ଝରିଗାଁ,୨୦।୮(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ବ୍ଲକ ଚଚା ପଞ୍ଚାୟତ ଅନ୍ତର୍ଗତ ଗବାଗୁଡା ଗ୍ରାମର ଜାନୀ ସାହିରେ ଶୁକ୍ରବାର ଏକ ଅଭାବନୀୟ ଘଟଣା ଘଟିଛି। ଜଣେ ଯୁବତୀ ସତୀଘାଟ ନଦୀ ପାର ହେଉଥିବା ବେଳେ ଭାସିଯାଇ ଦିନକ ପରେ ତାଙ୍କର ମୃତଦେହ ଉଦ୍ଧାର କରାଯାଇଛି। ସୂଚନାଯୋଗ୍ୟ, ଗବାଗୁଡା ଗ୍ରାମର ମନସାଇ ଜାନୀଙ୍କ ଝିଅ ତୁଲାବତୀ ଜାନୀ(୨୦) ଶୁକ୍ରବାର ସକାଳୁ ନଦୀ ପାର ହୋଇ ନିଜ ଚାଷ ଜମିକୁ ଯାଇଥିଲେ। ଅପରାହ୍ନରେ ସେ ଏକା ନଦୀ ପାର ହୋଇ ଘରକୁ ଫେରିବା ସମୟରେ ଉପର ମୁଣ୍ଡରେ ଲଗାଣ ବର୍ଷା ହେଉଥିବାରୁ ନଦୀରେ ହଠାତ୍ ବହୁତ ପାଣି ମାଡି ଆସିଥିଲା। ଫଳରେ ତୁଳାବତୀ ନଦୀ ପାଣିରେ ଭାସି ଯାଇଥିଲେ। ଝିଅ ଘରକୁ ଆସିବାର ବିଳମ୍ବ ହେବାରୁ ପରିବାର ଲୋକେ ବହୁତ ଖୋଜାଖୋଜି କରିଥିଲେ ସୁଦ୍ଧା ତୁଳାବତୀର କୌଣସି ପତ୍ତା ମିଳି ନ ଥିଲା। ଶନିବାର ସକାଳୁ ଝିଅ ନଦୀରେ ଭାସିଯାଇଥିବା ସନ୍ଦେହ କରି ପରିବାର ନଦୀ କୂଳରେ ଖଜାଖୋଜି କରିଥିଲେ। ଶେଷରେ ପ୍ରାୟ ୫କିଲୋମିଟର ଦୂରରେ ରହିଥିବା ଏକ ବୁଦା ମଧ୍ୟରେ ତୁଳାବତୀର ମୃତଦେହ ଦେଖିବାକୁ ପାଇଥିଲେ। ଏହାପରେ ପରିବାର ଲୋକେ ଝରିଗାଁ ପୋଲିସକୁ ଖବର ଦେଇଥିଲେ। ଘଟଣାସ୍ଥଳରେ ଥାନା ଏଏସ୍ଆଇ ଅଶୋକ କୁମାର ପାଳଙ୍କ ସହ ଏକ ପୋଲିସ ଟିମ୍ ଓ ସ୍ଥାନୀୟ ଅଗ୍ନିଶମ ବିଭାଗର କର୍ମଚାରୀ ପହଞ୍ଚି ମୃତଦେହ ଉଦ୍ଧାର କରିଥିଲେ। ଏନେଇ ଝରିଗାଁ ଥାନାରେ କେସ୍ ନଂ ୨୮/୨୦୨୨ରେ ଏକ ଅପମୃତ ମାମଲା ରୁଜୁ କରାଯାଇ ବ୍ୟବଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।