ନୂଆଦିଲ୍ଲୀ,୨୦।୩: ଜମ୍ମୁକଶ୍ମୀରରେ ଭାଜପା-ପିଡିପି ସରକାରର ପୂର୍ବତନ ମନ୍ତ୍ରୀ ତଥା ଦୁଇଥର କଂଗ୍ରେସ ଏମ୍ପି ଚୌଧୁରୀ ଲାଲ ସିଂ ପ୍ରାୟ ୧୦ ବର୍ଷ ପରେ ବୁଧବାର କଂଗ୍ରେସକୁ ଫେରିଛନ୍ତି। ନୂଆଦିଲ୍ଲୀରେ ସେ କଂଗ୍ରେସ ନେତା ପୱନ ଖେଡା, ଭାରତ ସିଂ ସୋଲାଙ୍କି, କଂଗ୍ରେସ ରାଜ୍ୟ ସଭାପତି ବିକାଶ ରସୁଲ ୱାନିଙ୍କ ସମେତ ବରିଷ୍ଠ ନେତାଙ୍କ ଉପସ୍ଥିତିରେ ଦଳରେ ଯୋଗ ଦେଇଥିଲେ।
କଂଗ୍ରେସ ନେତା ମଲ୍ଲିକାର୍ଜୁନ ଖାର୍ଗେ, ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ତରଫରୁ କଂଗ୍ରେସ ନେତା ପୱନ ଖେଡା ଲାଲ ସିଂଙ୍କୁ ଦଳରେ ସ୍ବାଗତ କରିଛନ୍ତି। ଲାଲ ସିଂଙ୍କ ଦଳକୁ ଫେରିବା ରାଜ୍ୟରେ କଂଗ୍ରେସକୁ ମଜଭୁତ କରିବ। ଚୌଧୁରୀ ଲାଲ ସିଂ ଦଳକୁ ଫେରିବା ପରେ କଂଗ୍ରେସ ନେତାମାନଙ୍କୁ କୃତଜ୍ଞତା ଜଣାଇଛନ୍ତି। ସେ ଇସାରାରେ ଉଧମପୁର ଆସନରୁ ଲଢିବାବିଷୟରେ ମଧ୍ୟ କହିଥିଲେ। ଲାଲ ସିଂ କହିଛନ୍ତି, ମୁଁ ଯେଉଁ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛି ସେହି ଆସନରୁ ଭାଜପା ସ୍ବପ୍ନ ଦେଖୁଛି।ସ୍
ଚୌଧୁରୀ ଲାଲ ସିଂ ଛାତ୍ର ନେତା ଭାବରେ ରାଜନୀତି ଆରମ୍ଭ କରିଥିଲେ। ସେ ଦୁଇଥର ବିଧାୟକ ଏବଂ ଏମ୍ପି ହୋଇଛନ୍ତି। ୧୯୯୬ରେ ପ୍ରଥମ ଥର ପାଇଁ ସେ କଂଗ୍ରେସ ଟିକେଟରେ କାଥୁଆର ବସୋହଲି ଆସନରୁ ବିଧାୟକ ହୋଇଥିଲେ। ୨୦୦୨ରେ ମଧ୍ୟ ସେ ଏଠାରୁ ଜିତି ପିପୁଲ୍ସ ଡେମୋକ୍ରାଟିକ ପାର୍ଟି ଏବଂ କଂଗ୍ରେସର ମିଳିତ ସରକାରରେ ସ୍ବାସ୍ଥ୍ୟମନ୍ତ୍ରୀ ହୋଇଥିଲେ।
ଏହା ପରେ ଲାଲ ସିଂ ୨୦୦୪ ଏବଂ ୨୦୦୯ରେ ଉଧମପୁର ଆସନରୁ ଜିତି ଲୋକ ସଭାରେ ପହଞ୍ଚିଥିଲେ। ୨୦୧୪ରେ କଂଗ୍ରେସରୁ ଟିକେଟ ନ ପାଇ ସେ କଂଗ୍ରେସ ସହ ସମ୍ପର୍କ ଭାଙ୍ଗିଥିଲେ। ଏହା ପରେ ସେ କାଥୁଆରେ ଏକ କାର୍ଯ୍ୟକ୍ରମରେ ତତ୍କାଳୀନ ଭାଜପା ସଭାପତି ଅମିତ ଶାହାଙ୍କ ଉପସ୍ଥିତିରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ।
