ଗଞ୍ଜାମ,୪।୧୨(ବିଦ୍ୟାଧର ସାହୁ ): ଗଞ୍ଜାମ ଜିଲା ୧୬ ନମ୍ବର ଜାତୀୟ ରାଜପଥ ପୁଇଁତଳା ଛକରେ ବୁଧବାର ଏକ ଅଘଟଣ ଘଟିଛି। ଏକ ଗ୍ୟାସ ସିଲିଣ୍ଡର ବୋଝେଇ ଚଳନ୍ତା ଟ୍ରକରେ ନିଆଁ ଲାଗିଯାଇଥିଲା l ମିଳିଥିବା ସୂଚନା ମୁତାବକ, ଏକ ଏଲ୍ପିଜି ସିଲିଣ୍ଡର ବୋଝେଇ ଟ୍ରକ ୧୬ ନମ୍ବର ଜାତୀୟ ରାଜପଥରେ ଆସୁଥିବା ବେଳେ ପୁଇଁତଳା ଛକଠାରେ ଟ୍ରକ ଇଞ୍ଜିନ୍ରେ ହଠାତ୍ ନିଆଁ ଲାଗି ହୁତୁହୁତୁ ହୋଇ ଜଳି ଉଠିଥିଲା। ଖବର ପାଇ ଛତ୍ରପୁର ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ।
ତହସିଲଦାର ସୁକାନ୍ତ ଚନ୍ଦ୍ର ମିଶ୍ର, ବିଡ଼ିଓ ଅଚ୍ୟୁତାନନ୍ଦ ଯାନୀ, ଛତ୍ରପୁର ଏସ୍ଡିପିଓ ଗୌରହରି ସାହୁ, ଥାନା ଆଇଆଇସି ସୁମିତ୍ରା ପାତ୍ର, ଗ୍ରାସୀମ ସୁରକ୍ଷା ଅଧିକାରୀ ଲିପିକ ମହାନ୍ତି ପ୍ରମୁଖ ଘଟଣାସ୍ଥଳରେ ପହଞ୍ଚି ପରିସ୍ଥିତି ଅନୁଧ୍ୟାନ କରିଥିଲେ l ଟ୍ରକର ସେଲ୍ଫ ମଟରରେ ଶର୍ଟ ସର୍କିଟ ହୋଇ ଗାଡିରେ ନିଆଁ ଲାଗିଯାଇଥିବା ଟ୍ରକ ଡ୍ରାଇଭର ପ୍ରହଲ୍ଲାଦ ଯାନୀ ସୂଚନା ଦେଇଛନ୍ତି l
ସୂଚନା ଯୋଗ୍ୟ, ଖୋର୍ଦ୍ଧା ପିପିସିଏଲରୁ ଟ୍ରକ ନଂ 000C 58552 ବ୍ରହ୍ମପୁରକୁ ଆସୁଥିଲା l ହେଲେ ପୁଇଁତଳା ଛକରେ ହଟାତ ଗାଡି ଇଞ୍ଜିନଣୁ ଧୂଆଁ ବାହାରୁ ଥିବା ଜାଣି ଡ୍ରାଇଭର ପ୍ରହଲ୍ଲାଦ ଗାଡିକୁ ଅଟକାଇ ଦେଇଥିଲେ। ପରବର୍ତ୍ତୀ ସମୟରେ ଗାଡ଼ିରେ ନିଆଁ ଲାଗିଯାଇଥିଲା। ଅନ୍ୟପକ୍ଷେ ଗ୍ୟାସ୍ ସିଲିଣ୍ଡରେ ନିଆଁ ଲାଗିବା ପୂର୍ବରୁ କମ୍ପାନୀ କର୍ମଚାରୀ ଏବଂ ଛତ୍ରପୁର ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ଫଳରେ ସମସ୍ତ ସିଲିଣ୍ଡର ସୁରକ୍ଷିତ ରହିଛି। ହେଲେ ଇଞ୍ଜିନ ପୋଡ଼ି ନଷ୍ଟ ହୋଇଯାଇଛି l ଗାଡ଼ିରେ ୪୨୦ ସିଲିଣ୍ଡର ଓ ୧୦ଟି ୩୫କେଜି ସିଲିଣ୍ଡର ଲୋଡ଼ ଥିବା ଡ୍ରାଇଭର କହିଛନ୍ତି।
