ନୂଆଦିଲ୍ଲୀ,୧୯।୫ (ପି.ଟି.): କିମ୍ବଦନ୍ତୀ ହକି ଖେଳାଳି ଧ୍ୟାନଚାନ୍ଦଙ୍କ ଉପରେ ଏକ ପ୍ରାମାଣିକ ଚଳଚ୍ଚିତ୍ର ନିର୍ମାଣ କରାଯାଉଛି। ପ୍ରଯୋଜକ ତଥା ବ୍ୟବସାୟୀ ଜୋୟିତା ରଏ ଓ ପ୍ରତୀକ କୁମାର ମିଶ୍ର ଏହି ଡକ୍ୟୁମେଣ୍ଟାରୀ ନିର୍ମାଣ କରୁଛନ୍ତି। ଏଥିରେ ଧ୍ୟାନଚାନ୍ଦଙ୍କ ବାଲ୍ୟଜୀବନ ଓ ସଂଘର୍ଷକୁ ଲୋକଙ୍କ ସମ୍ମୁଖରେ ଉପସ୍ଥାପନ କରିବାକୁ ପ୍ରୟାସ କରାଯାଉଛି। ଜୋୟିତା ଓ ପ୍ରତୀକ ଧ୍ୟାନଚାନ୍ଦଙ୍କୁ ଦେଶର ସର୍ବୋଚ୍ଚ ନାଗରିକ ସମ୍ମାନ ‘ଭାରତ ରତ୍ନ’ ପ୍ରଦାନ କରିବାକୁ ଡିଜିଟାଲ ଅଭିଯାନ ଜାରି ରଖିଛନ୍ତି ଓ ଏହା ମାଧ୍ୟମରେ ଦାବି ଉପସ୍ଥାପନ କରିଛନ୍ତି।
ଏ ସଂକ୍ରାନ୍ତରେ ଧ୍ୟାନଚାନ୍ଦଙ୍କ ପୁଅ ତଥା ପୂର୍ବତନ ହକି ଖେଳାଳି ଅଶୋକ ଧ୍ୟାନଚାନ୍ଦଙ୍କ ସହ ପ୍ରଯୋଜକମାନେ ଆଲୋଚନା କରିଛନ୍ତି। ୨୦୨୦ରେ ଝାନ୍ସୀ ଓ ଆଲ୍ଲହାବାଦ୍ରେ ଶୁଟିଂ ଆରମ୍ଭ କରିବାକୁ ଯୋଜନା କରାଯାଇଥିଲା। ତେବେ କୋଭିଡ୍-୧୯ ମହାମାରୀ କାରଣରୁ ଶୁଟିଂ ଆରମ୍ଭରେ ବିଳମ୍ବ ହୋଇଥିଲା। ଜୁନ୍ରେ ପ୍ରି-ପ୍ରଡକ୍ସନ କାର୍ଯ୍ୟ ଆରମ୍ଭ ହେବ। ଏହି ପ୍ରାମାଣିକ ଚଳଚ୍ଚିତ୍ର ଡିସେମ୍ବର ୩ରେ ଧ୍ୟାନଚାନ୍ଦଙ୍କ ଶ୍ରାଦ୍ଧବାର୍ଷିକୀରେ ମୁକ୍ତିଲାଭ କରିବ। ଭାରତୀୟ ହକିରେ ଧ୍ୟାନଚାନ୍ଦଙ୍କୁ ସର୍ବଶ୍ରେଷ୍ଠ ଖେଳାଳି ବିବେଚନା କରାଯାଏ। ସେ ୧୯୨୮, ୧୯୩୨ ଓ ୧୯୩୬ରେ ଅଲିମ୍ପିକ ସ୍ବର୍ଣ୍ଣପଦକ ହାସଲ କରିଥିଲେ। ୧୯୨୬ରୁ ୧୯୪୯ ମଧ୍ୟରେ ସେ ଭାରତ ପାଇଁ ଅନ୍ତର୍ଜାତୀୟ ହକିରେ ୧୮୫ଟି ମ୍ୟାଚ୍ରେ ପ୍ରତିନିଧିତ୍ୱ କରିଥିଲେ ଓ ୫୭୦ଟି ଗୋଲ ସ୍କୋର କରିଥିଲେ। ୧୯୫୬ରେ ତାଙ୍କୁ ପଦ୍ମଭୂଷଣ ପୁରସ୍କାରରେ ସମ୍ମାନିତ କରାଯାଇଥିଲା। ତାଙ୍କ ଜନ୍ମଦିନ ୨୯ ଅଗଷ୍ଟକୁ ଭାରତରେ ପ୍ରତିବର୍ଷ ଜାତୀୟ କ୍ରୀଡ଼ା ଦିବସ ରୂପେ ପାଳନ କରାଯାଉଛି।
