ନୂଆଦିଲ୍ଲୀ,୧।୧୨ : ବିଶ୍ୱର ବୃହତ୍ତମ ଅର୍ଥନୀତିର ଫୋରମ ଜି-୨୦ ରେ ଭାରତର ଅଧ୍ୟକ୍ଷତା ଗୁରୁବାରଠାରୁ ଆରମ୍ଭ ହୋଇଛି। ଏହି ମର୍ମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ, ମାନବିକତାର ସାମଗ୍ରିକ ଉନ୍ନତି ପାଇଁ ଚିନ୍ତାଧାରାରେ ଏକମୌଳିକ ପରିବର୍ତ୍ତନର ଆବଶ୍ୟକତା ରହିଛିି।
ବିଶ୍ୱର କଲ୍ୟାଣ ପାଇଁ ଏକ ସାମଗ୍ରିକ, ଉଚ୍ଚାଭିଳାଷୀ, କାର୍ଯ୍ୟ-ଆଧାରିତ ତଥା ନିର୍ଣ୍ଣାୟକ ଏଜେଣ୍ଡା ଆଧାରରେ କାର୍ଯ୍ୟ କରାଯିବା ସହିତ ଜଳବାୟୁ ପରିବର୍ତ୍ତନ ନେଇ ଉପଯୋଗୀ ପଦକ୍ଷେପ ଜରୁରୀ। ଦେ ଜି-୨୦ ପାଇଁ ଭାରତର ଉଦ୍ଦେଶ୍ୟ ହେଉଛି ଗୋଟିଏ ପୃଥିବୀ, ଗୋଟିଏ ପରିବାର, ଗୋଟିଏ ଭବିଷ୍ୟତ।
ଜି-୨୦ ହେଉଛି ବିଶ୍ୱ ଅଥନୈତିକ ସହଯୋଗର ଏକ ପ୍ରଭାବଶାଳୀ ସଂଗଠନ। ଏହା ବିଶ୍ୱର ମୋଟ ଘରୋଇ ଉତ୍ପାଦର (ଜିଡିପି) ୮୫ ପ୍ରତିଶତ, ବିଶ୍ୱ ବାଣିଜ୍ୟର ୭୫ ପ୍ରତିଶତରୁ ଅଧିକ ଏବଂ ବିଶ୍ୱ ଜନସଂଖ୍ୟାର ପ୍ରାୟ ଦୁଇ ତୃତୀୟାଂଶ ପ୍ରତିନିଧିତ୍ୱ କରିଥାଏ। ଏଥିରେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚୀନ, ଫ୍ରାନ୍ସ, ଜର୍ମାନୀ, ଭାରତ, ଇଣ୍ଡୋନେସିଆ, ଇଟାଲୀ, ଜାପାନ, ଦକ୍ଷିଣ କୋରିଆ, ମେକ୍ସିକୋ, ରୁଷିଆ, ସୌଦି ଆରବ, ଦକ୍ଷିଣ ଆଫ୍ରିକା, ତୁର୍କୀ, ବ୍ରିଟେନ, ଆମେରିକା ଏବଂ ୟୁରୋପୀୟ ୟୁନିଅନ (ଇୟୁ) ଅନ୍ତର୍ଭୁକ୍ତ।