ନୂଆଦିଲ୍ଲୀ, ୧୭।୮: ମହେନ୍ଦ୍ର ସିଂ ଧୋନୀଙ୍କ ଅବସର ଘୋଷଣା କରିବାର କିଛି ସମୟ ଅନ୍ତରରେ ଭାରତୀୟ କ୍ରିକେଟ୍ ଦଳ ମଧ୍ୟକ୍ରମ ବ୍ୟାଟ୍ସମ୍ୟାନ ସୁରେଶ ରାଇନା ମଧ୍ୟ ତାଙ୍କ ପଦାଙ୍କ ଅନୁସରଣ କରିଥିଲେ। ଶନିବାର ଉଭୟ ଧୋନୀ ଓ ରାଇନା ସୋସିଆଲ ମିଡିଆ ଇନ୍ଷ୍ଟାଗ୍ରାମ ଜରିଆରେ ଅବସର ନେଇ ସୂଚନା ଦେଇଥିଲେ। ତେବେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ଅଫିସିଆଲ ଭାବେ କେବଳ ଧୋନୀଙ୍କ ଅବସର ନେଇ ସୂଚନା ଦିଆଯାଇଥିଲା। କିନ୍ତୁ ରାଇନାଙ୍କ ବିଷୟରେ ବିସିସିଆଇ ଏହାର ଅଫିସିଆଲ ଟୁଇଟର୍ ପୃଷ୍ଠାରେ କିଛି ଉଲ୍ଲେଖ କରି ନ ଥିଲା। ଏହାର ଦିନକ ପରେ ବିସିସିଆଇ ରାଇନାଙ୍କ ଅବସର ନେଇ ସୂଚନା ଦେଇଛି।
ବିସିସିଆଇ ପକ୍ଷରୁ କୁହାଯାଇଛି ଯେ, ‘ବାମହାତୀ ବ୍ୟାଟ୍ସମ୍ୟାନ ସୁରେଶ ରାଇନା ଅନ୍ତର୍ଜାତୀୟ କ୍ରିକେଟ୍ରୁ ଅବସର ନେଇଥିବା ନିଷ୍ପତ୍ତି ଆନୁଷ୍ଠାନିକ ଭାବେ ରବିବାର ବୋର୍ଡକୁ ଜଣାଇଛନ୍ତି। ସାଧାରଣତଃ ଭାବେ ଅବସର ଘୋଷଣା ପୂର୍ବରୁ ଖେଳାଳିମାନେ ବୋର୍ଡକୁ ପ୍ରଥମେ ଜଣାଇଥାନ୍ତି।’ ବିସିସିଆଇ ସଭାପତି ଗାଙ୍ଗୁଲି ତାଙ୍କର ଏକ ବିବୃତ୍ତିରେ ରାଇନାଙ୍କୁ ପ୍ରଶଂସା କରି କହିଛନ୍ତି, ‘ସୀମିତ ଓଭର ଫର୍ମାଟ୍ରେ ରାଇନା ଭାରତ ପାଇଁ ଜଣେ ଗୁରୁତ୍ୱପୂର୍ଣ୍ଣ ଖେଳାଳି ଥିଲେ। ନିମ୍ନକ୍ରମରେ ଆସି ମ୍ୟାଚ୍ ବିଜୟୀ ଇନିଂସ ଖେଳିବା ଲାଗି ବହୁତ କୌଶଳ ଓ ପ୍ରତିଭାର ଆବଶ୍ୟକ ହୋଇଥାଏ। ରାଇନା ଓ ଯୁବରାଜ ମିଳିତ ଭାବେ ଦିନିକିଆ କ୍ରିକେଟ୍ରେ ଭାରତ ପାଇଁ ମଧ୍ୟକ୍ରମ ଲାଇନ୍ଅପକୁ ଦୃଢ଼ କରିଥିଲେ। ମୁଁ ତାଙ୍କୁ ଓ ତାଙ୍କ ପରିବାରକୁ ଶୁଭେଚ୍ଛା ଜଣାଉଛି।’
ଉଲ୍ଲେଖଯୋଗ୍ୟ, ଧୋନୀ ଅବସର ଘୋଷଣା କରିବା ପୂର୍ବରୁ ପ୍ରଥମେ ବିସିସିଆଇକୁ ଜଣାଇଥିଲେ। କିନ୍ତୁ ରାଇନା ଏହା ନ କରି ସୋସିଆଲ ମିଡିଆରେ ପ୍ରଥମେ ଅବସର ସୂଚନା ଦେଇଥିଲେ। ତେଣୁ ବିସିସିଆଇ କେବଳ ଧୋନୀଙ୍କ ଅବସର ନେଇ ଏହାର ଅଫିସିଆଲ ଟୁଇଟର୍ ଆକାଉଣ୍ଟରେ ଉଲ୍ଲେଖ କରିଥିଲା।