ଲକ୍ଷ୍ନୌ: ଲକ୍ଷ୍ନୌ ଲୋକ ସଭା ଆସନରୁ ସମାଜବାଦୀ ପାର୍ଟି(ଏସ୍ପି) ରବିଦାସ ମେହରୋତ୍ରାଙ୍କୁ ପ୍ରାର୍ଥୀ କରିଛି। ଚଳିତ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ବହୁ ପୁରାତନ ଛାତ୍ର ନେତାଙ୍କ ମଧ୍ୟରୁ ସେ ଅନ୍ୟତମ। ତେବେ ଏହି ବରିଷ୍ଠ ରାଜନେତାଙ୍କ ନାମରେ ଏକ ବିରଳ ରେକର୍ଡ ରହିଛି।
ଜୀବନରୁ ରାଜନୀତି ଆରମ୍ଭ କରିଥିବା ରବିଦାସ ସମୁଦାୟ ୨୫୧ ଥର ଜେଲ ଯାଇ ବିରଳ ରେକର୍ଡ ସୃଷ୍ଟି କରିଛନ୍ତି। ୬୬ ବର୍ଷୀୟ ରବିଦାସ ଲକ୍ଷ୍ନୌ ବିଶ୍ୱବିଦ୍ୟାଳୟର ପୁରାତନ ଛାତ୍ର ନେତା ହୋଇଥିବାବେଳେ ସେ ନିଜର ୪୦ ବର୍ଷର ରାଜନୈତିକ କ୍ୟାରିୟରରେ ବହୁ ବାଧାବିଘ୍ନ ଦେଇ ଗତି କରିଛନ୍ତି। ଏହାସତ୍ତ୍ୱେ ମଧ୍ୟ ଉତ୍ସାହର ସହ ସେ ବିଭିନ୍ନ ସାମାଜିକ କାର୍ଯ୍ୟ କରି ଚାଲିଛନ୍ତି। ଏତେଥର ଜେଲ ଯାଇ ରେକର୍ଡ କରିବା ସମ୍ପର୍କରେ ସେ ନିଜ ପ୍ରତିକ୍ରିୟା ରଖିଛନ୍ତି। ତାଙ୍କ ବିରୋଧରେ ରୁଜୁ ହୋଇଥିବା ଅଧିକାଂଶ ମାମଲା ତାଙ୍କ ଛାତ୍ର ଜୀବନର ହୋଇଥିବା ସେ କହିଛନ୍ତି। ସେତେବେଳେ ସେ ବିଶ୍ୱବିଦ୍ୟାଳୟ ଓ ଛାତ୍ରୀଛାତ୍ରଙ୍କର ବିଭିନ୍ନ ସମସ୍ୟା ନେଇ ପ୍ରତିବାଦ କରିବା ସହ ଧାରଣା ଦେଇଥିଲେ। ରାଜନୀତିରେ ଯୋଗ ଦେବା ପରେ ମଧ୍ୟ ଜନସାଧାରଣଙ୍କ ସ୍ବାର୍ଥ ସମ୍ବର୍ଦ୍ଧିତ ବିଭିନ୍ନ ପ୍ରସଙ୍ଗରେ ସେ ଅନେକବାର ପ୍ରତିବାଦ, ବିକ୍ଷୋଭ ଓ ଧାରଣାରେ ସାମିଲ ହୋଇଥିବାରୁ ତାଙ୍କ ବିରୋଧରେ ଏତେସଂଖ୍ୟକ ମାମଲା ରୁଜୁ କରାଯାଇଛି। ଜନସାଧାରଣଙ୍କ ସ୍ବାର୍ଥ ପାଇଁ ସେ ସବୁବେଳେ ଲଢ଼େଇ ଜାରି ରଖିଥିବାରୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଭାବେ ତାଙ୍କୁ ବାରମ୍ବାର ଜେଲ୍ ପଠାଯାଇଥିବା ରବିଦାସ କହିଛନ୍ତି। ତେବେ ତାଙ୍କ ବିରୋଧରେ ଏତେସଂଖ୍ୟକ ମାମଲା ରୁଜୁ ହୋଇଥିଲେ ମଧ୍ୟ ସେଥିମଧ୍ୟରୁ ଗୋଟିଏ ବି ଆପରାଧିକ ମାମଲା ନଥିବା ସେ କହିଛନ୍ତି।
ଏମ୍ପି ଭାବେ ନିର୍ବାଚିତ ହେଲେ, ଜାତି, ସମ୍ପ୍ରଦାୟ ଓ ଧର୍ମ ନିର୍ବିଶେଷରେ ସମସ୍ତଙ୍କ ଜୀବନରେ ବିକାଶ ଆଣିବା ପାଇଁ କାର୍ଯ୍ୟ କରିବେ ବୋଲି କହିଛନ୍ତି। ତାଙ୍କ ଦଳ ଦେଇଥିବା ବିଭିନ୍ନ ପ୍ରତିଶ୍ରୁତି ବିଷୟରେ ସେ ନିଜ ଭୋଟରଙ୍କୁ ଅବଗତ କରାଉଛନ୍ତି। ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ଖରାପ ଥିବା ଏବଂ ମହିଳା ଓ ଶିଶୁ ସୁରକ୍ଷିତ ନଥିବା କହି ଏଥର ଫଳାଫଳ ତାଙ୍କ ସପକ୍ଷରେ ଯିବ ବୋଲି ରବିଦାସ ଦୃଢ଼ୋକ୍ତି ପ୍ରକାଶ କରିଛନ୍ତି। ଚଳିତ ଥର ଲକ୍ଷ୍ନୌ ଲୋକ ସଭା ଆସନରେ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସହ ତାଙ୍କର ମୁକାବିଲା ହେବ। ଆସନ୍ତା ମାସ ୨୦ରେ ଲକ୍ଷ୍ନୌ ଆସନରେ ଭୋଟିଂ ହେବ।