ରଘୁନାଥପୁର,୨୩।୫, (ରାଜେନ୍ଦ୍ର ନାରାୟଣ ସିଂହ): ବର୍ବରତା ସୀମା ଟପିଲା। ଗୋରୁ ପୋଖରୀରୁ ପାଣି ପିଇବାରୁ ସେମାନଙ୍କ ଉପରେ ଗୁଳି ମାଡ଼ ହୋଇଛି। ଫଳରେ ୩ ଗୋରୁ ଓ ଏକ ବାଛୁରୀ ଆହତ ହୋଇଛନ୍ତି। ଏଭଳି ଘଟଣା ରଘୁନାଥପୁର ଥାନା ପୂରଣଓଡପଡ଼ା ଗ୍ରାମରେ ଦେଖିବାକୁ ମିଳିଛି। ଏ ସମ୍ପର୍କରେ ଗ୍ରାମର ବ୍ରଜରାଜ ବେହେରାଙ୍କ ସ୍ତ୍ରୀ ଚାରୂଲତା ଉକ୍ତ ଗ୍ରାମର ଗୌତମ ପାଲିତଙ୍କ ନାମରେ ମଙ୍ଗଳବାର ଥାନାରେ ଅଭିଯୋଗ କରିଛନ୍ତି। ଏହାପରେ ଥାନାରେ ମାମଲା (ନଂ. ୧୨୧/୨୪) ରୁଜୁ କରାଯାଇ ଆନିମଲ ଆକ୍ଟ ଅନୁସାରେ ଗୌତମଙ୍କ ଗିରଫ ପରେ କୋର୍ଟ ଚାଲାଣ କରାଯାଇଛି। ଅପରପକ୍ଷେ ପୋଲିସର ସହଯୋଗ ମନବୃତ୍ତି ଓ କୋହଳ ଦଫା ଯୋଗୁ ଗୌତମଙ୍କୁ ଜାମିନ ମିଳିଥିବା ଅଭିଯୋଗ ହେଉଛି। ଚାରୂଲତାଙ୍କ ଅଭିଯୋଗ ଅନୁଯାୟୀ, ସକାଳ ୭ଟା ସମୟରେ ସେ ପଡ଼ିଆରେ ଗୋରୁ ବାଛୁରୀଙ୍କୁ ଚରିବା ପାଇଁ ଛାଡ଼ି ଦେଇଥିଲେ। ଗୋରୁ ବାଛୁରୀ ଏହି ସମୟରେ ଗୌତମଙ୍କ ପୋଖରୀକୁ ପାଣି ପିଇବା ପାଇଁ ଚାଲିଯିବାରୁ ସେ ଉତ୍ତ୍ୟକ୍ତ ହୋଇ ଏହି ନିରୀହ ପ୍ରାଣୀଙ୍କ ଉପରକୁ ଏଆର୍ ଗନରୁ ୮ଟି ଗୁଳି ଫୁଟାଇଥିଲେ। ଚାରୂଲତା ସମସ୍ତ ଗୋରୁଙ୍କୁ ପ୍ରାଣୀ ଡାକ୍ତରଖାନା ନେଇ ଚିକିତ୍ସା କରାଇଛନ୍ତି। ଏଥିସହ ଅଭିଯୁକ୍ତ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।