ଭୁବନେଶ୍ୱର,୩।୭ (ବନ୍ଦନା ସେଠୀ): ୟୁନିଟ-୨ ମାର୍କେଟ ବିଲ୍ଡିଂ ସ୍ଥିତି ଏବେ ଦୟନୀୟ ହୋଇପଡିଛି। ସବୁଠି ଅଳିଆ ଭର୍ତ୍ତି ହୋଇଥିବାବେଳେ ମାର୍କେଟ ଆସୋସିଏଶନ୍ ପକ୍ଷରୁ ସଫେଇ କାର୍ଯ୍ୟ ବନ୍ଦ ରହିଛି। ଅସ୍ଥାୟୀ ବ୍ୟବସାୟୀମାନେ ବସୁଥିବା ସ୍ଥାନକୁ ସଫା ନକରି ଚାଲିଯାଉଛନ୍ତି। ଫଳରେ ଏଣେତେଣେ ସବୁଠି ବର୍ଜ୍ୟ ପଡି ରହୁଛି। ପୂର୍ବରୁ ପ୍ରତ୍ୟେକ ଦିନ ମାର୍କେଟ ଆସୋସିଏଶନ୍ ଏହି ଅଞ୍ଚଳକୁ ସଫା କରିଥାଏ। କିନ୍ତୁ ସ୍ଥାୟୀ ଓ ଅସ୍ଥାୟୀ ବ୍ୟବସାୟୀଙ୍କ ମଧ୍ୟରେ ଲାଗି ରହିଥିବା ବିବାଦ ଲାଗି ଏବେ ଆସୋସିଏଶନ୍ ବର୍ଜ୍ୟ ସଫା କରୁନାହିଁ। ଦୁର୍ଗନ୍ଧରେ ନାକ ଫାଟିପଡୁଥିବାରୁ ମାର୍କେଟ ବିଲ୍ଡିଂ ସ୍ଥିତିକୁ ନେଇ ଜନସାଧାରଣ ଅସନ୍ତୋଷ ପ୍ରକାଶ କରିଛନ୍ତି। ଏନେଇ ଆସୋସିଏଶନ୍ ସଭାପତି ପ୍ରଦ୍ୟୁମ୍ନ ଲେଙ୍କା କହିଛନ୍ତି, ମାର୍କେଟ ବିଲ୍ଡିଂରେ ଦେଖାଦେଇଥିବା ବିବାଦ ସମ୍ପର୍କରେ ଆସୋସିଏଶନ୍ ବିଏମସି କମିଶନରଙ୍କ ଦ୍ବାରସ୍ଥ ହୋଇଥିଲା। ୭ ଦିନ ମଧ୍ୟରେ ସେ ନିଜେ ମାର୍କେଟକୁ ଆସି ସ୍ଥତି ଯାଞ୍ଚ କରିବା ସହ ସ୍ଥାୟୀ ବ୍ୟବସାୟୀଙ୍କ ଅଭିଯୋଗ ଶୁଣିବେ ବୋଲି କହିଥିଲେ। ମାତ୍ର ପ୍ରତିଶ୍ରୁତିକୁ ମାସେ ବିତିଥିଲେ ମଧ୍ୟ କମିଶନରଙ୍କର ପାଦ ମାର୍କେଟ ବିଲ୍ଡିଂରେ ପଡିନାହିଁ। ମାର୍କେଟ ବିଲ୍ଡିଂ କର୍ତ୍ତୃପକ୍ଷ ବିଏମସିକୁ ଟିକସ ଦେଉଛନ୍ତି। ତେଣୁ ବିଏମସି ତା’ର ସେବା ପ୍ରଦାନ କରିବା ଜରୁରୀ, ମାତ୍ର ମାର୍କେଟବିଲ୍ଡିଂ ପାଇଁ ବିଏମସି ନିଦାବିଷ୍ଣୁ ପାଲଟିଯାଇଛି। ଅପରପକ୍ଷେ ମାର୍କେଟ ସଫା ହେଉ ନ ଥିବାରୁ ଗ୍ରାହକମାନେ ଅସନ୍ତୋଷ ପ୍ରକାଶ କରିବା ସହ ମୁହଁ ଫେରାଇ ନେଉଛନ୍ତି। ତେଣୁ ଏନେଇ ରବିବାର ଆସୋସିଏଶନ୍ ସଦସ୍ୟଙ୍କ ମଧ୍ୟରେ ଏକ ବୈଠକ ବସିବାର ଥିଲା। ମାତ୍ର କିଛି ଜରୁରୀ କାରଣବଶତଃ ଏହାକୁ ଆସନ୍ତା ବୁଧବାର ଯାଏ ଘୁଞ୍ଚାଇ ଦିଆଯାଇଛି। ଯଦି ଆସନ୍ତା ବୁଧବାର ମଧ୍ୟରେ ବିଏମସି କର୍ତ୍ତୃପକ୍ଷ ମାର୍କେଟ ବିଲ୍ଡିଂ ସ୍ଥିତିକୁ ନେଇ କିଛି ପଦକ୍ଷେପ ନ ନିଅନ୍ତି, ତେବେ ବୁଧବାର ମାର୍କେଟ ଆସୋସିଏଶନ୍ ତାର ବିକଳ୍ପ ନିଷ୍ପତ୍ତି ନେବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ମାର୍କେଟବିଲ୍ଡିଂ ପରିସରରେ ସ୍ଥାୟୀ ଓ ଅସ୍ଥାୟୀ ବ୍ୟବସାୟୀଙ୍କ ମଧ୍ୟରେ ଚାଲିଥିବା ବିବାଦର ପୂର୍ଣ୍ଣଚ୍ଛେଦ ପଡିପାରୁ ନାହିଁ। ସ୍ଥାୟୀ ଓ ଅସ୍ଥାୟୀ ବ୍ୟବସାୟୀଙ୍କ ମଧ୍ୟରେ ତୁ ତୁ ମେଁ ମେଁ ଜାରି ରହିବା ସହ ସ୍ଥିତି ବିଗିଡିବାରେ ଲାଗିଛି। ବିଏମ୍ସି ଥରକୁ ଥର ଉଠାଦୋକାନୀଙ୍କୁ ସେଠାରୁ ହଟାଉଛି ସତ, କିନ୍ତୁ ପୁନର୍ବାର ସେମାନେ ସେଠାରେ ବ୍ୟବସାୟ କରୁଛନ୍ତି, ଯାହାକୁ ନେଇ ବିଏମ୍ସିର ପାରିବା ପଣିଆକୁ ଆସୋସିଏସନ୍ ପକ୍ଷରୁ ପ୍ରଶ୍ନ କରାଯାଇଛି।