ଓ୍ବାଶିଂଟନ: ନିମନ୍ତ୍ରିତ ଅତିଥିମାନେ ବିବାହ ଭୋଜିରେ ଯୋଗଦେବା ସାଧାରଣ କଥା। କିଛି ଲୋକ କେବଳ ଖାଦ୍ୟ ଲୋଭରେ ବିବାହ ଭୋଜିକୁ ଆସିଥାନ୍ତି। ଏହି ବିଷୟରେ ଅନେକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିବା ବି ଦେଖିଥିବେ। ମାତ୍ର କେବେ ଭାବିଛନ୍ତି କିମ୍ବା ଦେଖିଛନ୍ତି ଏକ ଭାଲୁ ମଧ୍ୟ ବିବାହ ଭୋଜିକୁ ଆସି ଖାଦ୍ୟ ଖାଇବାର। ଆମେରିକାର ଏକ ବିବାହ ଉତ୍ସବରେ ଏମିତି ଅଜବ ଦୃଶ୍ୟ ଦେଖିବାକୁ ମିଳିଥିଲା। ଯେଉଁଠାରେ ଏକ ଭାଲୁ ବିବାହରେ ପ୍ରବେଶ କରି ଅତିଥିମାନଙ୍କ ସାମ୍ନାରେ ସେମାନଙ୍କ ପାଇଁ ପ୍ରସ୍ତୁତ ମିଠା ସବୁ ଖାଇଦେଲା।
ନିକଟରେ ବ୍ରେଣ୍ଡନ ମାର୍ଟିନେଜ ଏବଂ କେଲିନ ମ୍ୟାକ୍ରୋସି-ମାର୍ଟିନେଜ କଲରାଡୋର ବୋଲ୍ଡର୍ କାଉଣ୍ଟିରେ ବିବାହ କରିଥିଲେ। ମାର୍ଟିନେଜ ଏହି ବିବାହ ସହ ଜଡ଼ିତ ଅନେକ ଫଟୋ ଫେସ୍ବୁକ୍ରେ ପୋଷ୍ଟ କରିଛନ୍ତି। ଯେଉଁଥିରେ ସେ ଏବଂ ତାଙ୍କ ସ୍ବାମୀ ବିବାହ କରିଥିବା ନଜର ଆସିଛନ୍ତି। କିନ୍ତୁ ଗୋଟିଏ ଫଟୋ ସବୁଠାରୁ ଚକିତକର ବିଷୟ। ଏହି ଫଟୋରେ, ଭାଲୁ ବିବାହ ସ୍ଥାନ ଭିତରେ ରହିଥିବା ଦେଖିବାକୁ ମିଳିଛି।
ଫଟୋ ପୋଷ୍ଟ କରି ସେ କ୍ୟାପଶନ ଲେଖିଛନ୍ତି, ଶେଷରେ ଏକ ଭାଲୁ ଆମର ମିଠା ଖାଇଲା। ଫଟୋରେ ଭାଲୁ ଏକ ଟେବୁଲ ଉପରେ ବସି ଖୁସିରେ ମିଠା ଖାଉଥିବା ଦେଖିବାକୁ ମିଳିଛି । ଏହା ସ୍ପଷ୍ଟ ଯେ କେହି ଭାଲୁ ନିକଟକୁ ଯିବାକୁ ସାହସ କରିନାହାନ୍ତି। କାରଣ ଏହି ସ୍ଥାନଟି ସମ୍ପୂର୍ଣ୍ଣ ଖାଲି ଦେଖାଯାଉଛି।
ଏକ ରିପୋର୍ଟ ଅନୁଯାୟୀ, ହାଇସ୍କୁଲ ଦିନରୁ ଏହି ଦୁଇ କପଲ ପରସ୍ପରକୁ ଭଲ ପାଉଥିଲେ। ସେମାନଙ୍କ ବିବାହ ସମୟରେ ଏତେ ବର୍ଷା ହେଉଥିଲା ଯେ, ସେମାନଙ୍କୁ ଛତା ତଳେ ଠିଆ ହୋଇ ବିବାହ କରିବାକୁ ପଡ଼ିଲା। ଏହା ପରେ ଭାଲୁ ସହ ଏହି ଘଟଣା ଘଟିଥିଲା। ଯେଉଁ କାରଣରୁ ବିବାହଟି ସମ୍ପୂର୍ଣ୍ଣ ସ୍ମରଣୀୟ ହୋଇରହିଗଲା।
ନବଦମ୍ପତି କହିଛନ୍ତି, ତୁରନ୍ତ କର୍ମଚାରୀମାନେ ଆସି ପହଞ୍ଚି ଭାଲୁକୁ ଗୋଡ଼ାଇଥିଲେ। ଯେପରି କାହାରି କିଛି କ୍ଷତି ନ ହୁଏ। କନ୍ୟା କହିଛନ୍ତି, ଭାଲୁଟି ପୂରା ଟେବୁଲରେ ଥିବା ପ୍ଲେଟ୍କୁ ଚାଟି ସଫା କରିଦେଇଛି। ସେମାନେ କେବଳ ଏହି ଦୃଶ୍ୟ ଦେଖୁଥିଲେ। ଭିଡିଓଟି ସୋସିଆଲ ମିଡିଆରେ ଭାଇରାଲ ହେଉଛି।