ଅମରାବତୀ,୩୦।୮: ଓ୍ବାଇଏସଆର କଂଗ୍ରେସକୁ ଲାଗିଛି ବଡ଼ ଝଟ୍କା। ଦଳରୁ ୨ଜଣ ରାଜ୍ୟ ସଭା ଏମପି ଇସ୍ତଫା ଦେଇଛନ୍ତି। ଜଗନ ମୋହନ ରେଡ୍ଡୀ ନେତୃତ୍ୱଙ୍କ ପାର୍ଟିର ୨ଜଣ ଏମପି ପାର୍ଟି ଓ ରାଜ୍ୟ ସଭା ସଦସ୍ୟତାରୁ ଇସ୍ତଫା ଦେଇଛନ୍ତି। ଉପରାଷ୍ଟ୍ରପତି ତଥା ରାଜ୍ୟ ସଭା ଅଧ୍ୟକ୍ଷ ଜଗଦୀପ ଧନଖର ତାଙ୍କ ଇସ୍ତଫା ପତ୍ର ଗ୍ରହଣ କରିଛନ୍ତି।
YSRCP ଭେଙ୍କଟ ରମଣ ଓ ବେଦା ମସ୍ତାନ ରାବ ପାର୍ଟି ଛାଡିଛନ୍ତି। ବେଦାଙ୍କ ରାଜ୍ୟ ସଭା କାର୍ଯ୍ୟକାଳ ଜୁନ ୨୦୧୬ପର୍ଯ୍ୟନ୍ତ ଥିଲା। ଶିଳ୍ପପତି ତଥା ରାଜ୍ୟ ସଭା ସଦସ୍ୟ ବେଦା ମସ୍ତାନ ରାଓ ମଧ୍ୟ ଦଳ ଛାଡିବାକୁ ନିଷ୍ପତ୍ତି ନେଇଛନ୍ତି। ଏହି ଦୁଇଜଣ ଏମପି ଟିଡିପିରେ ଯୋଗଦେବାର ସମ୍ଭାବନା ରହିଛି। ସେ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁଙ୍କୁ ଭେଟି ଦଳରେ ଯୋଗଦେକାବୁ ନିଷ୍ପତ୍ତି ନେଇଛନ୍ତି। ଉପ-ନିର୍ବାଚନରେ ରାଓ ପୁନର୍ବାର ରାଜ୍ୟ ସଭାକୁ ମନୋନୀତ ହେବାର ସମ୍ଭାବନା ଥିବାବେଳେ ଭେଙ୍କଟ ରମଣ ବିନା ସର୍ତ୍ତରେ ଟିଡିପିରେ ଯୋଗ ଦେଇପାରନ୍ତି।
ମସ୍ତାନ ରାଓ ପୂର୍ବରୁ ଟିଡିପିରେ ଥିଲେ ଏବଂ ୨୦୦୯ ରୁ ୨୦୧୪ ପର୍ଯ୍ୟନ୍ତ ଆନ୍ଧ୍ରପ୍ରଦେଶର କଭାଲି ଅଞ୍ଚଳର ପ୍ରତିନିଧିତ୍ୱ କରିଥିଲେ। ଯେତେବେଳେ କି, ୨୦୧୯ରେ, ସେ YSRCP ରେ ଯୋଗ ଦେଇଥିଲେ। ଏଥି ସହ ଭେଙ୍କଟ ରମଣ ଓ୍ବାଇଏସଆର କଂଗ୍ରେସର ସଦସ୍ୟ ରହି ଜଗନ ମୋହନ ରେଡ୍ଡୀଙ୍କ ପିତା ରାଜଶେଖର ରେଡ୍ଡୀଙ୍କ ସରକାରରେ ରାଜ୍ୟ ମନ୍ତ୍ରୀ ରହିଛନ୍ତି। ତେବେ ଏହି ୨ଜଣ ଏମପି ରାଜ୍ୟ ସଭା ଛାଡିବା ପରେ YSRCP ରାଜ୍ୟ ସଭାରେ କେବଳ ୯ଜଣ ଏମପି ଏବଂ ଲୋକ ସଭାରେ ୪ଜଣ ରହିବେ।
ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଆନ୍ଧ୍ରପ୍ରଦେଶରେ YS ଜଗନ ମୋହନ ରେଡ୍ଡୀଙ୍କ ପାର୍ଟି YSRCP କୁ ଆଉ ଏକ ବଡ଼ ଝଟକା ଲାଗିବାକୁ ଯାଉଛି। କାରଣ ରିପୋର୍ଟନୁସାରେ ଦଳର ୮ଜଣ ରାଜ୍ୟ ସଭା ସଦସ୍ୟ ଦଳ ଛାଡି ପାରନ୍ତି। ଚାରିଜଣ ଚନ୍ଦ୍ରବାବୁ ନାଇଡୁଙ୍କ ଦଳ ଟିଡିପିରେ ଯୋଗ ଦେବାକୁ ଯାଉଥିବାବେଳେ ଅନ୍ୟ ଚାରିଜଣ ଭାଜପାରେ ଯୋଗ ଦେଇପାରନ୍ତି ବୋଲି ଚର୍ଚ୍ଚା ହେଉଛି।
ଆନ୍ଧ୍ରପ୍ରଦେଶର ମୋଟ ୧୧ଟି ରାଜ୍ୟ ସଭା ଆସନ ଅଛି। ୨୦୧୯ରେ ରାଜ୍ୟରେ YSRCP କ୍ଷମତାକୁ ଆସିବା ପରେ ଦଳର ନେତାମାନେ ତିନି ପର୍ଯ୍ୟାୟ ନିର୍ବାଚନରେ ସମସ୍ତ ୧୧ଟି ଆସନରେ ରାଜ୍ୟ ସଭାକୁ ନିର୍ବାଚିତ ହୋଇଥିଲେ। ସଂଖ୍ୟା ଶକ୍ତି ଦୃଷ୍ଟିରୁ ଏହା ରାଜ୍ୟ ସଭାରେ ଚତୁର୍ଥ ବୃହତ୍ତମ ଦଳ ଭାବେ ପରିଗଣିତ ହୋଇଥିଲା। କିନ୍ତୁ ବର୍ତ୍ତମାନ ଆନ୍ଧ୍ରପ୍ରଦେଶରେ ବିଧାନସଭା ନିର୍ବାଚନ ପରେ ତେଲୁଗୁ ଦେଶମ ପାର୍ଟି ଓ ଭାଜପା ମେଣ୍ଟର ସରକାର କ୍ଷମତାକୁ ଆସିଛି। ଏହା ପରେ, ରାଜ୍ୟରେ ପରିବର୍ତ୍ତିତ ରାଜନୈତିକ ପରିସ୍ଥିତିରେ YSRCP ଏକ ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଛି।