ନୂଆଦିଲ୍ଲୀ, ୩୧।୦୭: ନୂଆକରି ଭାରତୀୟ କ୍ରିକେଟ୍ ଟିମ୍ର କୋଚ୍ ହୋଇଥିବା ଗୌତମ ଗମ୍ଭୀର ପ୍ରଥମ ଅନ୍ତର୍ଜାତୀୟ ସିରିଜ୍ ବିଜୟରେ ସଫଳ ହୋଇଛନ୍ତି । ସିରିଜ୍ର ଶେଷ ମ୍ୟାଚ୍ରେ ଟିମ୍ ଇଣ୍ଡିଆ ଏକ ନିଶ୍ଚିତ ପରଜାୟରୁ ଅଳ୍ପକେ ବର୍ତ୍ତି ରୋମାଞ୍ଚକର ବିଜୟ ହାସଲ କରିଛି । କୁହାଯାଉଛି ଏହା ପଛରେ ଗମ୍ଭୀରଙ୍କ ରଣନୀତି କାମ କରିଛି । ମ୍ୟାଚ୍ର ଶେଷ ଦୁଇ ଓଭର ସେ ସୂର୍ଯ୍ୟକୁମାର ଯାଦବ ଏବଂ ରିଙ୍କୁ ସିଂଙ୍କୁ ଦେଇ ମ୍ୟାଚ୍କୁ ପଲଟାଇ ଦେଇଛନ୍ତି ।
ଶେଷ ମ୍ୟାଚ୍ର ଶେଷ ଦୁଇ ଓଭର ଅର୍ଥାତ ୧୨ ବଲ୍ରେ ଶ୍ରୀଲଙ୍କାକୁ ମାତ୍ର ୯ ରନ୍ର ଆବଶ୍ୟକତା ଥିଲା । ଏହି ସମୟରେ ଗମ୍ଭୀର ୧୯ ତମ ଓଭର ରିଙ୍କୁ ସିଂ ଦେବାକୁ ନିଷ୍ପତ୍ତି ନେଇଥିଲେ । ରିଙ୍କୁ ୩ ରନ୍ ଦେଇ ୨ ୱିକେଟ୍ ନେଇ ମ୍ୟାଚ୍କୁ ଭାରତ ପକ୍ଷକୁ ଆଣିଥିଲେ । ଶେଷ ଓଭରରେ ୬ ବଲ୍ରେ ମାତ୍ର ୬ରନ୍ ଜିତିବା ପାଇଁ ଥିବା ବେଳେ ଶେଷ ଓଭର ସୂର୍ଯ୍ୟକୁମାର ଯାଦବଙ୍କୁ ବୋଲିଂ ଭାର ଦିଆଯାଇଥିଲା । ସୂର୍ଯ୍ୟ ମଧ୍ୟ ଚମତ୍କାର ବୋଲିଂକରି ୫ ରନ୍ ଦେଇ ୨ ୱିକେଟ୍ ନେଇଥିଲେ ।
ସୂଚନା ଥାଉକି, ଶ୍ରୀଲଙ୍କା ବିପକ୍ଷରେ ୩ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ କ୍ଲିନ୍ ସୁଇପ୍ କରିଛି ଟିମ୍ ଇଣ୍ଡିଆ । ପ୍ରଥମ ମ୍ୟାଚ୍ରୁ ଶାନ୍ଦାର ପ୍ରଦର୍ଶନ କରିଆସିଥିବା ଭାରତୀୟ ଟିମ୍ ଶେଷ ମ୍ୟାଚ୍ରେ ମଧ୍ୟ ରୋମାଞ୍ଚକର ବିଜୟ ହାସଲ କରିଛି । ଏହି କ୍ଲିନ୍ ସୁଇପ୍ରେ ଭାରତୀୟ ଟିମ୍ର କ୍ୟାପ୍ଟେନ୍ ସୂର୍ଯ୍ୟକୁମାର ଯାଦବ ଟ୍ରଫି ରିୟାନ ପରାଗ ଏବଂ ରିଙ୍କୁ ସିଂକୁ ଦେଇ ଦେଇଥିଲେ । କାରଣ ଏହି ଦୁଇ ଖେଳାଳି ବୋଲିଂରେ ନିଜର ଜଲୱା ଦେଖାଇଥିଲେ ।
ଶ୍ରୀଲଙ୍କା ବିପକ୍ଷରେ କ୍ରମାଗତ ତୃତୀୟ ବିଜୟ ହାସଲ କରି ଭାରତ ଟି-୨୦ ସିରିଜ କବ୍ଜା କରିଛି। ଶେଷ ମ୍ୟାଚରେ ଭାରତ ପ୍ରଥମେ ବ୍ୟାଟିଂ କରି ୯ ୱିକେଟ ହରାଇ ୧୩୭ ରନ ସଂଗ୍ରହ କରିଥିଲା। ଏହାର ଜବାବରେ ଆୟୋଜକ ଦଳ ମଧ୍ୟ ୨୦ ଓଭରରେ ୮ ୱିକେଟ ହରାଇ ୧୩୭ ରନ କରି ମ୍ୟାଚ୍ ଡ୍ର କରିଥିଲା। ଫଳରେ ମ୍ୟାଚ ସୁପର ଓଭରରେ ପହଞ୍ଚିଥିଲା । ଯେଉଁଥିରେ ଭାରତ ଜିତିଥିଲା। କ୍ୟାପ୍ଟେନ ସୂର୍ଯ୍ୟକୁମାର ଯାଦବ ୱାଶିଂଟନ ସୁନ୍ଦରଙ୍କୁ ସୁପର ଓଭର ବୋଲିଂ କରିବାର ପାଇଁ ଦେଇଥିଲେ ଏବଂ ସେ କୁସାଲ ପେରେରା ଏବଂ ପୃଥ଼୍ବ ନିଶଙ୍କାଙ୍କୁ ଆଉଟ୍ କରି ଭାରତ ପାଇଁ ମାତ୍ର ୩ ରନ୍ର ଲକ୍ଷ୍ୟ ରଖିଥିଲେ। ଯାହାକି ଭାରତ ସୁପର ଓଭରର ପ୍ରଥମ ବଲ୍ରେ ହିଁ ଚୌକା ମାରି ଜିତି ନେଇଥିଲା ।