ରଘୁନାଥପୁର,୧୦।୭ (ରାଜେନ୍ଦ୍ର ନାରାୟଣ ସିଂହ): ରଘୁନାଥପୁର ବ୍ଲକ ଛପଡା ପଞ୍ଚାୟତ କେରେକେରାସ୍ଥିତ ଗୋରେଖନାଥ ପୀଠରୁ ଶହେ ମିଟର ଦୂରରେ ଏକ ଜଙ୍ଗଲିଆ ସନ୍ତସନ୍ତିଆ ପରିତ୍ୟକ୍ତ ସ୍ଥାନରେ ନଳକୂପ ବସାଯାଇଛି। ପୀଠକୁ ଆସୁଥିବା ଯାତ୍ରୀ ତଥା ସ୍ଥାନୀୟ ଲୋକଙ୍କ ପାନୀୟ ଜଳ ଆବଶ୍ୟକତାକୁ ପୂରଣ କରିବା ଏହାର ଉଦ୍ଦେଶ୍ୟ ଥିଲା। ତେବେ ସରକାରୀ ଯୋଜନା ଏଠି ଦିଗହରା ହୋଇପଡିଛି। ଉଦ୍ଦେଶ୍ୟ ସାଧନ ହେବା ପରିବର୍ତ୍ତେ ଏହି ନଳକୂପଟି ଲୋକଙ୍କ ବ୍ୟବହାର ଉପଯୋଗୀ ହୋଇପାରୁନାହିଁ। ନଳକୂପ ବସିଥିବା ସ୍ଥାନଟି ଖାଲୁଆ ଓ ଆବର୍ଜନାମୟ ହୋଇଥିବାରୁ ଲୋକେ ସେଠାକୁ ଯାଇପାରୁନାହାନ୍ତି। ଅପରପକ୍ଷେ ପ୍ରଶାସନର ଅପାରଗତା ଯୋଗୁ ୫ବର୍ଷ ତଳୁ ୭୦ ହଜାର ଟଙ୍କା ବ୍ୟୟରେ ବସାଯାଇଥିବା ନଳକୂପଟି ଅକାମୀ ହୋଇ ପଡିରହିଛି ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ଯଦି ନଳକୂପ ବସିଥିବା ସ୍ଥାନର ଚତୁଃପାର୍ଶ୍ୱକୁ ୨ ଫୁଟ ଉଚ୍ଚା କରି ପ୍ଲାଟ ଫର୍ମ ନିର୍ମାଣ କରାଯାଆନ୍ତା ତାହା ହେଲେ ଏହା ବ୍ୟବହାର ଉପଯୋଗୀ ହୋଇପାରନ୍ତା ବୋଲି ସ୍ଥାନୀୟ ଅଧିବାସୀ କହିଛନ୍ତି। ତତ୍କାଳୀନ ସରପଞ୍ଚ ବିଜୟ ସ୍ବାଇଁଙ୍କ ଉଦ୍ୟମରେ ଏହି ନଳକୂପଟି ବସାଯାଇଥିଲା। ତେବେ ଏହାକୁ ବସାଇଥିବା ଠିକାଦାର ସମ୍ପୂର୍ଣ୍ଣ କାର୍ଯ୍ୟ ନ କରି ଛାଡି ଚାଲିଯାଇଥିବା ସ୍ବାଇଁ କହିଛନ୍ତି। ଏ ସମ୍ପର୍କରେ ଆରଡବ୍ଲ୍ୟୁଏସ୍ଏସ୍ ଯନ୍ତ୍ରୀ ମନୋରଞ୍ଜନ ଦେହୁରୀ କୁହନ୍ତି ଯେ, ଏହା ତାଙ୍କ ନଜରକୁ ଆସିଛି। ଏଥିପାଇଁ ସୁବ୍ୟବସ୍ଥା କରାଯିବ ବୋଲି ସେ କହିଛନ୍ତି।