କେନ୍ଦୁଝର,୨୪ା୧୧: କର୍ମମୟ ଜୀବନରେ ନିଜକୁ ଟିକିଏ ସତେଜ କରିବା ପାଇଁ ସମସ୍ତଙ୍କୁ ଚା’ର ଆବଶ୍ୟକତା ରହିଛି। ଅଫିସ୍, କଳକାରଖାନା ତଥା ଯେ, କୌଣସି କର୍ମ କ୍ଷେତ୍ରରେ କାମ କରୁଥିବା ଅଫିସର ଓ କର୍ମଚାରୀ ସମସ୍ତଙ୍କୁ ଟି-ବେକ୍ ନିହାତି ଆବଶ୍ୟକ। ଟିକିଏ ଚା’ ହେଇଗଲେ ପୁଣି କାମ କରିବାକୁ ଶକ୍ତି ଫେରି ଆସିଲା ଭଳି ଅନୁଭୂତ ହୁଏ। ଏବେ ଯୁଗ ଅନୁଯାୟୀ ବିଭିନ୍ନ ପ୍ରକାରର ଚା’ ପ୍ରସ୍ତୁତ ହେଉଛି। କେନ୍ଦୁଝରର ଏକ ଯୁବକ ମଟକା ଚା’ ବିକ୍ରି କରି ରୋଜଗାରକ୍ଷମ ହୋଇପାରିଛନ୍ତି।
କେନ୍ଦୁଝର ସହରରେ ସାମନ୍ତରାୟପୁର ନିବାସୀ ଶିବଶକ୍ତି ସ୍ବାଇଁ ମାଟି ହାଣ୍ଡିରେ ମସଲା ଚା’ ତିଆରି କରି ବିକ୍ରି କରୁଛନ୍ତି। ଘରେ ମା’ ଓ ସହଧର୍ମିଣୀଙ୍କୁ ନେଇ ତାଙ୍କର ପରିବାର। ଶିବ ମାଟ୍ରିକ୍ ପାସ୍ ପରେ ବିଭିନ୍ନ ଅନୁଷ୍ଠାନରେ ଚାକିରି କରିଥିଲେ। ମାତ୍ର କୌଣସି କାମରେ ସନ୍ତୋଷ ନ ମିଳିବାରୁ ନିଜେ କିଛି ବ୍ୟବସାୟ କରି ରୋଜଗାର କରିବାକୁ ଚିନ୍ତା କରି ମାଟି ହାଣ୍ଡି ତଥା ମଟ୍କା ଚା’ ତିଆରି କରିବା ଆରମ୍ଭ କରିଥିଲେ। ପ୍ରଥମେ ଲୋକେ ଚା’ ସମ୍ପର୍କରେ ଜାଣି ନ ଥିବାରୁ ବିକ୍ରି ହେଉ ନ ଥିଲା। କିନ୍ତୁ ବର୍ତ୍ତମାନ ଅଞ୍ଚଳରେ ତାଙ୍କ ମଟ୍କା ଚା’ର ଚାହିଦା ବଢ଼ିଯାଇଛି। ସକାଳ ଓ ସନ୍ଧ୍ୟା ବେଳେ ଏହି ମସଲା ମଟ୍କା ଚା’ ପିଇବା ପାଇଁ ବେଶ୍ ଭିଡ଼ ଜମୁଛି। ଏହି ଚା’ ଭଲ କ୍ଷୀର ସହ ନାମୀ କମ୍ପାନୀର ଚା’ପତି ଏବଂ ଗୋଲମରିଚ ଗୁଣ୍ଡ, ଅଳେଇଚ, ଗୁଜୁରାତି, ଡାଲଚିନି ଗୁଣ୍ଡ ପ୍ରଭୃତି ମିଶା ଯାଉଥିବାରୁ ଚା’ର ସ୍ବାଦ ରୁଚିକର ହେଉଥିବା ଏଠାରେ ନିୟମିତ ଚା’ ପିଉଥିବା ଗ୍ରାହକ ଅଜୟ ମିଶ୍ର ଓ ପୁପୁନ ପଟ୍ଟନାୟକ ପ୍ରକାଶ କରିଛନ୍ତି। ଅଳ୍ପଦିନ ମଧ୍ୟରେ ପ୍ରତିଦିନ ୨୦୦ କପ୍ ଚା’ ବିକ୍ରି କରୁଛନ୍ତି। ସମସ୍ତଙ୍କୁ ମଧ୍ୟ ଚା’ କରି ଯୋଗାଇ ପାରୁନ ଥିବା ଶିବଶକ୍ତି ପ୍ରକାଶ କରିଛନ୍ତି। ଏପରିକି ସନ୍ଧ୍ୟା ସମୟରେ ମହିଳାମାନେ ମଧ୍ୟ ଆସି ଚା’ ପିଉଥିବାର ଲକ୍ଷ୍ୟ କରାଯାଉଛି।
ଦୀପକ ମିଶ୍ର