ଲଣ୍ଡନ,୨୩।୮: ଭାରତ ବିପକ୍ଷ ତୃତୀୟ ଟେଷ୍ଟ ପୂର୍ବରୁ ଇଂଲଣ୍ଡ କ୍ରିକେଟ ଦଳ ଏକ ବଡ଼ ଝଟ୍କାର ସମ୍ମୁଖୀନ ହୋଇଥିଲା। କାନ୍ଧରେ ଆଘାତ ଲାଗିଥିବାରୁ ଦ୍ରୁତ ବୋଲର ମାର୍କ ଉଡ୍ ହେଡିଙ୍ଗଲି ଟେଷ୍ଟରୁ ବାଦ ପଡିଛନ୍ତି। ଲର୍ଡସ ଟେଷ୍ଟର ଚତୁର୍ଥ ଦିନରେ ଫିଲ୍ଡିଂ କରିବା ସମୟରେ ୩୧ ବର୍ଷୀୟ ଉଡ କାନ୍ଧରେ ଆଘାତ ପାଇଥିଲେ। ତଥାପି, ସେ ଲିଡ୍ସରେ ଦଳ ସହିତ ରହିବେ ଏବଂ ଇଂଲଣ୍ଡ ମେଡିକାଲ ଟିମ ସହିତ ତାଙ୍କର ଚିକିତ୍ସା ଜାରି ରଖିବେ। ଏବେ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଭାରତ ୧-୦ ରେ ଆଗୁଆ ରହିଛି। ଦୁଇ ଦଳ ମଧ୍ୟରେ ତୃତୀୟ ଟେଷ୍ଟ ଅଗଷ୍ଟ ୨୫ ରୁ ହେଡିଙ୍ଗଲିରେ ଖେଳାଯିବ।
ତୃତୀୟ ଟେଷ୍ଟ ପାଇଁ ଇଂଲଣ୍ଡ ନିକଟରେ ୧୫ ଜଣିଆ ଦଳ ଘୋଷଣା କରିଥିଲା। ତୃତୀୟ ଟେଷ୍ଟ ପାଇଁ ଡୋମ ସିବିଲିଙ୍କ ସ୍ଥାନରେ ଡେଭିଡ ମଲାନଙ୍କୁ ଦଳରେ ସାମିଲ କରାଯାଇଛି। ଫଳରେ ତିନି ବର୍ଷ ପରେ ମାଲାନ ଟେଷ୍ଟ ଦଳକୁ ଫେରିଛନ୍ତି। ୨୦୧୮ରେ ମଲାନ ଭାରତ ବିପକ୍ଷରେ ତାଙ୍କର ଶେଷ ଟେଷ୍ଟ ଖେଳିଥିଲେ।
