କୃଷ୍ଣପ୍ରସାଦ, ୨୮।୧୦(ଡି.ଏନ୍.ଏ.): ପୁରୀ ଜିଲା କୃଷ୍ଣପ୍ରସାଦ ବ୍ଲକ କୃଷ୍ଣପ୍ରସାଦସ୍ଥିତ ଚିଲିକାକୁ ଏକ ମତ୍ସ୍ୟଜୀବୀ ପରିବାର ଡଙ୍ଗା ଯୋଗେ ମାଛ ଧରିବାକୁ ଯାଇଥିବାବେଳେ ଦଳରେ ଡଙ୍ଗା ଫସିଯିବାରୁ ଜଳବନ୍ଦୀରେ ଅଟକ ରହିଥିଲେ। ପ୍ରାୟ ୩ଦିନ ପରେ ବୁଧବାର ସ୍ଥାନୀୟ ମତ୍ସ୍ୟଜୀବୀ ସେ ସ୍ଥାନକୁ ଯାଇଥିବାବେଳେ ଡଙ୍ଗା ଫସିଥିବା ଦେଖି ଅଗ୍ନିଶମ ବିଭାଗକୁ ଜଣାଇବା ପରେ ପ୍ରାୟ ୨ଘଣ୍ଟା ପରେ ଉକ୍ତ ମତ୍ସ୍ୟଜୀବୀ ପରିବାରକୁ ଉଦ୍ଧାର କରାଯାଇଥିଲା। ସେମାନେ ହେଲେ ଗଞ୍ଜାମ ଜିଲା ଖଲ୍ଲିକୋଟ ଗ୍ରାମର ନଉଡି ଜାଲି ଏବଂ ୨ପୁଅ କବି, ଅଭି। ଉଦ୍ଧାର ପରେ ସେମାନଙ୍କ ଅବସ୍ଥା ଠିକ ଥିବା କହିଛନ୍ତି। ଏଥିପାଇଁ ଅଗ୍ନିଶମ ବାହିନୀ ଏବଂ ଅଞ୍ଚଳବାସୀଙ୍କୁ ସେମାନେ ସାଧୁବାଦ ଜଣାଇଛନ୍ତି।
ଖବର ଅନୁଯାୟୀ, ସୋମବାର ଜାଲି ୨ପୁଅଙ୍କୁ ନେଇ ଚିଲିକାକୁ ମାଛ ଧରିବାକୁ ଆସି କୃଷ୍ଣପ୍ରସାଦର ଏକ ଦଳରେ ଡଙ୍ଗାଟି ଫସିଯାଇଥିଲା। ସେମାନଙ୍କ ନିକଟରେ ମୋବାଇଲ ଫୋନ ନ ଥିବା ଯୋଗୁ କାହା ସହ ଯୋଗାଯୋଗ ହୋଇପାରି ନ ଥିଲେ। ପାଖରେ ଥିବା ଚାଉଳ, ଆଳୁ ଆଦି ପରିବାକୁ ରାନ୍ଧି ଖାଉଥିବା ପ୍ରକାଶ କରିଛନ୍ତି। ବୁଧବାର ଅନ୍ୟ ଏକ ଡଙ୍ଗା ଯାଉଥିବାବେଳେ ସେମାନଙ୍କ ଉପରେ ନଜର ପଡ଼ିଥିଲା। ସେମାନଙ୍କ ସହ ପାଟିକରି କଥା ହେବା ପରେ ମାଲୁଦ ଦମକଳବାହିନୀ ସହ ଯୋଗାଯୋଗ କରିଥିଲେ। ଫାୟାର ଅଫିସର ସୌମେନ୍ଦ୍ର ପରିଡ଼ାଙ୍କ ନେତୃତ୍ୱରେ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚତ୍ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଅଧିକ ଦଳ ଯୋଗୁ ଦମକଳ ବାହିନୀର କୌଣସି ଯାନବାହାନ ଯିବା ସମ୍ଭବ ନ ଥିଲା। ଶେଷରେ ଦୁଃସାହସିକ ଭାବେ ୨ଟି ବାଉଁଶ ସାହାଯ୍ୟରେ ଫସିଥିବା ଡଙ୍ଗା ନିକଟରେ ପହଞ୍ଚତ୍ ନେଇଥିବା ରସିକୁ ବାନ୍ଧିଥିଲେ। ଅଗ୍ନିଶମ ବାହିନୀର ମୁଖ୍ୟ କର୍ମଚାରୀ କଳିଙ୍ଗ ନାୟକ, ବିଜୟ ଦାସ, ବିଶ୍ୱରଞ୍ଜନ ରାଉତ, ବିଷ୍ଣୁପ୍ରସାଦ ଜେନା ପ୍ରମୁଖ ଅକ୍ଳାନ୍ତ ପରିଶ୍ରମ କରି ଡଙ୍ଗାକୁ ଦଉଡିରେ ବାନ୍ଧି କୂଳକୁ ଟାଣି ଆଣିଥିଲେ। ପରେ ସେମାନଙ୍କୁ କୃଷ୍ଣପ୍ରସାଦ ଜେଟି ନିକଟରେ ଛାଡ଼ିଥିଲେ। ତେବେ ଜଳପଥ ପରିବହନ ବିଭାଗର ଭୁଲ ଥିବା ଜନସାଧାରଣ କହିଛନ୍ତି। ଏହାପୂର୍ବରୁ ବାଲୁଗାଁଠାରୁ ପାରିକୁଦଗଡ କୃଷ୍ଣପ୍ରସାଦ ଜେଟିକୁ ପ୍ରତିଦିନ ଜଳପଥ ପରିବହନ କରୁଥିବା ଏକ ଯାତ୍ରୀବାହୀ ଲଞ୍ଚ ସେହି ଦଳ ମଧ୍ୟରେ ଅଟକ ଥିଲା। ପରେ ଅନ୍ୟ ଏକ ଲଞ୍ଚ ବାଲୁଗାଁରୁ ଆସି ଟାଣିନେଇଥିଲା। ଏ ନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲେ ମଧ୍ୟ ସେଥିପ୍ରତି କୌଣସି ପଦକ୍ଷେପ ନ ନିଆଯିବାରୁ ପୁନର୍ବାର ସେହି ଦୁର୍ଘଟଣା ଘଟିଲା। ବିଭାଗୀୟ କର୍ତ୍ତୃପକ୍ଷ ଉକ୍ତ ଚିଲିକାରୁ ଦଳ ଉଦ୍ଧାର କରିବା ପାଇଁ ଅଞ୍ଚଳବାସୀଙ୍କ ପକ୍ଷରୁ ଦାବି ହେଉଛି।