ବ୍ରହ୍ମପୁର ଅଫିସ,୨୯ା୧୦: ଦକ୍ଷିଣ ଓଡ଼ିଶାର ସ୍ବାସ୍ଥ୍ୟସେବା କ୍ଷେତ୍ରରେ ରୋଗୀଙ୍କ ଜୀବନ ରେଖା କୁହାଯାଉଥିବା ଏମକେସିଜି ବଡ଼ ଡାକ୍ତରଖାନାରୁ ଶୁକ୍ରବାର ପୁଣି ଜଣେ ଦଲାଲ୍ ଧରାପଡ଼ିଛନ୍ତି। ନିଜକୁ ଡାକ୍ତର ପରିଚୟ ଦେଇ ଅସ୍ଥିଶଲ୍ୟ ବିଭାଗରେ ନିୟୋଜିତ ସୁରକ୍ଷା କର୍ମଚାରୀଙ୍କ ସହିତ ଯୁକ୍ତିତର୍କ କରୁଥିବା ବେଳେ ତାଙ୍କୁ ଧରାଯାଇଛି। ଦଲାଲ୍ ନିକଟରୁ ମିଳିଥିବା ପରିଚୟପତ୍ରରୁ ତାଙ୍କ ନାମ ଡା. ଦୀପକ କୁମାର ନାହାକ ବୋଲି ଉଲ୍ଲେଖ ରହିଛି। କିନ୍ତୁ ପ୍ରକୃତରେ ଦୀପକ ଡାକ୍ତର ହୋଇ ନଥିବା ପୋଲିସ ଛାନଭିନ ବେଳେ ଜଣାପଡ଼ିଛି। ଏ ନେଇ ବୈଦ୍ୟନାଥପୁର ଥାନା ପୋଲିସ ଦୀପକଙ୍କୁ ଥାନାରେ ଅଟକ ରଖି ତଦନ୍ତ ଜାରି ରଖିଛି। ଶୁକ୍ରବାର ମଧ୍ୟାହ୍ନରେ ଏମକେସିଜି ବଡ଼ ଡାକ୍ତରଖାନା ଅସ୍ଥିଶଲ୍ୟ ବିଭାଗକୁ ଦୀପକ ଯାଇଥିଲେ। ସେଠାରେ କୌଣସି କାରଣ ପାଇଁ କାର୍ଯ୍ୟରତ ସୁରକ୍ଷା କର୍ମୀଙ୍କ ସହିତ ତାଙ୍କର ଯୁକ୍ତିତର୍କ ହୋଇଥିଲା। ଏହାପରେ ଦୀପକ ନିଜକୁ ଓପିଡି ସୁପରଭାଇଜର୍ ବୋଲି ପରିଚୟ ଦେଇ ସୁରକ୍ଷା କର୍ମୀଙ୍କୁ ନାନା ଧମକ୍ ଦେଇଥିଲେ। ଏହି ଘଟଣା ପ୍ରଚାରିତ ହେବା ପରେ ପୋଲିସ ସେଠାରେ ପହଞ୍ଚି ଥିଲା। ସେଭଳି ନାମରେ କେହି ସୁପରଭାଇଜର୍ ନଥିବା ଜଣାପଡ଼ିଥିଲା। ଏଣୁ ପୋଲିସ ତାଙ୍କୁୁ ଉଠାଇ ନେଇ ଥାନାରେ ଅଟକ ରଖିଥିଲା। ତାଙ୍କ ନିକଟରୁ ଏମକେସିଜି ବଡ଼ ଡାକ୍ତରଖାନା ଡ଼ାକ୍ତର ଓ ଓପିଡି ସୁପରଭାଇଜର୍ ଲେଖା ହୋଇଥିବା ଏକ ପରିଚୟପତ୍ର ଜବତ ହୋଇଛି। ଦୀପକ ଏମକେସିଜି ବଡ଼ ଡାକ୍ତରଖାନାର କର୍ମଚାରୀ ନୁହଁ ବୋଲି ପୋଲିସ କହିଛି। ଦୀପକ ରୋଗୀମାନଙ୍କୁ ବିଭିନ୍ନ କ୍ଲିନିକକୁ ଚାଲାଣ କରିବା କାମ କରୁଥିବା ନେଇ ପୋଲିସ ସନ୍ଦେହ କରୁଛି। ସେ ଆଙ୍କୁଲିରେ ଘରଭଡ଼ା ନେଇ ରହୁଥିବା ବେଳେ ଏକ ଘରୋଇ ଶିକ୍ଷା ଅନୁଷ୍ଠାନରେ ପଲି ଟେକନିକର ଦ୍ୱିତ୍ୱୀୟ ବର୍ଷ ଛାତ୍ର ବୋଲି ବ୍ରହ୍ମପୁର ଏସପି ଡା. ଶ୍ରବଣା ବିବେକ ଏମ. ସୂଚନା ଦେଇଛନ୍ତି। ସୂଚନାଯୋଗ୍ୟ, ଗତ ୧୮ ତାରିଖରେ ବ୍ରହ୍ମପୁର ଏସ୍.ପି. ଡା.ଶର୍ବଣା ବିବେକ ଏମ୍.ଙ୍କ ନେତୃତ୍ୱରେ ପୋଲିସ ଟିମ୍ ଏମକେସିଜିରେ ଚଢ଼ାଉ କରି ବିଭିନ୍ନ ସ୍ଥାନରୁ ୬ ଦଲାଲ୍ଙ୍କୁ କାବୁ କରିଥିଲା। ଏହି ଘଟଣା ପରେ ଦଲାଲମାନେ ଛାନିଆ ହୋଇ ଉଠିଥିଲେ। ତେବେ ଶୁକ୍ରବାର ପୁଣି ଜଣେ ଦଲାଲ୍ ଡାକ୍ତର ବେଶରେ ଏମକେସିଜିକୁ ଯାଇ ପୋଲିସ ଓ ସୁରକ୍ଷା କର୍ମଚାରୀଙ୍କ ଦ୍ୱାରା ଧରାପଡ଼ିଛନ୍ତି।