଙ୍କୁ ମଧ୍ୟ ଏହି ଗୁରୁତ୍ୱପୂର୍ଣ୍ଣ କମିଟିରେ ସ୍ଥାନ ମିଳିଛି। କିନ୍ତୁ କଂଗ୍ରେସ ଅଧ୍ୟକ୍ଷ ନିର୍ବାଚନରେ ଖାର୍ଗେଙ୍କ ପ୍ରତିଦ୍ୱନ୍ଦ୍ୱୀ ଭାବେ ଲଢ଼ି ହାରିଥିବା ବରିଷ୍ଠ ନେତା ଶଶୀ ଥରୁର୍ଙ୍କୁ ସ୍ଥାନ ମିଳିନାହିଁ।
ଖାର୍ଗେଙ୍କ ଅଧ୍ୟକ୍ଷତାରେ ନବଗଠିତ ଅନ୍ତରୀଣ କମିଟି ଦଳର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ କଂଗ୍ରେସ ଓ୍ବାର୍କିଂ କମିଟି (ସିଡବ୍ଲ୍ୟୁସି)ର ସ୍ଥାନ ନେବ। ଏକ ନୂଆ ସିଡବ୍ଲ୍ୟୁସି ଗଠନ ହେବା ଯାଏ ଏହା କାର୍ଯ୍ୟ କରିବ। ଗତ ସିଡବ୍ଲ୍ୟୁସିର ଅଧିକାଂଶ ସଦସ୍ୟଙ୍କୁ ଏଥିରେ ସାମିଲ କରଯାଇଛି। ସିଡବ୍ଲ୍ୟୁସିର ସମସ୍ତ ସଦସ୍ୟ ଓ ଦଳର ପଦାଧିକାରୀ କଂଗ୍ରେସର ନୂଆ ମୁଖିଆ ତାଙ୍କ ନୂଆ ଟିମ୍ ଗଠନ ଲାଗି ନିଜ ନିଜ ଇସ୍ତଫାପତ୍ର ପ୍ରଦାନ କରିଥିଲେ।
ଖାର୍ଗେ ନିଜ ନୂଆଟିମ୍ରେ ପ୍ରିୟଙ୍କା ଗାନ୍ଧୀ ଭଦ୍ରା, ଏ.କେ. ଆଣ୍ଟୋନି, ଅମ୍ବିକା ସୋନି, ଆନନ୍ଦ ଶର୍ମା, କେ.ସି. ବେଣୁଗୋପାଳ, ରଣଦୀପ ସିଂ ସୂର୍ଯ୍ୟଓ୍ବୋଲା ଓ ଦିଗ୍ବିଜୟ ସିଂଙ୍କୁ ରଖିଛନ୍ତି। ଭାରତୀୟ ଜାତୀୟ କଂଗ୍ରେସର ସମ୍ବିଧାନ ଅନୁଚ୍ଛେଦ ୧୫ (ଖ) ଅନୁସାରେ କଂଗ୍ରେସ ଅଧ୍ୟକ୍ଷ ଷ୍ଟିୟରିଂ କମିଟି ଗଠନ କରିଛନ୍ତି, ଯାହାକି ସିଡବ୍ଲ୍ୟୁସି ବଦଳରେ କାର୍ଯ୍ୟ କରିବ ବୋଲି ବେଣୁଗୋପାଳ ଏକ ବିବୃତିରେ ସୂଚନା ଦେଇଛନ୍ତି। ପ୍ରଦେଶ କଂଗ୍ରେସ କମିଟି (ପିସିସି) ପ୍ରତିନିଧିମାନଙ୍କୁ ନେଇ ସିଡବ୍ଲ୍ୟୁସିର ପରବର୍ତ୍ତୀ ଅଧିବେଶନ ଆସନ୍ତା ମାର୍ଚ୍ଚରେ ହୋଇପାରେ।
