ପଟାଙ୍ଗି,୨୨ା୯(ଶରତ ଧଳ): ମା’ ସହ ଚାଷଜମିକୁ ଯାଉଥିବା ସମୟରେ ଗୋଡ଼ ଖସି ଏକ ଗାତରେ ପଡ଼ି ଶିଶୁକନ୍ୟାଙ୍କ ମୃତ୍ୟୁ ହୋଇଥିବା ବେଳେ ଝିଅକୁ ହରାଇ ପରିବାରବର୍ଗ ଭାଙ୍ଗି ପଡିଥିବା ଦୃଶ୍ୟ ଗ୍ରାମରେ ଶୋକାକୁଳ ପରିବେଶ ସୃଷ୍ଟି କରିଛି। ଏହିପରି ଅଭାବନୀୟ ଘଟଣା ଘଟିଛି କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ରାଲେଗଡ଼ା ପଞ୍ଚାୟତର ଉପରସାହିରେ ବସବାସ କରୁଥିବା ମାଧବ ସାକିଆଙ୍କ ପରିବାର କ୍ଷେତ୍ରରେ।
ସୂଚନାନୁଯାୟୀ, ମାଧବ ସାକିଆଙ୍କ ସ୍ତ୍ରୀ ରାଧାମଣି ଗୁଣ୍ଠା ସକାଳୁ ଗ୍ରାମ ନିକଟସ୍ଥ ନିଜ ଚାଷଜମିକୁ ସାନ ଝିଅ ନୟନା(୨)ଙ୍କୁ ନିଜ ସାଥୀରେ ନେଇ ଯାଉଥିଲେ। କିନ୍ତୁ ମା’ ଚାଲିଚାଲି କିଛି ବାଟ ଆଗକୁ ଚାଲି ଯାଇଥିବା ବେଳେ ଝିଅ ନୟନା ମା’ଙ୍କ ପଛେ ପଛେ ଯାଉଥିବା ସମୟରେ ହଠାତ୍ ଗୋଡ଼ ଖସି ଏକ ଖାଲରେ ପଡ଼ିଯାଇଥିଲେ। ଶିଶୁକନ୍ୟା ଖାଲରେ ପଡ଼ିଯିବା ଶବ୍ଦ ଶୁଣି ମା’ସଙ୍ଗେ ସଙ୍ଗେ ଫେରି ଆସି ଘଟଣାସ୍ଥଳରୁ ଝିଅକୁ ଉଧାର କରିବା ପାଇଁ ଚେଷ୍ଟା କରିଥିଲେ ମଧ୍ୟ ଖାଲରେ ଭରି ହୋଇ ରହିଥିବା ବର୍ଷା ପାଣିରେ ବୁଡ଼ିଯାଇଥିଲେ। ମା’ଙ୍କ ଚିତ୍କାର ଶୁଣି ଘଟଣାସ୍ଥଳରେ ଗ୍ରାମବାସୀ ପହଞ୍ଚି ଗାତରୁ ବାହାର କରି ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚାଇ ଚିକିତ୍ସା କରିବା ପାଇଁ ଚେଷ୍ଟା କରିଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ। ଶେଷରେ ଶିଶୁକନ୍ୟାକୁ ହରାଇ ବାପା ମାଧବ ସାକିଆ ପୋଲିସ ନିକଟରେ ପହଞ୍ଚି ଲିଖିତ ଅଭିଯୋଗ କରିବା ପରେ ପୋଲିସ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାରଙ୍କୁ ହସ୍ତାନ୍ତର କରି ଏକ କେସ୍ ରୁଜୁ କରି ତଦନ୍ତ ଆରମ୍ଭ କରିଥିବା ଜଣାପଡ଼ିଛି।
ଅନ୍ୟପକ୍ଷରେ ଏହିପରି ଦୁଃଖଦ ଘଟଣା ସମ୍ପର୍କରେ ଖବର ପାଇ ବ୍ଲକ ଉପାଧ୍ୟକ୍ଷ ତ୍ରିନାଥ କଟା ଓ ଜିଲାପରିଷଦ ସଭ୍ୟ ଲଇଚନ ଖରା ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ପରିବାରବର୍ଗ ଏବଂ ଗ୍ରାମବାସୀଙ୍କ ସହ ଘଟଣା ସମ୍ପର୍କରେ ଆଲୋଚନା କରି ମୃତଦେହ ତାଙ୍କ ଗ୍ରାମକୁ ପଠାଇବା ନିମନ୍ତେ ସହଯୋଗ କରିଥିଲେ।