ଭୁବନେଶ୍ୱର,୧୧ା୫(ସ୍ପୋଟର୍ସ ବ୍ୟୁରୋ): ରୁଷିଆରେ ଅନୁଷ୍ଠିତ ମସ୍କୋ ଉଷୁ ଷ୍ଟାର ଓ୍ବାଲର୍ଡ ଚାମ୍ପିୟନଶିପରେ ସ୍ବର୍ଣ୍ଣ ପଦକ ବିଜୟୀ ହୋଇଛନ୍ତି ଓଡ଼ିଆ ଝିଅ ଶ୍ୱେତାରାଣୀ ମହାନ୍ତ। ୩ରୁ ୮ ମେ ମଧ୍ୟରେ ଅନୁଷ୍ଠିତ ଏହି ଟୁର୍ନାମେଣ୍ଟର ୪୮ କିଗ୍ରା ସାଣ୍ଡା ବର୍ଗରେ ସେ ସ୍ବର୍ଣ୍ଣ ପଦକ ବିଜୟୀ ହୋଇଥିଲେ। ଆଜାରବୈଜାନ୍, ଇଣ୍ଡୋନେସିଆ ଓ ରୁଷିଆର ପ୍ରତିଯୋଗୀଙ୍କୁ ପରାସ୍ତ କରିଥିବା ଶ୍ୱେତାରାଣୀ ବୁଧବାର ଭୁବନେଶ୍ୱରରେ ପହଞ୍ଚିବା ପରେ ତାଙ୍କୁ ଭୁବନେଶ୍ୱରରେ ଭବ୍ୟ ସ୍ବାଗତ କରାଯାଇଛି। ଭୁବନେଶ୍ୱର ବିମାନ ବନ୍ଦରରେ ଓଡ଼ିଶା ଉଷୁ ଆସୋସିଏଶନ ଓ ରାଜ୍ୟ କ୍ରୀଡା ଓ ଯୁବସେବା ବିଭାଗର ଓଏସ୍ଡି ସିଦ୍ଧାର୍ଥ ଶଙ୍କର ସାହୁ ତାଙ୍କୁ ଫୁଲତୋଡା ଦେଇ ସ୍ବାଗତ କରିଥିଲେ। ଏହା ଆମ ପାଇଁ ଏକ ଗୌରବମୟ ମୁହୂର୍ତ୍ତ ବୋଲି ଉଷୁ ଆସୋସିଏଶନ କୋଷାଧ୍ୟକ୍ଷ ପୃଥ୍ବୀରାଜ ହରିଚନ୍ଦନ ପ୍ରକାଶ କରିଥିଲେ। ସଭାପତି ଇଂ. ଏସ୍ ଏସ୍ ହରିଚନ୍ଦନ ମଧ୍ୟ ଶ୍ୱେତାରାଣ ଓ ତାଙ୍କ କୋଚ୍ ପଙ୍କଜ ମହାନ୍ତଙ୍କୁ ସଫଳତା ପାଇଁ ଶୁଭେଚ୍ଛା ଜଣାଇଥିଲେ। ରାଜ୍ୟରେ ଉଷୁ ପାଇଁ ଆବଶ୍ୟକୀୟ ସୁବିଧା ଓ ପ୍ରଶିକ୍ଷଣର ସୁଯୋଗ ନ ଥିଲେ ମଧ୍ୟ ଖେଳାଳି ମାନେ ଯେଉଁଭଳି ଭାବରେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ସଫଳତା ହାସଲ କରୁଛନ୍ତି ତାହା ବେଶ୍ ପ୍ରଶଂସନୀୟ ବୋଲି ସାଧାରଣ ସମ୍ପାଦକ ପ୍ରଦ୍ୟୁମ୍ନ ବେହେରା ପ୍ରକାଶ କରିଛନ୍ତି। ଉଲ୍ଲେଖଯୋଗ୍ୟ ଯେ, ଜମ୍ମୁ କଶ୍ମୀରରେ ଅନୁଷ୍ଠିତ ଖେଲୋ ଇଣ୍ଡିଆ ମହିଳା ଜାତୀୟ ଲିଗ୍ ୨୦୨୩ରେ ସ୍ବର୍ଣ୍ଣ ପଦକ ହାସଲ କରି ଶ୍ୱେତାରାଣୀ ଭାରତୀୟ ଦଳରେ ସାମିଲ ହୋଇଥିଲେ। ଭାରତୀୟ ଦଳର ଯାତାୟତ ଖର୍ଚ୍ଚ ସାଇ ବହନ କରିଥିଲା। ଭାରତୀୟ ଉଷୁ ଦଳ ଷ୍ଟାର ଓ୍ବାଲର୍ଡ ଚାମ୍ପିୟନଶିପରେ୧୭ ପଦକ ହାସଲ କରିଥିଲା। ଏହା ମଧ୍ୟରେ ୧୦ ସ୍ବର୍ଣ୍ଣ, ୪ ରୌପ୍ୟ ଓ ୩ ବ୍ରୋଞ୍ଜ ସାମିଲ ଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଅନୁରାଗ ଠାକୁର ଟୁଇଟ କରି ଉଷ୍ୁ ଦଳକୁ ଶୁଭେଚ୍ଛା ଜଣାଇଥିଲେ। ସାଇ ପକ୍ଷରୁ ନୂଆଦିଲ୍ଲୀରେ ସମସ୍ତ କ୍ରୀଡାବିତଙ୍କୁ ଭବ୍ୟ ସମ୍ବର୍ଦ୍ଧନା ପ୍ରଦାନ କରା ଯାଇଥିଲା।
