ଯାଜପୁର,୧୦ା୯(ହର୍ଷବର୍ଦ୍ଧନ ବେହେରା)ଯାଜପୁର ଜିଲାରେ ବାଲ୍ୟ ବିବାହକୁ ନା, ବିଦ୍ୟାଳୟକୁ ହଁ, ଝିଅଙ୍କୁ ବଞ୍ଚାନ୍ତୁ ଓ ଝିଅଙ୍କୁ ପଢ଼ାନ୍ତୁ, ସ୍ବଚ୍ଛ ଗ୍ରାମ ସମୃଦ୍ଧ ଭାରତ ଆଦି ସଚେତନତାର ବାର୍ତ୍ତା ଦେଉଥିବା ଏକ ପ୍ଲେଟ ଲଗାଇବାକୁ ଲୋକଙ୍କଠାରୁ ୩୦ ଟଙ୍କା ଲେଖାଏ ଆଦାୟ କରାଯାଉଛି। ଏହାକୁ ସାଧାରଣରେ ବିରୋଧ କରାଯାଇଛି। ଏଥିପାଇଁ କେତେକ ବାହାର ରାଜ୍ୟର ଲୋକେ ବ୍ଲକର ବିଭିନ୍ନ ପଞ୍ଚାୟତ ଘୂରି ବୁଲୁଛନ୍ତି। ଏହି ପ୍ଲେଟ୍ ଲଗାଇଲେ ଭୋଟର କାର୍ଡ, ରାଶନ କାର୍ଡ ସମେତ ସରକାରଙ୍କ ବିଭିନ୍ନ ସୁବିଧା ସୁଯୋଗ ମିଳିବାରେ ସହଜ ହେବ ବୋଲି ପ୍ରଶାସନିକ ଅଧିକାରୀମାନେ କହୁଛନ୍ତି। ଏଠାରେ ରସୁଲପୁର ବ୍ଲକକୁ ଉଦାହରଣ ଭାବେ ନିଆଯାଇଛି। ଏହି ସଚେତନତା ପ୍ଲେଟ ଲଗାଇବା ପାଇଁ ରସୁଲପୁର ବିଡିଓ ସମସ୍ତ ସରପଞ୍ଚ ଏବଂ ପିଇଓମାନଙ୍କୁ ଦେଇଥିବା ତାଙ୍କ ପତ୍ରସଂଖ୍ୟା ୩୯୦୯/୧୮ା୭ା୨୦୨୩ରେ ଦର୍ଶାଇଛନ୍ତି ଯେ, କେନ୍ଦ୍ରାଞ୍ଚଳ ରାଜସ୍ବ କମିଶନଙ୍କ ପତ୍ରସଂଖ୍ୟା ୨୦୪୫/୨୮ା୨ା୨୦୨୩ ଅନୁସାରେ ସମସ୍ତ ପଞ୍ଚାୟତର ଘରଗୁଡ଼ିକରେ ଏହି ସଚେତନତା ବାର୍ତ୍ତା ପ୍ଲେଟ ଲଗାଇବା କାର୍ଯ୍ୟ ଚାଲିଛି। ଏହି ପ୍ଲେଟରେ ସ୍ବଚ୍ଛ ଅଭିଯାନ, ବେଟି ବଚାଓ, ବେଟି ପଢ଼ାଓ ଇତ୍ୟାଦି ବାର୍ତ୍ତା ଦିଆଯାଇଛି। ଏହି ପ୍ଲେଟ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ସହ ଭୋଟର ତାଲିକା, ରାଶନ କାର୍ଡ, କୃଷି ଗଣନା, ପୋଷ୍ଟାଲ ଓ ଟେଲିଗ୍ରାମ ବଣ୍ଟନ ଆଦି କାର୍ଯ୍ୟରେ ସହଯୋଗ କରିବ। ସେଥିପାଇଁ ପ୍ରତ୍ୟେକ ପ୍ଲେଟର ଦର ୩୦ ଟଙ୍କା ଲେଖାଏ ନିଦ୍ଧର୍ର୍ାରିତ କରାଯାଇଛି। ଏହାସହ ଏହି ଟଙ୍କା ଆଦାୟ କରି ବିଲ୍ ଦେବାକୁ ବିଡିଓ ତାଙ୍କ ପତ୍ରରେ ନିର୍ଦ୍ଦେଶ ଜାରି କରିଛନ୍ତି। ରାଜ୍ୟ ଓ କେନ୍ଦ୍ର ସରକାର ବିଭିନ୍ନ ସଚେତନତା କାର୍ଯ୍ୟକ୍ରମ ପାଇଁ ବିପୁଳ ଟଙ୍କା ଖର୍ଚ୍ଚ କରୁଥିବାବେଳେ ସାଧାରଣ ଗରିବ ଲୋକଙ୍କଠାରୁ ପ୍ଲେଟ ପାଇଁ ଅର୍ଥ ଆଦାୟ କରିବା ଘଟଣାକୁ ଲୋକେ ସହଜେ ଗ୍ରହଣ କରିପାରିନାହାନ୍ତି। ଏନେଇ ସାମାଜିକ କର୍ମୀ ମଣ୍ଟୁ ଦାସ ଜିଲାପାଳଙ୍କୁ ପତ୍ର ମାଧ୍ୟମରେ ଦୃଷ୍ଟି ଆକର୍ଷଣ କରିଛନ୍ତି। ସେ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ଯେ, ବିଭିନ୍ନ ସଚେତନତା କାର୍ଯ୍ୟକ୍ରମ ପାଇଁ ଘର ପିଛା ୩୦ ଟଙ୍କା ସଂଗ୍ରହ ଆଦୌ ଗ୍ରହଣଯୋଗ୍ୟ ନୁହେଁ। ସରକାର ଲୋକମାନଙ୍କ ମଙ୍ଗଳ ଓ ବିକାଶ ପାଇଁ ମାଗଣା ଚାଉଳ, ଚିକିତ୍ସା, ଶିକ୍ଷା, ଭତ୍ତା ଭଳି ଅନେକ ଯୋଜନା ବିନା ଶୁଳ୍କରେ ପ୍ରଦାନ କରୁଛନ୍ତି। ହେଲେ ଇତିମଧ୍ୟରେ କେବଳ ରସୁଲପୁର ବ୍ଲକ ଅନ୍ତର୍ଗତ ୧ ନମ୍ବର ୱାର୍ଡରେ ୨୫୦ ପ୍ଲେଟ ଲଗାଇ ୭୫୦୦ ଟଙ୍କା ସଂଗ୍ରହ କରାଯାଇଛି। ଏହିକ୍ରମରେ ଗୋଟିଏ ବ୍ଲକରୁ ପ୍ରାୟ ୩୦ଲକ୍ଷ ଟଙ୍କା ସଂଗ୍ରହ କରାଗଲେ ଜିଲାର ପ୍ରାୟ ୩ କୋଟି ଟଙ୍କା ସଂଗ୍ରହ ହେବ। ତେଣୁ ଏହି ସଂଗ୍ରହ ଅର୍ଥ କେଉଁ ବିଭାଗକୁ ଯିବ ତାହା ଏଯାଏ ସ୍ପଷ୍ଟ କରାଯାଇ ପାରିନାହିଁ। ତେଣୁ ଲୋକଙ୍କ ସନ୍ଦେହକୁ ଦୂର କରିବା ପାଇଁ ଜିଲାପାଳ ଏଥିପ୍ରତି ଦୃଷ୍ଟି ଦେବା ସହ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସାମାଜିକ କର୍ମୀ ଦାସ ନିବେଦନ କରିଛନ୍ତି।