ଅମରପାଲି,୨୦ା୩(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଉଫୁଲା ପଞ୍ଚାୟତର ସଦର ଗ୍ରାମର ବିଦେଶୀ ସାହୁ(୪୦) ଓ ତାଙ୍କ ଭଉଣୀ ପ୍ରମୋଦିନୀ ସାହୁ(୩୫)। ଉଭୟେ ଏବେ ଦୁର୍ବିସହ ଜୀବନ ବିତାଉଛନ୍ତି। ବିଦେଶୀ ଶାରୀରିଭାବେ ଦୁର୍ବଳ ହୋଇଥିବା ବେଳେ ପ୍ରମୋଦିନୀ ମାନସିକ ଅନଗ୍ରସର। ପିଲାଦିନୁ ଉଭୟେ ବାପାଙ୍କୁ ହରାଇଥିଲେ। ବିଧବା ମା’ ଭତ୍ତା ବାବଦ ରାଶନ ସାମଗ୍ରୀ ସହିତ ପର ଘରେ କାମ କରି ଉଭୟଙ୍କୁ ପାଳୁଥିଲେ। ମାତ୍ର କରୋନାରେ ଆକ୍ରାନ୍ତ ହୋଇ ତାଙ୍କର ମୃତ୍ୟୁ ଘଟିଲା। ଫଳରେ ସେମାନେ ପାଉଥିବା ସମସ୍ତ ସରକାରୀ ଯୋଜନା ବନ୍ଦ ହୋଇଗଲା।
ସରକାର କରୋନାରେ ମୃତବ୍ୟକ୍ତିଙ୍କ ପରିବାରକୁ ଆର୍ଥିକ ସହାୟତା ପ୍ରଦାନ କରୁଥିଲେ ମଧ୍ୟ ତାଙ୍କ ପରିବାରକୁ କୌଣସି ସହାୟତା ମିଳିନାହିଁ। ଭଉଣୀ ଭାଇଙ୍କ ଆଧାର କାର୍ଡ କି ଭିନ୍ନକ୍ଷମ କାର୍ଡ ନାହିଁ। ଫଳରେ ସେମାନେ କୌଣସି ସରକାରୀ ସହାୟତା ପାଇ ପାରୁ ନାହାନ୍ତି। ଉଭୟେ ଏବେ ଭଙ୍ଗା ଘରେ ରହୁଛନ୍ତି। ବିଦେଶୀ ଏକ ହୋଟେଲରେ ବାସନ ଧୋଇ ଯାହା ପାଆନ୍ତି ସେଥିରୁ ଭଉଣୀଭାଇ ଭୋକ ମେଣ୍ଟାଉଛନ୍ତି। ଏନେଇ ଉଫୁଲା ସରପଞ୍ଚ ଶ୍ରୀୟା କର୍ମୀଙ୍କୁ ପଚାରିବାରୁ ଉଭୟଙ୍କ ବିଷୟରେ ସୂଚନା ପାଇଥିବା କହିଛନ୍ତି। ଯଥାଶୀଘ୍ର ସରକାରୀ ବିଧିବ୍ୟବସ୍ଥାମତେ ଯେତିକି ସହାୟତା ହୋଇପାରିବ ସହଯୋଗ କରାଯିବ ବୋଲି କହିଥିଲେ। ଏଥିସହିତ କିଭଳି ଆଧାର କାର୍ଡ, ଭିନ୍ନକ୍ଷମ କାର୍ଡ ଓ ରାଶନ କାର୍ଡ କରାଯାଇ ପାରିବ ସେ ଦିଗରେ ପଦକ୍ଷେପ ନିଆଯିବ ବୋଲି କହିଛନ୍ତି। ଏନେଇ ଗ୍ରାମ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ଗୌରଚରଣ ସାହୁଙ୍କୁ ପଚାରିବାରୁ ଆଧାର କାର୍ଡ ହେଲେ ଅନଲାଇନରେ ରାଶନ କାର୍ଡ ଆବେଦନ କରି ପିଡିଏସ୍ ଓ ଆଗ୍ରାଧିକାର ଭିତ୍ତିରେ ସରକାରୀ ସହାୟତା ପ୍ରଦାନ କରାଯିବ ବୋଲି କହିଛନ୍ତି।