ଦୁବାଇ,୨୩।୧୦: ୨୦୧୬ରେ ଦ୍ୱିତୀୟ ଥର ପାଇଁ ଟି୨୦ ବିଶ୍ୱକପ୍ ଜିତିଥିବା ଓ୍ବେଷ୍ଟଇଣ୍ଡିଜକୁ ପ୍ରଥମ ମ୍ୟାଚ୍ରେ ଲଜ୍ଜାଜନକ ପରାଜୟର ସମ୍ମୁଖୀନ ହେବାକୁ ପଡ଼ିଛି। ଚଳିତ ବିଶ୍ୱକପ୍ର ପ୍ରଥମ ମ୍ୟାଚ୍ରେ ଇଂଲଣ୍ଡର ସ୍ପିନରଙ୍କୁ ନ ଖେଳିପାରି ଡିଫେଣ୍ଡିଂ ଚାମ୍ପିୟନ ଅଲଆଉଟ୍ ହୋଇଯାଇଥିଲା ମାତ୍ର ୫୫ ରନ୍ରେ। ଅନ୍ତର୍ଜାତୀୟ କ୍ରିକେଟ ଇତିହାସରେ ଏହା ଓ୍ବେଷ୍ଟଇଣ୍ଡିଜ ପାଇଁ ସର୍ବନିମ୍ନ ଦଳଗତ ସ୍କୋର। ଛୋଟିଆ ବିଜୟ ଲକ୍ଷ୍ୟକୁ ଇଂଲଣ୍ଡ ୮.୨ ଓଭରରେ ହାସଲ କରିନେଇଥିଲା। କିନ୍ତୁ ଏଥିଲାଗି ଇଆନ ମୋର୍ଗାନଙ୍କ ଦଳକୁ ୪ ଉଇକେଟ ହରାଇବାକୁ ପଡ଼ିଥିଲା।
ଆରମ୍ଭରୁ ମୋଇନ ଅଲି ଓ ଟାଇମାଲ ମିଲ୍ସ ୨ ଲେଖାଏ ଉଇକେଟ ନେଇ ଓ୍ବେଷ୍ଟଇଣ୍ଡିଜର ବ୍ୟାଟିଂ ଲାଇନ୍କୁ ବିଗାଡ଼ି ଦେଇଥିଲେ। ଶେଷ ଆଡ଼କୁ ଆଦିଲ ରଶିଦ ମାତ୍ର ୨.୨ ଓଭରରେ ୨ ରନ୍ ଦେଇ ୪ ଉଇକେଟ ନେବାରୁ ମାତ୍ର ୫୫ ରନ୍ରେ ଅଲଆଉଟ୍ ହୋଇଯାଇଥିଲା ଡିଫେଣ୍ଡିଂ ଚାମ୍ପିୟନ। ଦଳ ପାଇଁ କେବଳ କ୍ରିସ ଗେଲ (୧୩)ଙ୍କୁ ଛାଡ଼ି ଦେଲେ ଅନ୍ୟ କେହି ଦୁଇ ଅଙ୍କ ଛୁଇଁପାରି ନ ଥିଲେ। ଜବାବରେ ଇଂଲଣ୍ଡ ୮.୨ ଓଭରରେ ୪ ଉଇକେଟ ହରାଇ ମ୍ୟାଚ୍ ଜିତି ନେଇଥିଲା।
