ଆବୁ ଧାବି,୨୦।୯: ସ୍ଥାନୀୟ ଆବୁଧାବିଠାରେ ସୋମବାର ଖେଳାଯାଇଥିବା ମ୍ୟାଚ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗଲୋରକୁ ୧୦ ଓଭର ପୂର୍ବରୁ ୯ ଉଇକେଟରେ ହରାଇ ଦେଇଛି କୋଲକାତା ନାଇଟ୍ ରାଇଡର୍ସ (କେକେଆର)। କେବଳ ଟସ୍କୁ ଛାଡ଼ି ଦେଲେ ବିରାଟ କୋହଲିଙ୍କ ପାଇଁ ପୂରା ଦିନ ଖରାପ ଥିଲା। ପ୍ରଥମେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ। ତାଙ୍କ ଦଳ ଏକଦା ୫.୫ ଓଭରରେ ୧ ଉଇକେଟ କ୍ଷତିରେ ୪୧ ରନ୍ କରିଥିଲା। ଏହାପରେ ପୂରା ଭୁଶୁଡ଼ି ପଡ଼ିଥିଲା ଆରସିବିର ବ୍ୟାଟିଂ ଲାଇନ୍ ଅଫ୍। ମାତ୍ର ୫୨ ରନ୍ରେ ବଳକା ୯ ଉଇକେଟ ହରାଇ କୋହଲିଙ୍କ ଦଳ ଅଲଆଉଟ୍ ହୋଇଯାଇଥିଲା ମାତ୍ର ୯୨ ରନ୍ରେ।
ସାମ୍ନାରେ ୯୩ ରନ୍ର ଛୋଟିଆ ବିଜୟ ଲକ୍ଷ୍ୟ ଦେଖି ଆଟାକିଂ ବ୍ୟାଟିଂ କରିଥିଲେ କେକେଆର୍ ଦୁଇ ଓପନର। ଶୁବମାନ ଗିଲ (୪୮) ଓ ଭେଙ୍କଟେଶ ଆୟାର (୪୧*)ଙ୍କ ଯୋଗୁ କେକେଆର ୧୦ ଓଭରରେ ମ୍ୟାଚ୍ ଜିତି ନେଇଥିଲା।