ପ୍ରେମ କେତେବେଳେ କାହା ସହ କେଉଁଠି ଆରମ୍ଭ ହୋଇଥାଏ ତାହା କହି ହୁଏନା। ଏମିତି ଏକ ପ୍ରେମ ହୋଇଛି ସ୍ପେନର ଜଣେ ଯୁବକ ଏବଂ ଆମେରିକୀୟ ଯୁବତୀଙ୍କ କ୍ଷେତ୍ରରେ। ଏହି ପ୍ରେମୀଯୁଗଳ ଭାରତ ବୁଲିବାକୁ ଆସିଥିଲେ। ପ୍ରଥମେ ଦିଲ୍ଲୀରେ ଉଭୟଙ୍କ ମଧ୍ୟରେ ସାକ୍ଷାତ ହୋଇଥିଲା। ପ୍ରଥମେ ବନ୍ଧୁ ଏବଂ ପରେ ଏକାଠି ଚାଲିବା ପାଇଁ ନିଷ୍ପତ୍ତି। ତେବେ ରୁଦ୍ରପ୍ରୟାଗଠାରୁ ୨୬ କିଲୋମିଟର ଦୂରରେ ଥିବା ବାଂଶବାଡ଼ାର ଗ୍ରାମବାସୀଙ୍କ ସହାୟତାରେ ଦୁହେଁ ହିନ୍ଦୁ ରୀତିନୀତି ସହିତ ସ୍ଥାନୀୟ ମନ୍ଦିରରେ ବିବାହ କରିଛନ୍ତି। ତେବେ ଜାଣନ୍ତୁ ଏହି ପ୍ରେମୀଯୁଗଳଙ୍କ ପ୍ରେମ ସମ୍ପର୍କ ବିଷୟରେ।
ଏହି ଦୁଇ ବିଦେଶୀ ପ୍ରେମପକ୍ଷୀଙ୍କ ପାଇଁ ସାତ ସମୁଦ୍ରରେ ବିବାହ କରିବା ଏକ ଆଶ୍ଚର୍ଯ୍ୟର କଥା। ଉଭୟଙ୍କ ପ୍ରେମ କାହାଣୀ ଏକ ଫିଲ୍ମ କାହାଣୀ ପରି। ଦୁହେଁ ଭାରତ ବୁଲିବାକୁ ଆସିଥିଲେ। ଲକ୍ଡାଉନ୍ ଯୋଗୁ ଏଠାରେ ଫସିଗଲେ। ଏଠାର ରହିବା ମଧ୍ୟରେ କେତେବେଳେ ଉଭୟ ଉଭୟଙ୍କ ପ୍ରେମରେ ପଡ଼ିଯାଇଥିଲେ ଜଣା ନ ଥିଲେ। ପରେ ଧୀରେ ଧୀରେ ଉଭୟଙ୍କ ଟଙ୍କା ସରିବାକୁ ଲାଗିଲା। ତେଣୁ ନିଜ ଗୋଡ଼ରେ ନିଜେ ଠିଆ ହେବେ ବୋଲି ଭାବିନେଲେ।
ଉଭୟ ସାଥୀ ହୋଇ ଚାଲୁଥିବା ବେଳେ ରାତି ବିତାଇବା ପାଇଁ ଶସ୍ତା ହୋଟେଲ ଖୋଜିବା ଆରମ୍ଭ କଲେ। ଏକ ସପ୍ତାହ ପୂର୍ବରୁ ଉଭୟ ଋଷିକେଶରେ ପହଞ୍ଚିଥିଲେ। ବୁଧବାର ରୁଦ୍ରପ୍ରୟାଗ ଦେଇ ବାଂଶବାଡାରେ ପହଞ୍ଚିଥିଲେ। ଏଠାରେ ଦୁହେଁ ଏକ ହୋଟେଲକୁ ଯାଇଥିଲେ। ଯେଉଁଠାରେ ସେମାନେ ସାମାଜିକ କର୍ମୀ ଅମିତ ସଜୱାନଙ୍କୁ ଭେଟିଥିଲେ। ଉଭୟ ସେମାନଙ୍କର ପ୍ରେମ କାହାଣୀ କହିଥିଲେ ଏବଂ ଅମିତ ସେମାନଙ୍କୁ ସ୍ଥାନୀୟ ଲୋକଙ୍କ ସାହାଯ୍ୟରେ ବିବାହ କରାଇଥିଲେ।
ଫଳରେ ସେଜାଲ ଏବଂ ମେରିକ୍ଙ୍କ ବିବାହ ବାଂଶବାଡ଼ାର କୁଟୀର ମନ୍ଦିରରେ ସମ୍ପନ୍ନ ହୋଇଛି। ହିନ୍ଦୁ ରୀତିନୀତି ଅନୁଯାୟୀ ବିବାହ ପରେ ଏହି ବିଦେଶୀ ଦମ୍ପତି ବହୁ ଖୁସି ଜଣାପଡୁଥିଲେ। ସ୍ପେନ୍ରୁ ଆସିଥିବା ସେଜାଲ ଜଣେ ବ୍ୟବସାୟୀ ଏବଂ ତାଙ୍କର ଆମେରିକୀୟ ପତ୍ନୀ ମେରିକ୍ ସ୍ନାତକ ପାସ୍ କରିଛନ୍ତି। ଭାରତ ଆସିବା ପୂର୍ବରୁ ଏହି ଦୁଇଜଣ ପରସ୍ପରକୁ ମଧ୍ୟ ଜାଣି ନ ଥିଲେ। କିନ୍ତୁ ଲକ୍ଡାଉନ୍ ଦୁହିଁଙ୍କୁ ସବୁଦିନ ପାଇଁ ଗୋଟିଏ ସୂତାରେ ବାନ୍ଧି ଦେଲା।