ପୁରୁଷୋତ୍ତମପୁର,୧୨।୧୦(ଡି.ଏନ୍.ଏ.) ଗଞ୍ଜାମ ଜିଲାର ପ୍ରସିଦ୍ଧ ଇଷ୍ଟଦେବୀ ମା’ତାରା ତାରିଣୀଙ୍କ ପୀଠରେ ଏକ ଅଘଟଣ ଘଟିଛି। ମଙ୍ଗଳବାର ପବିତ୍ର ମହାସପ୍ତମୀ ପୂଜା ଚାଲିଥିବା ସମୟରେ ମା’ଙ୍କ ପୀଠରେ ନିଆଁ ଲାଗିଥିବା ସୂଚନା ମିଳିଛି।
ମାନସିକଧାରୀମାନେ ଷୋଳ ପର୍ବ ଓ ନବରାତ୍ର ଲାଗି ମା’ଙ୍କ ପୀଠରେ ଥିବା ଦୀପ ଘରେ ହଠାତ୍ ନିଆଁ ଲାଗିଯାଇଥିଲା। ଏଥିରେ କାହାର କିଛି କ୍ଷତି ଘଟିନଥିବା ଜଣାପଡିଛି। ମାନସିକ ଧାରୀଙ୍କ ଲାଗିଥିବା ସମସ୍ତ ଦୀପମାନ ଜଳି ଯାଇଥିବା ବେଳେ କବାଟ ଝରକା ମଧ୍ୟ କିଛି ମାତ୍ରାରେ ପୋଡିଯାଇଛି। ଏହାର ଖବର ପାଇ ପୁରୁଷୋତ୍ତମପୁର ଅଗ୍ନିଶମ ଅଧିକାରୀ ଉମାଚରଣ ଭଟ୍ଟମିଶ୍ର ସଦଳବଳେ ଘଟଣାସ୍ଥଳକୁ ଯାଇ ନିଆଁକୁ ଆୟତ୍ତ କରିଥିଲେ। ମନ୍ଦିରରେ ଏଭଳି ଅଘଟଣ ଦେଖି ସ୍ଥାନୀୟ ଅଞ୍ଚଳବାସୀ ଏହାକୁ ଅଶୁଭ ସଙ୍କେତ ବୋଲି କହିଛନ୍ତି। ଖବର ପାଇ ପୁରୁଷୋତ୍ତମପୁର ତହସିଲଦାର ନିତିଶ୍ କୁମାର ତ୍ରିପାଠୀ ଘଟଣାସ୍ଥଳକୁ ଯାଇ ପରିସ୍ଥିତିର ସମୀକ୍ଷା କରିଛନ୍ତି। କିଭଳି ଦୀପ ଘରେ ନିଆଁ ଲାଗିଲା ତାହାର କାରଣ ଜଣାପଡିନାହିଁ।
