ନୂଆଦିଲ୍ଲୀ, ୨୬।୫-ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଆଗାମୀ ଜୁନ୍ ୧୮ରୁ ଇଂଲଣ୍ଡର ସାଉଥାମ୍ପଟନଠାରେ ଆରମ୍ଭ ହେବ। କେଉଁ ଦଳ ଫାଇଦାରେ ରହିବ ଏହାକୁ ନେଇ ଆଲୋଚନା ଆରମ୍ଭ ହୋଇଛି। ଏଥିରେ ସାମିଲ ହୋଇଛନ୍ତି ନ୍ୟୁଜିଲାଣ୍ଡ କ୍ରିକେଟ କିମ୍ବଦନ୍ତୀ ରିଚାର୍ଡ ହାଡ୍ଲି। ପରିବେଶ ସହିତ ଯେଉଁ ଦଳ ନିଜକୁ ଅଧିକ ଖାପ ଖୁଆଇ ପାରିବ ସେ ସେତେ ଫାଇଦାରେ ରହିବ। ଇଂଲଣ୍ଡରେ ଥଣ୍ଡା ପରିବେଶ ନ୍ୟୁଜିଲାଣ୍ଡକୁ ସୁହାଇପାରେ ବୋଲି ହାଡ୍ଲି ପୂର୍ବାନୁମାନ କରିଛନ୍ତି।
କେଉଁ ଦଳ ଅଧିକ ପ୍ରସ୍ତୁତ ହୋଇଛି ଏବଂ ଇଂଲଣ୍ଡର ଥଣ୍ଡା ପରିବେଶ ସହିତ ନିଜକୁ ଶୀଘ୍ର ଖାପ ଖୁଆଇ ପାରୁଛି ତା’ ଉପରେ ଅନେକ କିଛି ନିର୍ଭର କରିବ। ପାଣିପାଗର ଅନେକ ଭୂମିକା ରହିବ। ଯଦି ଅଧିକ ଥଣ୍ଡା ପଡ଼ିବ ତେବେ ନ୍ୟୁଜିଲାଣ୍ଡ ଫାଇଦାରେ ରହିବ। ଡ୍ୟୁକ୍ ବଲ୍ ଉଭୟ ଦଳର ଫାଷ୍ଟ ବୋଲରଙ୍କୁ ସୁହାଇବ। ବିଶେଷକରି ପ୍ରକୃତ ସୁଇଂ ବୋଲର ଏଥିରୁ ଅଧିକ ଫାଇଦା ପାଇବେ। ଏ କ୍ଷେତ୍ରରେ ଦେଖିବାକୁ ଗଲେ ଟିମ୍ ସୌଦୀ, ଟ୍ରେଣ୍ଟ ବୋଲ୍ଟ ଏବଂ କାଏଲ ଜେମିସନଙ୍କୁ ନେଇ ଶାଣିତ ନ୍ୟୁଜିଲାଣ୍ଡ ପେସ୍ ବାହିନୀ ପ୍ରଭାବୀ ରହିବ। ଯଦି ବଲ୍ ପିଚ୍ର ଉଭୟ ଦିଗକୁ ସୁଇଂ କରେ ତେବେ ୨ଟି ଯାକ ଦଳର ବ୍ୟାଟ୍ସମ୍ୟାନ ଚ୍ୟାଲେଞ୍ଜର ସମ୍ମୁଖୀନ ହେବେ ବୋଲି ହାଡ୍ଲି କହିଛନ୍ତି। ବିରାଟ କୋହଲିଙ୍କ ଟିମ୍ ଇଣ୍ଡିଆ କିମ୍ବା କେନ୍ ଓ୍ବିଲିୟମସନଙ୍କ ନେତୃତ୍ୱାଧୀନ ନ୍ୟୁଜିଲାଣ୍ଡ ମଧ୍ୟରୁ ଜଣକୁ ବିଜେତା ବାଛିବା କଷ୍ଟକର ବୋଲି ସେ କହିଛନ୍ତି। ଉଭୟ ଦଳରେ ହାଇ-କ୍ଲାସ ବ୍ୟାଟ୍ସମ୍ୟାନ ଅଛନ୍ତି। ତେଣୁ ମ୍ୟାଚ ନିଶ୍ଚିତ ରୋମାଞ୍ଚକ ଏବଂ ଦେଖିବାଭଳି ହେବ ବୋଲି ସେ କହିଛନ୍ତି। ବିଶ୍ୱ ଟେଷ୍ଟ ଚାମ୍ପିୟନଶିପ୍ ଟେବୁଲରେ ଭାରତ ଓ ନ୍ୟୁଜିଲାଣ୍ଡ ଶୀର୍ଷ ଦୁଇସ୍ଥାନ ଅଧିକାର କରି ଫାଇନାଲ ଖେଳିବାକୁ ଯୋଗ୍ୟ ବିବେଚିତ ହୋଇଛନ୍ତି। ତେବେ ଏହା ଇଂଲଣ୍ଡରେ ନିରପେକ୍ଷ ଭେନ୍ୟୁରେ ହେବାକୁ ଯାଉଥିବାରୁ କୌଣସି ଦଳ ଘରୋଇ ଆଡ୍ଭାଣ୍ଟେଜ୍ ପାଇବେ ନାହିଁ ବୋଲି ସେ ସ୍ପଷ୍ଟ କରିଛନ୍ତି।