ଦେଓଗାଁ,୨୫ା୨: ଅନ୍ୟର ଜୀବନ ବଞ୍ଚାଇବା ପାଇଁ ରକ୍ତର ଆବଶ୍ୟକତା ଉପରେ ସଚେତନତା ଲାଗି ଏକ ନବଦମ୍ପତ୍ତି ନିଜ ବାହାଘରେ ରକ୍ତଦାନ ଶିବିର ଆୟୋଜନ କରିଛନ୍ତି। ବଲାଙ୍ଗୀର ଜିଲା ଦେଓଗାଁ ବ୍ଲକ ଗାଇବାହାଲ ପଞ୍ଚାୟତ ଅନ୍ତର୍ଗତ ରାଏପାଲିରେ ଦିବଂଗତ ଶ୍ରମିକ ନେତା ଲଲିତ ନାୟକଙ୍କ ସ୍ମୃତିରେ ବିଙ୍ଗ ହ୍ୟୁମାନ ଫାଉଣ୍ଡେସନ ସହାୟତାରେ ଗୁରୁବାର ଏହି ରକ୍ତଦାନ ଶିବିର ଅନୁଷ୍ଠିତ ହୋଇଥିଲା। ଏଥିରେ ୨୧ଜଣ ରକ୍ତଦାତା ରକ୍ତଦାନ କରିଥିଲେ । ଗାଁର ସଞ୍ଜୟ କୁମାର ମିଶ୍ର ଓ ରାନୀ ମିଶ୍ରଙ୍କ ବିବାହ ଅବସରରେ ଆୟୋଜିତ ଶିବିରକୁ ଫାଉଣ୍ଡେସନର ଜିଲା ସଭାପତି ସୋମନାଥ ମିଶ୍ର ଉଦ୍ଘାଟନ କରିଥିଲେ। ପରେ ସମସ୍ତ ରକ୍ତଦାତାଙ୍କୁ ମାନପତ୍ର ସହ ସମ୍ମାନୀତ କରାଯାଇଥିଲା। କାର୍ଯ୍ୟକ୍ରମକୁ ନିକୁ ଷଡଙ୍ଗୀ, ସୁନ୍ଦର ସାହୁ ଓ ଫାଉଣ୍ଡେସନର ଦେଓଗାଁ ଶାଖାର କର୍ମକର୍ତ୍ତା ଓ ବଲାଙ୍ଗୀର ରକ୍ତଭଣ୍ଡାର ମୋବାଇଲ ୟୁନିଟ ଟିମ୍ ସହଯୋଗ କରିଥିଲେ।