ନୂଆଦିଲ୍ଲୀ,୧୨ା୯(ପି.ଟି.):କେନ୍ଦ୍ର ସରକାରଙ୍କ ଅଧୀନରେ ନିଯୁକ୍ତ ଯୁଗ୍ମ ସଚିବ ଓ ତଦୂର୍ଦ୍ଧ୍ୱ ପାହ୍ୟାର ଅଫିସରମାନେ ଦୁର୍ନୀତିରେ ସମ୍ପୃକ୍ତ ଥିଲେ, କର୍ତ୍ତୃପକ୍ଷଙ୍କ ବିନା ଅନୁମତିରେ ସେମାନଙ୍କ ବିରୋଧରେ ତଦନ୍ତ କରାଯିବା ସହ ମାମଲା ରୁଜୁ କରାଯାଇପାରିବ। ୨୦୧୪ରେ ସୁପ୍ରିମକୋର୍ଟ ଦେଇଥିବା ଏହି ରାୟକୁ ୨୦୦୩ ସେପ୍ଟେମ୍ବର ୧୧ରୁ ପିଛିଲା ଭାବେ ଲାଗୁ କରିବା ପାଇଁ ସୋମବାର ନିର୍ଦ୍ଦେଶ ଦେଇଛନ୍ତି। ଦୁର୍ନୀତି ମାମଲାରେ ଦିଲ୍ଲୀ ସ୍ବତନ୍ତ୍ର ପୋଲିସ ପ୍ରତିଷ୍ଠାନ (ଡିଏସ୍୍ପିଇ) ଅଧିନିୟମ, ୧୯୪୬ ଉପରୋକ୍ତ ଅଧିକାରୀମାନଙ୍କ ବିରୋଧରେ ତଦନ୍ତ ଓ କାର୍ଯ୍ୟାନୁଷ୍ଠାନ ଲାଗି ଉଚ୍ଚ କର୍ତ୍ତୃପକ୍ଷଙ୍କ ଅନୁମତି ଆଣିବାର ବ୍ୟବସ୍ଥା ରହିଥିଲା। ସର୍ବୋଚ୍ଚ ଅଦାଲତ ୨୦୧୪ ମେ’ରେ ଏହି ବ୍ୟବସ୍ଥାକୁ ଖାରଜ କରିଦେଇଥିଲେ। ଏବେ ଉକ୍ତ ରାୟକୁ ପିଛିଲା ଭାବେ ଲାଗୁ କରିବା ଲାଗି ଜଷ୍ଟିସ ସଞ୍ଜୟ କିଷନ କୌଲଙ୍କ ଅଧ୍ୟକ୍ଷତାରେ ୫ ଜଣିଆ ସାମ୍ବିଧାନିକ ପୀଠ ସର୍ବସମ୍ମତ ରାୟ ପ୍ରଦାନ କରିଛନ୍ତି। ସର୍ବୋଚ୍ଚ ଅଦାଲତ କହିଛନ୍ତି, ୨୦୧୪ର ରାୟ ୨୦୦୩ ସେପ୍ଟେମ୍ବର ୧୧ରୁ ଲାଗୁ ହେବ, ଯେତେବେଳେ ଡିଏସ୍ପିଇ ଅଧିନିୟମରରେ ଧାରା ୬(ଏ)କୁ ଯୋଡ଼ାଯାଇଥିଲା। ଏହି ଧାରାରେ ଉଚ୍ଚ ପ୍ରଶାସନିକ ଅଧିକାରୀମାନଙ୍କ ବିରୋଧରେ ତଦନ୍ତ ଓ ମାମଲା ରୁଜୁ ପାଇଁ କେନ୍ଦ୍ର ସରକାରଙ୍କ ଅନୁମୋଦନ ଆବଶ୍ୟକ ବୋଲି ଉଲ୍ଲେଖ ରହିଥିଲା। ଉକ୍ତ ଧାରା ଅବୈଧ ବୋଲି ସେତେବେଳେ ସୁପ୍ରିମକୋର୍ଟ ତାଙ୍କ ରାୟରେ କହିବା ସହ ଏଥିରେ ଦୁର୍ନୀତି ଘୋଡ଼ାଇବା ପ୍ରବୃତ୍ତି ରହିଥିବା ଟିପ୍ପଣୀ ଦେଇଥିଲେ। ଉକ୍ତ ବ୍ୟବସ୍ଥାକୁ ହଟାଇଦିଆଯିବା ଦ୍ୱାରା ଅଧିକାରର ସୁରକ୍ଷା କରୁଥିବା ସମ୍ବିଧାନର ଅନୁଚ୍ଛେଦ ୨୦କୁ ଏହା ପ୍ରଭାବିତ କରିପାରେ କି ପ୍ରସଙ୍ଗ ଉପରେ ସୋମବାର ସୁପ୍ରିମକୋର୍ଟ ଉପରୋକ୍ତ ରାୟ ଦେଇଛନ୍ତି। ୨୦୧୪ ମେ’ରେ ସୁବ୍ରମଣ୍ୟମ ସ୍ବାମୀ ମାମଲାରେ ସାମ୍ବିଧାନିକ ପୀଠ ଦେଇଥିବା ରାୟକୁ ପିଛିଲା ଭାବେ କାର୍ଯ୍ୟକାରୀ କରିବାକୁ ସର୍ବୋଚ୍ଚ ଅଦାଲତ କହିଛନ୍ତି।