ଉମରକୋଟ, ୨୫।୧(ସ୍ବ.ପ୍ର.): ଦୀର୍ଘ ୩୨ ଘଣ୍ଟା ପରେ ଜଙ୍ଗଲୀ ଭାଲୁକୁ ଗଛ ଉପରୁ ତଳକୁ ଆଣିଲା ବନ ବିଭାଗ। ଭାଲୁଟିକୁ ଟ୍ରାଙ୍କୁଲାଇଜ୍ କରି ତଳକୁ ଓହ୍ଲାଯାଇଛି। ସୋମବାର ବିଳମ୍ବିତ ରାତିରେ ଭାଲୁଟିକୁ ଜଙ୍ଗଲରେ ଛଡ଼ାଯିବ ବୋଲି ଜଣାପଡିଛି।
ନବରଙ୍ଗପୁର ଜିଲା ଉମରକୋଟ ବ୍ଲକ ସୁନାବେଡ଼ା ପଞ୍ଚାୟତର ବଙ୍ଗୀୟ ଗ୍ରାମ ନାୟକଗୁଡାକୁ ଖାଦ୍ୟ ଅନ୍ବେଷଣରେ ଏକ ଭାଲୁ ଶନିବାର ରାତିରେ ପଶି ଆସିଥିଲା। ସକାଳ ହେବାରୁ ଭାଲୁଟି ଗଛ ଉପରକୁ ଚଢ଼ିଯାଇଥିଲା। ଗ୍ରାମବାସୀ ବନ ବିଭାଗକୁ ଖବର ଦେଇଥିଲେ। ରବିବାରଠାରୁ ବନ ବିଭାଗ ଭାଲୁଟିକୁ ସେଠାରେ ଜଗି ରହିଥିଲା। ପ୍ରଥମେ ଉକ୍ତ ଅଞ୍ଚଳକୁ ଜନଶୂନ୍ୟ କରାଯାଇଥିଲା। ପରେ ଭାଲୁର ପ୍ରିୟ ଖାଦ୍ୟ ଗୁଡ଼, ମହୁଲ, କଦଳୀ ଓ ମହୁକୁ ଗଛତଳେ ରଖାଯାଇଥିଲା। ଏହାସତ୍ତ୍ୱେ ଭାଲୁଟି ତଳକୁ ଆସିବା ନାଁ ଧରି ନ ଥିଲା। ରବିବାର ରାତିତମାମ ନେଟ୍ ବାନ୍ଧି ବନ ବିଭାଗ କର୍ମଚାରୀ ସେଠାରେ ଜଗି ବସିଥିଲେ। ତଥାପି ଭାଲୁଟି ତଳକୁ ଆସିଲା ନାହିଁ। ଉମରକୋଟ ବନାଞ୍ଚଳ ଅଧିକାରୀ ପୂର୍ଣ୍ଣଚନ୍ଦ୍ର ନାୟକ ଭାଲୁକୁ ଟ୍ରାଙ୍କୁଲାଇଜ କରିବାକୁ ନିର୍ଦ୍ଦେଶ ଦେଇଥିଲେ। ନବରଙ୍ଗପୁର ଜିଲାର ହିଂସ୍ର ଜନ୍ତୁ ଉଦ୍ଧାରକାରୀ ଦଳର ମୁଖ୍ୟଙ୍କ ସମେତ ୪୫ ଜଣ ବନ କର୍ମଚାରୀଙ୍କୁ ନେଇ ଏକ ଟିମ୍ ଗଠନ କରାଯାଇଥିଲା। ଗଛତଳେ ଜାଲ ବାନ୍ଧିବା ପରେ ବନ ବିଭାଗ କର୍ମଚାରୀ ଭାଲୁକୁ ଟ୍ରାଙ୍କୁଲାଇଜ୍ କରିଥିଲେ। ଏହାପରେ ବନ ବିଭାଗର ଜଣେ କର୍ମଚାରୀ ଗଛରେ ଚଢ଼ି ଭାଲୁକୁ ତଳକୁ ଓହ୍ଲାଇବା ବ୍ୟବସ୍ଥା କରିଥିଲେ। ଭାଲୁଟି ସୁସ୍ଥ ଅଛି। ଚେତା ଆସିବା ପରେ ତାକୁ ଖାଇବାକୁ ଦିଆଯାଇଛି ବୋଲି ଉମରକୋଟ ରେଞ୍ଜର ପୂର୍ଣ୍ଣଚନ୍ଦ୍ର ନାୟକ ସୂଚନା ଦେଇଛନ୍ତି।