ଅନୁଗୋଳ ଅଫିସ, ୨୮।୧୨: ଆସନ୍ତା ୨୯ ତାରିଖ (ଗୁରୁବାର)ରେ ଅନୁଗୋଳ ଜିଲା ଗସ୍ତରେ ଆସୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହା ସରକାରୀ କାର୍ଯ୍ୟକ୍ରମ ହୋଇଥିବାବେଳେ ଏହି ଅବସରରେ ସେ ୧,୪୯୨ କୋଟି ଟଙ୍କା ବ୍ୟୟରେ ପ୍ରସ୍ତାବିତ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ। ବହୁ ପ୍ରତୀକ୍ଷିତ ବସ୍ଷ୍ଟାଣ୍ଡ ସମେତ ୩୧୩ କୋଟି ଟଙ୍କାରେ ନିର୍ମାଣ କରାଯାଇଥିବା ପ୍ରକଳ୍ପର ଲୋକାର୍ପଣ ହେବ। ଅନୁଗୋଳ ଷ୍ଟାଡିୟମ୍ରେ ଏହି କାର୍ଯ୍ୟକ୍ରମର ଆୟୋଜନ କରାଯାଉଥିବାବେଳେ ପ୍ରଶାସନ ପକ୍ଷରୁ ମଞ୍ଚରୁ ହେଲିପ୍ୟାଡ୍ ଯାଏ ଜୋର୍ଦାର ପ୍ରସ୍ତୁତି ଚାଲିଛି।
ମୁଖ୍ୟମନ୍ତ୍ରୀ ବିଭିନ୍ନ ବର୍ଗର ହିତାଧିକାରୀ ୨୪୨ କୋଟିର ଋଣ ପ୍ରଦାନ କରିବେ। ଏଥିସହ ତାଳଚେର ହେଲ୍ଥ କରିଡର, ଇଣ୍ଟିଗ୍ରେଟ୍ ଟ୍ରାଫିକ୍ ମ୍ୟାନେଜମେଣ୍ଟ ସିଷ୍ଟମ, ପାଲଲହଡ଼ାର ୩୦ ଶଯ୍ୟା ବିଶିଷ୍ଟ ଏମ୍ସିଏଚ୍ ବିଲ୍ଡିଂ, ଆଠମଲ୍ଲିକ ବ୍ଲକରେ ବିଭିନ୍ନ ମେଗା ଜଳସେଚନ ପ୍ରକଳ୍ପ ଉଦ୍ଘାଟନ କରିବେ। ଏଥିସହ ଅନୁଗୋଳ, ବଅଁରପାଳ ବ୍ଲକର ୩୦ ପଞ୍ଚାୟତକୁ ପାଇପ ପାଣି ଯୋଗାଣ, ବ୍ରାହ୍ମଣୀ ବ୍ରିଜ୍, ବ୍ରାହ୍ମଣୀ ସେତୁ ଉପରେ ଆଇଆଇଏସ୍, ୫୬୬ ବିଦ୍ୟାଳୟର ଉନ୍ନତୀକରଣ, ୮ଟି ଯୁକ୍ତ୨ ମହାବିଦ୍ୟାଳୟର ରୂପାନ୍ତରଣ, ଅନୁଗୋଳ ଓ ତାଳଚେର ଷ୍ଟାଡିୟମର ଭିତ୍ତିପ୍ରସ୍ତର ସ୍ଥାପନ କରିବା କାର୍ଯ୍ୟକ୍ରମ ରହିଛି। ମୁଖ୍ୟମନ୍ତ୍ରୀଙ୍କ ଏହି ଗସ୍ତକୁ ନେଇ ଦଳୀୟ କର୍ମୀମାନେ ଉତ୍ସାହିତ ହୋଇପଡ଼ିଛନ୍ତି। ନବୀନଙ୍କ ଫଟୋ, ପୋଷ୍ଟର, ବିଜେଡି ପତାକାରେ ସହର ଛାଇଯାଇଛି।
ଅନ୍ୟପଟେ ଉକ୍ତ ଦିନ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ, କୋଇଲା ମନ୍ତ୍ରୀ ପ୍ରହଲ୍ଲାଦ ଜୋଷୀଙ୍କ ମଧ୍ୟ ଗସ୍ତ କାର୍ଯ୍ୟକ୍ରମ ରହିଛି। ୩ କେନ୍ଦ୍ରମନ୍ତ୍ରୀ ନୂତନ ରେଳ ଲାଇନ୍, ନୂତନ ଟ୍ରେନ୍ ଶୁଭାରମ୍ଭ, ରାଣୀଗୁଡ଼ା କେନ୍ଦ୍ରୀୟ ବିଦ୍ୟାଳୟର ସ୍ଥାୟୀ କ୍ୟାମ୍ପସ ଭୂମିପୂଜନ କାର୍ଯ୍ୟକ୍ରମରେ ଯୋଗଦେବେ। ଗୋଟିଏ ଦିନରେ ମୁଖ୍ୟମନ୍ତ୍ରୀ ଏବଂ ୩ କେନ୍ଦ୍ରମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମ ଥିବାରୁ ଶାନ୍ତିଶୃଙ୍ଖଳା ରକ୍ଷା କରିବା ପ୍ରଶାସନ ପାଇଁ ଚ୍ୟାଲେଞ୍ଜ ପାଲଟିଛି। ତେବେ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମ ପୂର୍ବାହ୍ନ ୧୦ଟା ୫୦ରେ ଥିବାବେଳେ ଏହା ପରେ କେନ୍ଦ୍ରମନ୍ତ୍ରୀମାନଙ୍କ ବିଭିନ୍ନ କାର୍ଯ୍ୟକ୍ରମ ରହିଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।