ଭିଲ୍ଲାଇ, ୯।୭- ଛତିଶଗଡ଼ର ଭିଲ୍ଲାଇରୁ ଚକିତ କଲା ଭଳି ଏକ ଖବର ଆସି ପହଞ୍ଚତ୍ଛି। ବିବାହ ପୂର୍ବରୁ ଜଣେ ଯୁବତୀ ସେହି ଗ୍ରାମର ଜଣେ ବିବାହିତ ମହିଳାଙ୍କ ସହ ଫେରାର ହୋଇଯାଇଛନ୍ତି। ଯୁବତୀଙ୍କ ପରିବାର ଥାନାରେ ମାମଲା ରୁଜୁ କରିବା ପରେ ପୋଲିସ ହାଇଦ୍ରାବାଦରୁ ଉଭୟଙ୍କୁ ଉଦ୍ଧାର କରିଥିଲା। ଯେଉଁଠାରେ ପୋଲିସ ଜାଣିବାକୁ ପାଇଥିଲା ଉଭୟ ସମଲିଙ୍ଗୀ ଏବଂ ପରସ୍ପର ବିବାହ କରିସାରିଛନ୍ତି। ସେମାନେ ସ୍ବାମୀ-ସ୍ତ୍ରୀ ଭଳି ରହୁଛନ୍ତି ଏବଂ ଘରକୁ ଫେରିବାକୁ ଚାହୁଁନାହାନ୍ତି ବୋଲି ଯୁବତୀ ଓ ମହିଳାଜଣଙ୍କ କହିବା ପରେ ପୋଲିସ ଖାଲି ହାତରେ ଫେରିଥିଲା।
ଜଣାପଡ଼ିଛି ଯେ, ଭିଲ୍ଲାଇର ଉତାଇ ଅଞ୍ଚଳର ଜଣେ ୨୦ ବର୍ଷୀୟା ଯୁବତୀ ପରିବାର ରହୁଥିଲେ। ସେହି ଗ୍ରାମର ଜଣେ ସ୍ବାମୀ ପରିତ୍ୟକ୍ତା ୩୫ ବର୍ଷୀୟା ମହିଳାଙ୍କ ସହ ଯୁବତୀଙ୍କ ଘନିଷ୍ଠତା ଥିଲା। ଏହାପରେ ଦୁହେଁ ପରସ୍ପରକୁ ଭଲପାଇ ବସିଥିଲେ। ଯୁବତୀଙ୍କ ପରିବାର ମଧ୍ୟ ଉଭୟଙ୍କ ମିଳାମିଶାକୁ ସନ୍ଦେହ ଦୃଷ୍ଟିରେ ଦେଖୁଥିଲେ। ତେଣୁ ସେମାନେ ଯୁବତୀଙ୍କ ବିବାହ ମଧ୍ୟ ଠିକ୍ କରିଦେଇଥିଲେ। ତେବେ ଯୁବତୀ ଜଣଙ୍କ ଏହା ଜାଣିପାରି ମହିଳାଙ୍କ ସହ ଫେରାର ହୋଇଯିବାକୁ ନିଷ୍ପତ୍ତି ନେଇଥିଲେ। ଏହାପରେ ସେମାନେ ଏକ କାରରେ ହାଇଦ୍ରାବାଦ ପଳାଇଥିଲେ। ପରେ ଯୁବତୀଙ୍କ ପରିବାର ପକ୍ଷରୁ ନିଖୋଜ ନେଇ ଥାନାରେ ଅଭିଯୋଗ ହୋଇଥିଲା। ପୋଲିସ ଘଟଣାର ତଦନ୍ତ କରି ମହିଳାଙ୍କ ସମ୍ପର୍କରେ ଜାଣିବାକୁ ପାଇଥିଲା। ସେହିଭଳି ଯୁବତୀଙ୍କୁ ଯେଉଁ କାରରେ ମହିଳା ଜଣଙ୍କ ନେଇଯାଇଥିଲେ ସେହି କାର ଡ୍ରାଇଭରକୁ ମଧ୍ୟ ପୋଲିସ ପଚରା ଉଚରା କରିଥିଲା। ଶେଷରେ ଡ୍ରାଇଭର ଉଭୟଙ୍କ ହାଇଦ୍ରାବାଦ ଠିକଣା ପୋଲିସକୁ ଦେଇଥିଲା। ପୋଲିସ ସେଠାରେ ପହଞ୍ଚତ୍ବା ପରେ ଯୁବତୀଙ୍କ ସହ ମହିଳାଙ୍କୁ ଦେଖିଥିଲେ। କିନ୍ତୁ ମହିଳାଜଣଙ୍କ ପୁଅଙ୍କ ପରି ଡ୍ରେସ ପିନ୍ଧି ଚୁଟି କାଟି ରହୁଥିଲେ। ସେହିଭଳି ଏକ ନକଲି ନିଶ ମଧ୍ୟ ଲଗାଇଥିଲେ। ଫଳରେ ପୋଲିସ ପ୍ରଥମେ ଜାଣିପାରି ନ ଥିଲା। କିନ୍ତୁ ତଦନ୍ତ ସମୟରେ ସମସ୍ତ ଘଟଣାର ଫର୍ଦ୍ଦାଫାଶ ହୋଇଥିଲା। ମହିଳା ଜଣକ ପୁରୁଷ ବେଶରେ ରହୁଥିଲେ। ସ୍ବାମୀ-ସ୍ତ୍ରୀ ପରିଚୟ ଦେଇ ଉଭୟ ସେଠାରେ ଘରଭଡ଼ା ନେଇଥିବା ଜଣାପଡ଼ିଛି।