ନାଉଗାଁ,୨୪।୭ (ସ୍ବ.ପ୍ର.): ନାଉଗାଁବ୍ଲକ ଅନ୍ତର୍ଗତ ବାଂଶ- ଗୋବରୀକୂଳ ରାସ୍ତା ଅବସ୍ଥା ଶୋଚନୀୟ ହୋଇଯାଇଛି। ରାସ୍ତାଟି କାଦୁଅରେ ପୂରି ଯାଇଥିବାରୁ ଲୋକେ ଯାତାୟାତ ବେଳେ ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ସାଧାରଣରେ ଅସନ୍ତୋଷ ବଢ଼ିବାରେ ଲାଗିଛି। ସୂଚନାଯୋଗ୍ୟ, ଏହି ବ୍ଲକ ଦେଇ ପ୍ରବାହିତ ଗୋବରୀ ନାଳର ପୁନରୁଦ୍ଧାର କାର୍ଯ୍ୟ ୨୦୨୦-୨୧ ଆର୍ଥତ୍କ ବର୍ଷରୁ ଜଳସମ୍ପଦ ବିଭାଗ ଦ୍ୱାରା କରାଯାଉଛି। ସ୍ଥାନୀୟ ବାସିନ୍ଦାଙ୍କ ଆବଶ୍ୟକତାକୁ ଗୁରୁତ୍ୱ ଦିଆଯାଇ ବାଂଶ-ଗୋବରୀକୂଳ ନିକଟରେ ଏହି ନାଳ ଉପରେ ଏକ ସେତୁ ନିର୍ମାଣ କରାଯାଇଛି। ୧ ଏପ୍ରିଲ ୨୦୨୧ରେ ବିଧାୟକ ପ୍ରଶାନ୍ତ ମୁଦୁଲିଙ୍କ ଦ୍ୱାରା ଏହି ସେତୁ କାର୍ଯ୍ୟର ଭିତ୍ତିପ୍ରସ୍ତରସ୍ଥାପନ ହୋଇଥିଲା। ଏହି ସେତୁ ନିର୍ମାଣ କାର୍ଯ୍ୟ ସରିଯାଇଛି। ଏହାର ଉଭୟ ପାର୍ଶ୍ୱକୁ ସଂଯୋଗୀକରଣ ରାସ୍ତା ନିର୍ମାଣ କରାଯାଇଛି। ଏହି ରାସ୍ତାର କିଛି ସ୍ଥାନରେ ମାଟି ପଡ଼ିଥିବାବେଳେ ଆଉ କିଛି ଜାଗାରେ ବାକି ରହିଛି। ଏବେ ବର୍ଷା ହେବା ପରେ ଉକ୍ତ ରାସ୍ତାଟି କାଦୁଅରେ ପରିପୂର୍ଣ୍ଣ ହୋଇଯାଇଛି। ଫଳରେ ଗୋବରୀକୂଳ ଓ ବାଂଶ ପଡାବାସୀ ଘରୁ ବାହାରି ପାରୁନାହାନ୍ତି। ଯାତାୟାତ ନିମନ୍ତେ ଉକ୍ତ ରାସ୍ତାରେ ନାଲି ମାଟି ଓ ବାଲି ପକାଇବା ପାଇଁ ନରହରି ସାହୁ,କାଳନ୍ଦୀ ମହାରଣା, ମଧୁ ମହାରଣା, ରବୀନ୍ଦ୍ର ଭଞ୍ଜ ଓ ଗୁରୁବାରି ଭୋଇ ପ୍ରମୁଖ ପ୍ରଶାସନ ନିକଟରେ ଦାବି କରିଛନ୍ତି। ଏ ସମ୍ପର୍କରେ ଯନ୍ତ୍ରୀ ସୂର୍ଯ୍ୟକାନ୍ତ ଦୀକ୍ଷିତ କହିଛନ୍ତି, ଯଥାଶୀଘ୍ର ଉକ୍ତ ରାସ୍ତାରେ ବାଲି ମୋରମ ପକାଯିବା ପାଇଁ ବ୍ୟବସ୍ଥା କରାଯିବ।