ଅଧିକାଂଶ ଅବିବାହିତ ଯୁବକ, ଯୁବତୀ ଲଭ୍ ଆଇଲ୍ୟାଣ୍ଡ ଏବଂ ସ୍ପିଲ୍ଟ୍ସଭିଲା ପରି ଅନେକ ରିୟାଲିଟି ଶୋ’କୁ ଯାଇଥାନ୍ତି। ଏଥିପାଇଁ ତାଙ୍କ ନିକଟରେ ଅନେକ ବିକଳ୍ପ ରହିଥାଏ। କିନ୍ତୁ ବ୍ରିଟେନର ଜଣେ ଯୁବକଙ୍କ ବିଶ୍ୱାସ ଥିଲା କି ସେ ଯେଉଁ ଯୁବତୀଙ୍କ ସହ ଡେଟ୍ରେ ଯାଉଛନ୍ତି ତାହା ତାଙ୍କ ଜୀବନକୁ ଏକ ଟିଭି ଶୋ’ରେ ପରିଣତ କରିବ।
ଏହି ଯୁବକ ଜଣଙ୍କ ତାଙ୍କ ସହିତ ହୋଇଥିବା ଭିନ୍ନ ଏକ ଘଟଣା ସମ୍ପର୍କରେ ସୋସିଆଲ ମିଡିଆରେ ଶେୟାର କରିଛନ୍ତି। ଯୁବକ ଜଣକ ଭିଡିଓରେ କହୁଛନ୍ତି, ସେ ଡେଟିଂ ଆପ୍ଲିକେଶନର ବ୍ୟବହାର କରୁଛନ୍ତି। ଏହି ଆପରେ ସେ ଜଣେ ଯୁବତୀଙ୍କ ସହ ଯୋଡ଼ି ହୋଇଥିଲେ। ପରେ ଉଭୟ ଭେଟିବା ପାଇଁ ଯୋଜନା ପ୍ରସ୍ତୁତ କରିଥିଲେ। ଉଭୟ ଡେଟିଂ ସ୍ପଟ୍ ଉପରେ ନିଷ୍ପତ୍ତି ନେଇଥିଲେ। ଏନେଇ ଦୁଇଜଣ ବହୁ ଉତ୍ସାହିତ ଥିଲେ। ମାତ୍ର ଯେତେବେଳେ ସ୍ପଟ୍ ଉପରେ ପହଞ୍ଚିଲେ ସେତେବେଳେ ଯୁବକଙ୍କ ଉତ୍ସାହ ପାଣି ଫାଟିଗଲା। କାରଣ ସେଠାରେ ପୂର୍ବରୁ ଆଉ ୧୫ ଜଣ ଯୁବକ ଉପସ୍ଥିତ ଥିଲେ। ଯାହାକି ଏହି ଯୁବକଙ୍କ ଅଜାଣତରେ ହୋଇଥିଲା।
ଯୁବକ ଜଣକ ଭିଡିଓରେ କହିଛନ୍ତି, ମୋତେ ବୁଝା ପଡ଼ିଲାନି ଯେତେବେଳେ ଜଣକ ପରେ ଜଣେ ଆସି ମୋ’ ସହ ହାତ ମିଳାଇଲେ। କିନ୍ତୁ ଯୁବତୀଙ୍କ ସହ ସେମାନେ ସମସ୍ତେ ବେଶ୍ ଭଲ ଭାବେ ହସଖୁସି ହେଉଥିଲେ। ସେ କହିଛନ୍ତି, ଜୀବନରେ ପ୍ରଥମ ଥର ଏହି ଯୁବତୀଙ୍କ ସହ ଡେଟ୍ରେ ଯିବାକୁ ନିଷ୍ପତ୍ତି ନେଇଥିଲି। ମୁଁ ଭାବି ପାରୁନି ଏହା ବାସ୍ତବରେ ନା ମଜାରେ ଘଟିଲା ମୋ ସହ। ଯୁବକ ଜଣକ କହିଛନ୍ତି, ଖାଲି ଏତିକି ନୁହେଁ ଯୁବତୀ ଏକଥା ବି କହିଲେ କି ସେ ସମସ୍ତ ଯୁବକଙ୍କୁ ଡାକିଥିଲେ। କହିଲେ ତୁମ ସମସ୍ତଙ୍କ ସହ ଭଲ ବନ୍ଧୁତା ବି ରହିବ। ଘରକୁ ଫେରି ପ୍ରଥମ ଯୁବକ ଯୁବତୀଙ୍କୁ ଏ ସମ୍ପର୍କରେ ମେସେଜ କରି ପଚାରିଲେ। ମାତ୍ର ଯୁବତୀଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିଲାନି।
ସୋସିଆଲ ମିଡିଆରେ ଏହି ଭିଡିଓ ଏବେ ଖୁବ୍ ଭାଇରାଲ ହେଉଛି। ଭିଡିଓକୁ ଦେଢ଼ ଲକ୍ଷରୁ ଅଧିକ ଲୋକ ଦେଖିସାରିଲେଣି। କିଛି ଲୋକ କହିଛନ୍ତି, ଏହା ଯୁବତୀଙ୍କ ପାଗଳପଣ। ଆଉ କିଛି ଲୋକ କହିଛନ୍ତି, ଯୁବକଙ୍କ ବିଶ୍ୱାସରେ ସେ ବିଷ ଦେଇଛନ୍ତି। କାହା ଭାବନା ସହିତ ଖେଳିବା ଉଚିତ୍ ନୁହେଁ। ସେହିପରି ଆଉ କିଛି ୟୁଜର କହିଛନ୍ତି, ଏହା ଏକ ଛୋଟ ମଜା ଥିଲା। ଏହାକୁ ଗମ୍ଭୀରତା ସହ ନିଅନ୍ତୁ ନାହିଁ।