ଭୁବନେଶ୍ୱର,୬।୭(ଅନୁରାଧା ମହାରଣା): ଦେଶରେ ବୈଦେଶିକ ମୁଦ୍ରାଭଣ୍ଡାରରେ ହ୍ରାସ ଘଟିଛି। ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଶୁକ୍ରବାର ତଥ୍ୟ ପ୍ରକାଶକରି କହିଛି, ଚଳିତବର୍ଷ ଜୁନ୍ ଶେଷ ସପ୍ତାହରେ ୧.୭୧୩ ବିଲିୟନ ଡଲାର ହ୍ରାସ ସହିତ ବୈଦେଶିକ ବିନିମୟ ସଂରକ୍ଷଣ ୬୫୧.୯୯୭ ବିଲିୟନ ଡଲାର ଥିଲା। ଗତ ସପ୍ତାହରେ ମୋଟ ମୁଦ୍ରା ଭଣ୍ଡାର ୨.୯୨ ବିଲିୟନ ଡଲାରରୁ ୬୫୨.୮୯ ବିଲିୟନ ଡଲାରରେ ପହଞ୍ଚିଛି। ପ୍ରଥମ ସପ୍ତାହରେ ବୈଦେଶିକ ମୁଦ୍ରା ଭଣ୍ଡାର ୬୫୩.୭୧୧ ବିଲିୟନ ଡଲାର ଥିଲା। ଆର୍ବିଆଇର ଏହି ତଥ୍ୟ ଅନୁଯାୟୀ, ମୋଟ ଭଣ୍ଡାର ୧.୭୧୩ ବିଲିୟନ ଡଲାରକୁ ହ୍ରାସ ପାଇ ୬୫୧.୯୯୭ ବିଲିୟନ ଡଲାରରେ ପହଞ୍ଚିଛି। ଏହି ଅବଧି ମଧ୍ୟରେ ବୈଦେଶିକ ମୁଦ୍ରା ସମ୍ପତ୍ତି ମଧ୍ୟ ହ୍ରାସ ପାଇଛି ଏବଂ ଏହା ୧.୨୫୨ ବିଲିୟନ ଡଲାରରୁ ୫୭୨.୮୮୧ ବିଲିୟନ ଡଲାରକୁ ଖସି ଆସିଛି। ଆର୍ବିଆଇର ସୁନା ସଂରକ୍ଷଣ(ଗୋଲ୍ଡ ରିଜର୍ଭ)ରେ ମଧ୍ୟ ହ୍ରାସ ଘଟିଛି ଏବଂ ଏହା ୪୨୭ ନିୟୁତ ଡଲାରରୁ ୫୬.୫୨ ବିଲିୟନ ଡଲାରରେ ପହଞ୍ଚିଛି। ଏସ୍ଡିଆର୍ରେ ୩୫ ନିୟୁତ ଡଲାର ହ୍ରାସ ପାଇଛି ଏବଂ ୧୮.୦୧୪ ବିଲିୟନ ଡଲାର ହୋଇଥିବାବେଳେ ଅନ୍ତର୍ଜାତୀୟ ମୁଦ୍ରାପାଣ୍ଠିରେ ଜମା ହୋଇଥିବା ଭଣ୍ଡାରଗୁଡିକ ୧ ମିଲିୟନ ଡଲାରରୁ ୪.୫୭୩ ବିଲିୟନ ଡଲାରକୁ ବୃଦ୍ଧି ପାଇଛି। ସୂଚନା ଥାଉକି, ଗତ ୬ ସପ୍ତାହ ଧରି କ୍ରମାଗତ ଭାବେ ବୈଦେଶିକ ମୁଦ୍ରା ଭଣ୍ଡାର ୬୫୦ ବିଲିୟନ ଡଲାରରୁ ଅଧିକ ରହିଛି । ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ ନିକଟରେ କହିଥିଲେ, ଆର୍ବିଆଇ ଏହାର ଭଣ୍ଡାର ବୃଦ୍ଧି ଜାରି ରଖିବ ଯାହାଦ୍ୱାରା ଭବିଷ୍ୟତରେ କୌଣସି ପ୍ରକାର ଉତ୍ତେଜନା କିମ୍ବା ସଙ୍କଟ ସମୟରେ ଏହାକୁ ଘରୋଇ ସ୍ବାର୍ଥ ପାଇଁ ବ୍ୟବହାର କରାଯାଇପାରିବ। ଘରୋଇ ମୁଦ୍ରାକୁ ଦୁର୍ବଳ କିମ୍ବା ହ୍ରାସରୁ ରକ୍ଷା କରିବା ପାଇଁ ଯେତେବେଳେ ଭାରତ ମୁଦ୍ରା ବଜାରରେ ହସ୍ତକ୍ଷେପ କରେ, ବୈଦେଶିକ ମୁଦ୍ରା ଭଣ୍ଡାରରେ ଏକ ପରିବର୍ତ୍ତନ ଦେଖାଯାଏ।