ଚିକିଟି,୧୩।୭(ପ୍ରକାଶ ଚନ୍ଦ୍ର ସାହୁ)ଗଞ୍ଜାମ ଜିଲା ଚିକିଟି ବ୍ଲକ ଅଧୀନ ସୁନପୁର ଗ୍ରାମ ନିକଟରେ ଥିବା ବାହୁଦା ନଦୀରେ ବୁଧବାର ସକାଳେ ମାଛ ମଡ଼କ ଦେଖିବାକୁ ମିଳିଛି। ନଦୀକୂଳରେ ପ୍ରାୟ ୫ କିମି ଯାଏ ମଲାମାଛ ଦେଖିବାକୁ ମିଳିଛି। ଗ୍ରାମବାସୀଙ୍କ କହିବା ପ୍ରକାରେ, ସମୁଦ୍ରକୁ ମତ୍ସ୍ୟଜୀବୀମାନେ ଶତାଧିକ ଡଙ୍ଗାଧରି ମାଛ ମାରିବାକୁ ଯାଇଥାନ୍ତି। କୂଳକୁ ଆସିବା ପରେ ବିକ୍ରି ନ ହେବାରୁ ଏହି ମାଛକୁ ଫିଙ୍ଗିଦେଇଥିବା ସନ୍ଦେହ କରୁଛନ୍ତି। ଅପରପକ୍ଷରେ ସମୁଦ୍ରକୂଳ ଅଞ୍ଚଳରେ ବହୁ ହଜାର ହେକ୍ଟର ଜମିରେ ବେଆଇନ ଚିଙ୍ଗୁଡ଼ି ଚାଷ କରି ବର୍ଜ୍ୟବସ୍ତୁ ନଦୀକୁ ଛଡାଯିବା ଫଳରେ ଜଳ ପ୍ରଦୂଷିତ ହୋଇ ଏହି ମାଛଗୁଡ଼ିକର ମୃତ୍ୟୁ ହୋଇଥିବା ଆଶଙ୍କା କରାଯାଉଛି। ଏନେଇ ଜିଲା ମତ୍ସ୍ୟ ଅଧିକାରୀ କହିଛନ୍ତି, ତଦନ୍ତ ପରେ ମାଛ ମଡ଼କ ନା କୌଣସି କାରଣରୁ ବିଷାକ୍ତ ହୋଇ ମାଛ ମରିଛନ୍ତି ତାହା ଜଣାପଡିବ। ସୂଚନାଯୋଗ୍ୟ, ଗତ କିଛିଦିନ ତଳେ ବିଶାଖାପାଟଣା ବେଳାଭୂମିରେ ଏପରି ମାଛମଡ଼କ ଦେଖିବାକୁ ମିଳିଥିଲା। ଦୁଇମାସ ପୂର୍ବରୁ ମଧ୍ୟ ସୁନପୁର ବାହୁଦାନଦୀରେ ମାଛମଡ଼କ ଦେଖିବାକୁ ମିଳିଥିଲା।