ମହାକାଳପଡ଼ା, ୧୪ା୧୨(ପ୍ରତାପ ଚନ୍ଦ୍ର ସ୍ବାଇଁ):ଶୀତ ଋତୁ ଆରମ୍ଭରୁ ଅଲିଭରିଡ୍ଲେ କଇଁଛ ସୁଦୂର ପ୍ରଶାନ୍ତ ମହାସାଗର, କୋଷ୍ଟାରିକା, ଶ୍ରୀଲଙ୍କା ଆଦି ଅଞ୍ଚଳରୁ ସମୁଦ୍ର ପଥ ଅତିକ୍ରମ କରି ଓଡ଼ିଶା ଉପକୂଳକୁ ଆସିଛନ୍ତି। ବିଶେଷ କରି ଗହୀରମଥା, ଋଷିକୁଲ୍ୟା ମୁହାଣ, ଜଟାଧାର ମୁହାଣ ବେଳାଭୂମିକୁ ସୁରକ୍ଷିତ ମଣି କଇଁଛ ଗଣ ଅଣ୍ଡାଦାନ କରିଥାନ୍ତି। ଅପରପକ୍ଷରେ ମାଛଧରା ଟ୍ରଲର ବେଆଇନ ଭାବେ ନିଷିଦ୍ଧାଞ୍ଚଳରେ ପ୍ରବେଶ କରି ମାଛ ଧରିବା ବେଳେ ଗାଞ୍ଜ ଜାଲରେ ଛନ୍ଦି ହୋଇ ଅକାଳରେ ଅଲିଭରିଡ୍ଲେ କଇଁଛଙ୍କ ଜୀବନ ଯାଉଛି। ବିଶେଷକରି ବଙ୍ଗୋପସାଗର ଉପକୂଳ ଅଞ୍ଚଳରେ ବାଲେଶ୍ୱର, ଧାମରା, କଷାଫଳ, ବଳରାମଗଡି, ଦୀଘା, ପଶ୍ଚିମବଙ୍ଗ ଆଦି ଟ୍ରଲରଗୁଡ଼ିକ ବେଆଇନ ଭାବେ ପ୍ରବେଶ କରି କଇଁଛମାନଙ୍କ ଜୀବନ ନେଉଛନ୍ତି। ଏଭଳି ଦେଖିବାକୁ ମିଳୁଛି, କେନ୍ଦ୍ରାପଡ଼ା ଜିଲା ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳ ଲଞ୍ଚଘୋଲା ବେଳାଭୂମିରେ ଚଳିତ ବର୍ଷର ପ୍ରଥମ କରି ଶୁକ୍ରବାର ୨ଟି ମୃତ ଅଲିଭରିଡେ୍ଲେ କଇଁଛ ଲାଗିଛନ୍ତି। ଏହି କଇଁଛ ମୃତ୍ୟୁ ଘଟଣାକୁ ନେଇ ପରିବେଶପ୍ରେମୀମଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି।
୨୦୨୩ରେ ୧୬୪ ଅଲିଭରିଡ୍ଲେ କଇଁଛଙ୍କ ଜୀବନ ଯାଇଥିବା ସଚେତନତା କାର୍ଯ୍ୟକ୍ରମରେ ଯୋଗ ଦେଇଥିବା ବନ ବିଭାଗ ଅଧିକାରୀମାନଙ୍କ ପକ୍ଷରୁ କୁହାଯାଇଛି। ଚଳିତବର୍ଷ ଏମାନଙ୍କ ସୁରକ୍ଷା, ସଂରକ୍ଷଣ ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ବନ ବିଭାଗ, ସାମୁଦ୍ରିକ ମତ୍ସ୍ୟ ବିଭାଗ, ସାମୁଦ୍ରିକ ପୋଲିସ, ତଟରକ୍ଷୀ ବାହିନୀର କର୍ମଚାରୀ ବ୍ୟାପକ ପଦକ୍ଷେପ ଗ୍ରହଣ କରିଛନ୍ତି। ହେଲେ କେବଳ ବନ ବିଭାଗ ଓ ତଟରକ୍ଷୀ ବାହିନୀକୁ ଛାଡ଼ି ଦେଲେ ସାମୁଦ୍ରିକ ମତ୍ସ୍ୟ ବିଭାଗ ଓ ସାମୁଦ୍ରିକ ପୋଲିସ ପକ୍ଷରୁ ମୁତୟନ ହେବା ନଁା ଧରୁ ନାହାନ୍ତି। ବନ ବିଭାଗ ପକ୍ଷରୁ ଏକକୁଳାନାସି, ବାବୁବାଲି ଓ ମାଦଳୀଠାରେ ଫରେଷ୍ଟ ବିଟ ରହିଛି। ବିଭାଗର କର୍ମଚାରୀ ନିୟୋଜିତ ଅଛନ୍ତି। ଏହା ସତ୍ତ୍ୱେ ଟ୍ରଲର ମାଡ଼ରେ ଅଲିଭରିଡ୍ଲେ କଇଁଛଙ୍କ ଜୀବନ ଯାଉଛି ବୋଲି ଅଭିଯୋଗ ହେଉଛି।
ମହାକାଳପଡ଼ା ବ୍ଲକ ଅଞ୍ଚଳର ୫ ଶହରୁ ଊର୍ଦ୍ଧ୍ୱ ମତ୍ସ୍ୟଜୀବୀ ବାଲେଶ୍ୱର ଟ୍ରଲର ମାଲିକଙ୍କ ପାଖରେ କାମ କରୁଛନ୍ତି। ସେମାନେ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳ ବନ ବିଭାଗ ପାଟ୍ରୋଲିଂ ଟିମ୍ କର୍ମଚାରୀ କେଉଁ ସମୟରେ ସମୁଦ୍ରକୁ ଯିବେ ଏ ସମ୍ପର୍କରେ ଆଗୁଆ ସୂଚନା ପାଉଛନ୍ତି। ଫଳରେ ଟ୍ରଲର କର୍ମଚାରୀ ସତର୍କ ହୋଇ ନିଷିଦ୍ଧାଞ୍ଚଳ ଛାଡି ଦୂରକୁ ଚାଲି ଯାଉଛନ୍ତି। ହୁକିଟୋଲା ପର୍ଯ୍ୟଟନସ୍ଥଳକୁ ଯାତ୍ରା କରୁଥିବାବେଳେ ଶୁକ୍ରବାର ଏହି ମଲା କଇଁଛ ସାମ୍ନାକୁ ଆସିଛି ବୋଲି ପର୍ଯ୍ୟଟକ କହିଛନ୍ତି। ଏ ସଂକ୍ରାନ୍ତରେ ଗହୀରମଥା ସାମୁଦ୍ରିକ ଅଭୟାରଣ୍ୟ ରେଞ୍ଜ ଅଧିକାରୀ ପ୍ରଦୋଷ କୁମାର ମହାରଣାଙ୍କୁ ପଚାରିବାରେ ମୃତ କଇଁଛଙ୍କ ଠିକଣା ମିଳିଲେ ବିଭାଗ ପକ୍ଷରୁ ପୋତି ଦିଆଯିବାର ବ୍ୟବସ୍ଥା କରାଯିବ ବୋଲି ସେ କହିଛନ୍ତି।