ବିଶ୍ରା,୨୬ା୧୧( ବଟକୃଷ୍ଣ ସ୍ବାଇଁ)ରାଜ୍ୟ ସରକାର ଆଦିବାସୀ ଉନ୍ନୟନ ବିଭାଗ ଅଧୀନରେ ସେବାଶ୍ରମ ଓ ଆଶ୍ରମ ଉଚ୍ଚବିଦ୍ୟାଳୟ ଖୋଲି ଅନୁସୂଚିତ ଜାତି ଓ ଜନଜାତି ପିଲାଙ୍କ ପାଇଁ ଶିକ୍ଷାର ସମସ୍ତ ସୁବିଧା କରିଛନ୍ତି। ବିଦ୍ୟାଳୟ ସହ ଛାତ୍ରାବାସ ଓ ଛାତ୍ରୀନିବାସ ମଧ୍ୟ ନିର୍ମାଣ କରାଯାଇଛି। ହେଲେ କେତେକ ଜାଗାରେ ବିଦ୍ୟାଳୟକୁ ଶିକ୍ଷକ ଆସୁନାହାଁନ୍ତି ତ ଆଉକେଉଁଠି ଛାତ୍ରୀଛାତ୍ର। ଏଭଳି ଅବ୍ୟବସ୍ଥା ଦେଖିବାକୁ ମିଳିଛି ସୁନ୍ଦରଗଡ ଜିଲା ସୀମାନ୍ତ ବିଶ୍ରା ବ୍ଲକ ଉପାନ୍ତ ଅଞ୍ଚଳରେ ଥିବା ଏରିଲା ଆଶ୍ରମ ବିଦ୍ୟାଳୟ ଓ କୁଲେନବାହଲ ସେବାଶ୍ରମରେ। ଏରିଲା ବିଦ୍ୟାଳୟରେ ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ୬୫ ଛାତ୍ରୀଛାତ୍ର ରହିଛନ୍ତି। ହେଲେ କଲ୍ୟାଣ ବିଭାଗ ପକ୍ଷରୁ ମାତ୍ର ୪ ଜଣ ଶିକ୍ଷକ ନିଯୁକ୍ତି ହୋଇଛନ୍ତି। ପ୍ରତ୍ୟେକ ଦିନ ପ୍ରଧାନ ଶିକ୍ଷକ ସରକାରୀ କାମରେ ଯାଉଛନ୍ତି। ମାତ୍ର ୩ ଜଣ ଶିକ୍ଷକରେ ଚାଲିଛି ବିଦ୍ୟାଳୟ। ସେହିପରି କୁଲେନବହଲ ସେବାଶ୍ରମରେ ପ୍ରଥମରୁ ପଞ୍ଚମ ଶ୍ରେଣୀ ଯାଏଁ ରହିଥିବାବେଳେ ମୋଟ ୫୯ ଛାତ୍ରୀଛାତ୍ରଙ୍କ ନାମ ଲେଖାଯାଇଛି। ହେଲେ ବିଦ୍ୟାଳୟକୁ ସେହି ଅନୁସାରେ ଛାତ୍ରୀଛାତ୍ର ଆସୁନାହାଁନ୍ତି। ସେମାନଙ୍କ ପାଇଁ ମାତ୍ର ୩ ଜଣ ଶିକ୍ଷକ ନିଯୁକ୍ତି ହୋଇଛନ୍ତି। ଏହି ବିଷୟରେ ବ୍ଲକ କଲ୍ୟାଣ ସମ୍ପ୍ରସାରଣ ଅଧିକାରୀ ଆରତୀ ସ୍ବାଇଁଙ୍କୁ ପଚାରିବାରୁ, ବିଦ୍ୟାଳୟରେ ପାଣିର ସମସ୍ୟା ଥିବାରୁ ପିଲାମାନେ ଆସୁ ନ ଥିଲେ। ବର୍ତ୍ତମାନ ସବୁ ସୁବିଧା ରହିଛି। ଶିକ୍ଷକ ସମସ୍ୟା ନେଇ ପଚାରିବାରୁ ଉଚ୍ଚ ଅଧିକାରୀଙ୍କୁ ଲିଖିତ ଅନୁରୋଧ କରାଯାଇଛି ବୋଲି ଅଧିକାରୀ ସ୍ବାଇଁ କହିଥିଲେ।
