ବ୍ରହ୍ମପୁର ଅଫିସ,୧୬।୧: ରେଳପଥ ପୋଲିସ ରବିବାର ରାତିରେ ଜଣେ ମହିଳା ଯାତ୍ରୀଙ୍କ ମୃତଦେହ କୋଣାର୍କ ଏକ୍ସପ୍ରେସ୍ର ଶୌଚାଳୟରୁ ଉଦ୍ଧାର କରିଛି। ମୃତ ମହିଳା ଜଣଙ୍କ ଗଞ୍ଜାମ ଜିଲା ଆସିକା ଥାନା ଅଧୀନ ଗଣ୍ଡାପଲି ଗ୍ରାମର ଗନ୍ତେଇ ଦାସଙ୍କ ସ୍ତ୍ରୀ ସୁନ୍ଦରୀ ଦାସ(୩୬)। ଏନେଇ ପୋଲିସ ଏକ ମାମଲା(ନଂ.୭/୨୨) ରୁଜୁ କରିଛି। ଶୌଚାଳୟରେ ଖସିପଡ଼ି ମହିଳାଙ୍କ ମୃତ୍ୟୁ ଘଟିଥିବା ପୋଲିସ ପ୍ରାଥମିକ ଅନୁସନ୍ଧାନରୁ ସନ୍ଦେହ କରୁଛି। ସୋମବାର ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି।
ଘଟଣାରୁ ପ୍ରକାଶ ଯେ, ଗନ୍ତେଇ ଦାସ ମହାରାଷ୍ଟ୍ର ପୁଣେରେ ଏକ କମ୍ପାନୀରେ କାମ କରି ସେଠାରେ ତାଙ୍କ ସ୍ତ୍ରୀ ସୁନ୍ଦରୀ ଦାସଙ୍କ ସହ ରୁହନ୍ତି। ସେମାନେ ଗତ ୨ଦିନ ତଳେ ପୁଣେରୁ କୋଣାର୍କ ଏକ୍ସପ୍ରେସ୍ରେ ବ୍ରହ୍ମପୁର ଅଭିମୁଖେ ବାହାରିଥିଲେ। ରବିବାର ରାତି ୧୦ଟାରେ ସୁନ୍ଦରୀ ଟ୍ରେନ୍ରେ ଥିବା ଶୌଚାଳୟକୁ ଯାଇଥିଲେ। ବହୁ ସମୟ ପର୍ଯ୍ୟନ୍ତ ସେ ଶୌଚାଳୟରୁ ବାହାରକୁ ନ ଆସିବାରୁ ଗନ୍ତେଇଙ୍କ ସନ୍ଦେହ ହୋଇଥିଲା। ଟ୍ରେନ୍ଟି ବ୍ରହ୍ମପୁର ଷ୍ଟେଶନରେ ପହଞ୍ଚିବା ପରେ ଶୌଚାଳୟ କବାଟ ଖୋଲିବା ବେଳେ ସେଠାରେ ସୁନ୍ଦରୀ ଅଚେତ ହୋଇ ପଡ଼ିଥିବା ଦେଖିଥିଲେ। ପରେ ସେ ବ୍ରହ୍ମପୁର ରେଳବାଇ ପୋଲିସକୁ ଜଣାଇଥିଲେ। ସୁନ୍ଦରୀ ବଞ୍ଚିଥିବା ଭାବି ଗନ୍ତେଇ ତାଙ୍କୁ ସେଠାରୁ ଉଦ୍ଧାରକରି ଏମ୍କେସିଜି ମେଡିକାଲରେ ଭର୍ତ୍ତି କରିଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।