ନୂଆଦିଲ୍ଲୀ,୬।୧୨: ଉପରାଷ୍ଟ୍ରପତି ଜଗଦୀପ ଧନଖର କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂ ଚୌହାନଙ୍କୁ ପ୍ରଥମେ ଗାଳି ଦେବା ପରେ ଏବେ ତାଙ୍କୁ ପ୍ରଶଂସା କରିଛନ୍ତି। ଧନଖର ନିକଟରେ କୃଷକଙ୍କ ସହ ଏକ କାର୍ଯ୍ୟକ୍ରମରେ ଶିବରାଜଙ୍କୁ ଏକ ପ୍ରଶ୍ନ ପଚାରିଥିଲେ,ଚାଷୀଙ୍କ ସହ କାହିଁକି ଆଲୋଚନା ହେଉନାହିଁ। ରାଜ୍ୟସଭାରେ ସେହି କାର୍ଯ୍ୟକ୍ରମ ବିଷୟରେ ଉଲ୍ଲେଖ କରି ଧନଖର କହିଛନ୍ତି, ଶିବରାଜ ତାଙ୍କ ନାମ ପରି ଶକ୍ତିଶାଳୀ। ମୁଁ ଆଶା କରୁଛି ସେ ଚାଷୀଙ୍କ ପାଇଁ କାମ କରିବେ।
ଧନଖର କହିଛନ୍ତି, ମୁଁ ସମ୍ପୂର୍ଣ୍ଣ ଭାବେ ନିଶ୍ଚିତ ଯେ ଯିଏ ସମସ୍ତଙ୍କ ପ୍ରିୟ ବୋଲି ସୁନାମ ଅର୍ଜନ କରିଛନ୍ତି,ସେ କୃଷକଙ୍କ ପ୍ରିୟ ହେବେ। ତାଙ୍କ ନାମ ଅନୁଯାୟୀ ସେ ଜଣେ ଶକ୍ତିଶାଳୀ ମନ୍ତ୍ରୀ। ତେଣୁ ସେ କୃଷକଙ୍କ ମନ କଥା ଶୁଣିବେ।
ଏହାପୂର୍ବରୁ ମଙ୍ଗଳବାର ଏକ କାର୍ଯ୍ୟକ୍ରମରେ ଧନଖର କାହିଁକି ଚାଷୀଙ୍କ ସହ ଆଲୋଚନା କରାଯାଉ ନାହିଁ ବୋଲି କେନ୍ଦ୍ର ସରକାରଙ୍କୁ ପ୍ରଶ୍ନ କରିଥିଲେ। ଏହି ସମୟରେ କୃଷି ମନ୍ତ୍ରୀ ଶିବରାଜ ସିଂ ଚୌହାନ ମଧ୍ୟ ମଞ୍ଚରେ ଥିଲେ। ଧନକର ପଚାରିଲେ, କୃଷି ମନ୍ତ୍ରୀ, ପ୍ରତ୍ୟେକ ମୁହୂର୍ତ୍ତ ଆପଣଙ୍କ ପାଇଁ ଗୁରୁତ୍ୱପୂର୍ଣ୍ଣ। ଭାରତର ସମ୍ବିଧାନ ଅନୁଯାୟୀ ଦ୍ୱିତୀୟ ସର୍ବୋଚ୍ଚ ପଦବୀରେ ଥିବା ବ୍ୟକ୍ତି ଭାବରେ ମୁଁ ଆପଣଙ୍କୁ ଅନୁରୋଧ କରୁଛି ଦୟାକରି ମୋତେ କୁହନ୍ତୁ, କୃଷକମାନଙ୍କୁ କୌଣସି ପ୍ରତିଶ୍ରୁତି ଦିଆଯାଇଛି କି ନାହିଁ ଏବଂ ସେହି ପ୍ରତିଶ୍ରୁତି କାହିଁକି ପାଳନ କରାଯାଇ ନାହିଁ? ପ୍ରତିଶ୍ରୁତି ପୂରଣ କରିବା ପାଇଁ ଆମେ କ’ଣ କରୁଛୁ? ଗତ ବର୍ଷ ମଧ୍ୟ ଏକ ଆନ୍ଦୋଳନ ହୋଇଥିଲା, ଏହି ବର୍ଷ ମଧ୍ୟ ଏକ ଆନ୍ଦୋଳନ ଚାଳିଛି ଏବଂ ସମୟ ଅତିବାହିତ ହେଉଛି, କିନ୍ତୁ ଆମେ କିଛି କରୁନାହୁଁ ।
ଏସବୁ ଦେଖି ମୋତେ କଷ୍ଟ ଲାଗୁଛି। ମୋର ଚିନ୍ତା ହେଉଛି ଏପର୍ଯ୍ୟନ୍ତ କାହିଁକି ପଦକ୍ଷେପ ନିଆଯାଇ ନାହିଁ? ଆପଣ କୃଷି ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ଅଟନ୍ତି। ମୋର ମନେ ଅଛି ସର୍ଦ୍ଦାର ପଟେଲ, ଦେଶକୁ ଏକ କରିବାର ଦାୟିତ୍ୱ ନେଇଥିଲେ, ସେ ଏହାକୁ ବହୁତ ଭଲ ଭାବରେ ପୂରଣ କରିଥିଲେ। ଏହି ଆହ୍ବାନ ଆଜି ଆପଣଙ୍କ ସମ୍ମୁଖରେ ଅଛି ଏବଂ ଏହାକୁ ଭାରତର ଏକତାଠାରୁ କମ ଭାବନ୍ତୁ ନାହିଁ। ତୁରନ୍ତ ଚାଷୀଙ୍କ ସହ ଆଲୋଚନା ହେବା ଉଚିତ ଏବଂ କୃଷକମାନଙ୍କୁ କୌଣସି ପ୍ରତିଶ୍ରୁତି ଦିଆଯାଇଛି କି ନାହିଁ ଆମେ ସମସ୍ତେ ଜାଣିବା ଉଚିତ୍।