ନବରଙ୍ଗପୁର,୨୦।୧୦(ସଦାଶିବ ପ୍ରହରାଜ): ଅଧାପନ୍ତରିଆ ନିର୍ମାଣ କାର୍ଯ୍ୟକୁ ସମ୍ପୂର୍ଣ୍ଣ ହୋଇଥିବା ଦେଖାଇ ଉଦ୍ଘାଟନ କରାଯାଇଛି। ହେଲେ ଉଦ୍ଘାଟନର ବର୍ଷେ ବିତିନି ରଙ୍ଗ ଛାଡି ସୌନ୍ଦର୍ଯ୍ୟ ହଜିଗଲାଣି। ତଥାପି ଅସମ୍ପୂର୍ଣ୍ଣ କାମ ସମ୍ପୂର୍ଣ୍ଣ ହୋଇପାରୁନାହିଁ । ଅନିୟମିତତା ସହିତ ଅଧୁରା ଦଦରା ଶ୍ରେଣୀ ଗୃହରେ ପିଲାଙ୍କ ପାଠପଢ଼ା ଓ ଭବିଷ୍ୟତ ଗଢ଼ାଚାଲିଛି। ଏଭଳି ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ କଣ୍ଟାଗାଁ ପଞ୍ଚାୟତ ସଦର ମହାକୁମ୍ମାଠାରେ ।
ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଅଧୀନ କଣ୍ଟାଗାଁ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ୫-ଟି ଅଧୀନରେ ରୂପାନ୍ତରିତ କରାଯାଇ ରଙ୍ଗ ଦିଆଯିବା ସହିତ ବିଭିନ୍ନ ମରାମତି କାର୍ଯ୍ୟ ଏବଂ ଶ୍ରେଣୀ ଗୃହ ନିର୍ମାଣ କରାଗଲା। ପୁରୁଣା ଟିଣ ଛପର ଶ୍ରେଣୀଗୃହର ମରାମତି ପାଇଁ କାନ୍ଥରୁ ପ୍ଲାଷ୍ଟର ଛଡାଇ ଦିଆଗଲା । ଟିଣଗୁଡିକ ଅତି ପୁରୁଣା ହୋଇଥିବାରୁ ଶ୍ରେଣୀ ଗୃହରେ ପାଣି ଗଲୁଛି । ଏ ନେଇ ନୂଆ ଟିଣ ପକାଇବାକୁ ବ୍ୟବସ୍ଥା ଥିଲା। ୪୦ ଲକ୍ଷରୁ ଊର୍ଦ୍ଧ୍ୱ ଟଙ୍କାରେ ବିଦ୍ୟାଳୟଗୁଡିକ ରୂପାନ୍ତରିତ କରାଗଲା । କିନ୍ତୁ ଆବଶ୍ୟକ ଥିବା ଶ୍ରେଣୀଗୃହ ମରାମତି ହୋଇପାରିଲା ନାହିଁ । ଫଳରେ ବିପଦସଙ୍କୁଳ ଶ୍ରେଣୀ ଗୃହରେ କୋମଳମତି ଶିଶୁଙ୍କ ପାଠପଢା ଚାଲିଛି ।
କୌଣସି ଅଘଟଣ ଘଟିଲେ ତା’ ପାଇଁ କିଏ ଦାୟୀ ରହିବ ବୋଲି ପ୍ରଶ୍ନ ଉଠୁଛି । ଅନ୍ୟପଟେ ଭାଜପା ସରକାର ଆସିବା ପରେ ଆଉ ୫-ଟି କାମ କରୁନାହିଁ । ଏହି ନାମ ମଧ୍ୟ ଉଭେଇ ଗଲାଣି । ଏବେ ଅଧୁରା କାର୍ଯ୍ୟ କିଭଳି ସମ୍ପୂର୍ଣ୍ଣ ହେବ ସେ ନେଇ ବିଦ୍ୟାଳୟ କର୍ତ୍ତୃପକ୍ଷ ଓ ଅଭିଭାବକମାନେ ଚିନ୍ତାରେ ରହିଛନ୍ତି । ଏ ନେଇ ତେନ୍ତୁଳିଖୁଣ୍ଟି ବିଡିଓ ମନୋଜ ପାଣିଗ୍ରାହୀଙ୍କୁ ପଚରିବାରୁ ଯେଉଁ ଠିକାଦାର ପୂର୍ବରୁ କାମ କରୁଥିଲେ ସେ ତାଙ୍କ ସହିତ ଯୋଗାଯୋଗ କରି ଉକ୍ତ ଅସମ୍ପୂର୍ଣ୍ଣ କାର୍ଯ୍ୟ କିଭଳି ଶେଷ ହେବ ସେଥି ପ୍ରତି ଗୁରୁତ୍ୱ ଦେବେ ବୋଲି କହିଛନ୍ତି।