ବଲାଙ୍ଗୀର ଅଫିସ,୧୬ା୨: ବଲାଙ୍ଗୀର ସହର ମାଲଗୋଦାମପଡା ଠାରେ ବୁଧବାର ଅପରାହ୍ଣରୁ ପୋଲିସ ଏବଂ ପ୍ରଶାସନିକ ଟିମ୍ କେତେଜଣ ଅସାମାଜିକ ବ୍ୟକ୍ତିଙ୍କ ଘର ଉଚ୍ଛେଦ କାର୍ଯ୍ୟ ଜାରି ରଖିଛନ୍ତି। ମାଲଗୋଦାମପଡାର ତେଜରାଜ ନନ୍ଦ, ନିରୋଜ ହରପାଲ ଏବଂ ସଞ୍ଜୟ ତାଣ୍ଡିଙ୍କ ଘରକୁ ସମ୍ପୂର୍ଣ୍ଣ ଉଚ୍ଛେଦ କରାଯାଇଛି। ଜେସିବି ମେଶିନ ସହାୟତାରେ ଏହି ତିନି ବ୍ୟକ୍ତିଙ୍କ ଘରକୁ ସମ୍ପୂର୍ଣ୍ଣ ଭାଙ୍ଗି ଦିଆଯାଇଛି। ମାଜିଷ୍ଟ୍ରେଟ୍ ଦାୟିତ୍ୱରେ ଥିବା ତହସିଲଦାର ପୁଷ୍ପାଞ୍ଜଳି ପଣ୍ଡା, ଆଡିସନାଲ ଏସ୍ପି ସୁରେଶ ନାଏକ, ଏସଡିପିଓ ତୋଫାନ ବାଗ, ଟାଉନ ଥାନା ଆଇଆଇସି ପ୍ରିୟଙ୍କା ରାଉତରାୟଙ୍କ ଉପସ୍ଥିତିରେ ପ୍ରଶାସନିକ ଟିମ୍ ଘରଭଙ୍ଗା ଅଭିଯାନ ଆରମ୍ଭ କରିଥିଲେ। ରାତି ପ୍ରାୟ ୯ଟା ପର୍ଯ୍ୟନ୍ତ ଘରଭଙ୍ଗା ଅଭିଯାନ ଜାରି ରହିଥିବା ଜଣାପଡିଛି। ମାଜିଷ୍ଟ୍ରେଟ୍ ପଣ୍ଡା କହିଛନ୍ତି ଯେ, ଉପଜିଲାପାଳଙ୍କ କୋର୍ଟରେ ପୋଲିସ ତରଫରୁ ୧୩୩ ସିଆରପିସିରେ ଆବେଦନ କରାଯାଇଥିଲା। ଯେଉଁମାନଙ୍କ ନଁାରେ ଚୋରି, ଡକାୟତି, ହତ୍ୟା ଉଦ୍ୟମ ଭଳି ମାମଲା ରହିଛି ଏବଂ ଯେଉଁମାନେ ବାରମ୍ବାର ଅପରାଧ ଘଟାଇବା ପରେ ଜାମିନ୍ରେ ଆସି ପୁଣି ଅପରାଧ ଘଟାଉଛନ୍ତି ସେଭଳି ଅଭିଯୁକ୍ତମାନେ ସରକାରୀ ଜମି କବ୍ଜା କରି ଘର କରିଛନ୍ତି ଏବଂ ବାରମ୍ବାର ଆପରାଧିକ ଘଟଣାରେ ସମ୍ପୃକ୍ତ ରହୁଛନ୍ତି ା ସେମାନଙ୍କ ଘରକୁ ଉଚ୍ଛେଦ କରାଯାଉଛି ବୋଲି ସେ ସୂଚନା ଦେଇଥିଲେ। ଆଡିସନାଲ ଏସପି ସୁରେଶ ନାୟକ କହିଛନ୍ତି ଯେ, ଯେଉଁ ସ୍ଥାନରେ ରହି ଅଭିଯୁକ୍ତମାନେ ଅପରାଧ ଯୋଜନା କରୁଛନ୍ତି ଏବଂ ଏହାକୁ ଆଡ୍ଡାସ୍ଥଳୀ ଭାବେ ବ୍ୟବହାର କରୁଛନ୍ତି ସେହି ସ୍ଥାନରୁ ଉଚ୍ଛେଦ କରିବା ପାଇଁ ଉପଜିଲାପାଳଙ୍କ କୋର୍ଟ ନିର୍ଦ୍ଦେଶ କ୍ରମେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି କହିଥିଲେ।
