ଉଡୁପି, ୨୯ା୧: କୁକୁରକୁ ନିର୍ମମ ଭାବେ ହତ୍ୟା କରିବା ନେଇ ଶନିବାର କର୍ନାଟକ ଉଡୁପି ପୋଲିସ ଦୁଇ ଯୁବକଙ୍କ ବିରୋଧରେ ମାମଲା ରୁଜୁ କରିଛି। ବଣ୍ଟାକାଲସ୍ଥିତ ଶ୍ରୀ ମାଧଓ୍ବା ଭଡିରାଜା ଇନ୍ଷ୍ଟିଚ୍ୟୁଟ ଅଫ୍ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟ କଲେଜ ପରିସରରେ କୁକୁରକୁ ହତ୍ୟା କରାଯାଇଥିବା ପୋଲିସ କହିଛି। ସେହି କଲେଜର ଜଣେ ଛାତ୍ର କୁକୁର ସହ ଖେଳୁଥିବା ଦେଖି ଅଭିଯୁକ୍ତ ଓ୍ବାର୍ଡେନ୍ ନାଗାରାଜ ଏବଂ ରାଜେଶ ଜାଣିଶୁଣି କୁକୁରଙ୍କୁ ହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିବା ପୋଲିସ ସୂଚନା ଦେଇଛି।
ମାଧବରାଜ ଆନିମଲ କେୟାର ଟ୍ରଷ୍ଟର ସଦସ୍ୟ ବବିତା ମାଧବରାଜଙ୍କ ସୂଚନାନୁସାରେ, ନାଗାରାଜ ଏବଂ ରାଜେଶ କୁକୁରକୁ ପ୍ରଥମେ ଏକ ବସ୍ତାରେ ପୂରାଇ ବାନ୍ଧି ଦେଇଥିଲେ। ଏହାପରେ ଦୁହେଁ କୁକୁରଟିର ମୃତ୍ୟୁ ପର୍ଯ୍ୟନ୍ତ ତାକୁ ନିର୍ଦ୍ଦୟ ଭାବେ ପିଟିଥିଲେ। କଲେଜ ଗାଡ଼ିରେ ମଲାକୁକୁରକୁ ନେଇ ଦୁହେଁ କୌଣସିଆଡ଼େ ଫୋପାଡ଼ି ଦେଇଥିଲେ। ତେବେ ଏ ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏ ଘଟଣା ନେଇ ମଞ୍ଜୁଳା କାରକେରା ଶିରଭା ଥାନାରେ ପ୍ରଥମେ ଅଭିଯୋଗ କରିବା ପରେ ପୋଲିସ ପକ୍ଷରୁ ଏ ସଂକ୍ରାନ୍ତରେ ମାମଲା ରୁଜୁ କରାଯାଇଛି।